Fetela kwa tshedimosetsong

Fetela go diteng

Bogosi Jwa Modimo bo Tla Dira Eng?

Bogosi Jwa Modimo bo Tla Dira Eng?

Jesu o ile a ruta balatedi ba gagwe go rapelela gore Bogosi Jwa Modimo bo tle. O ne a itse gore dilo tse di bosula tse di diragalang mo lefatsheng, ga se thato ya Modimo le gore Bogosi Jwa Modimo ke jone fela jo bo neng bo tla baakanya dilo tseno. Bogosi Jwa Modimo bo tla dira eng?

SE BOGOSI JWA MODIMO BO SETSENG BO SE DIRILE

Mo setlhogong se se fetileng, re buile ka ditiragalo tse Jesu a buileng ka tsone tse di neng di supa gore Bogosi Jwa Modimo bo tlhomilwe kwa legodimong le gore Jesu Keresete ke Kgosi ya jone.

Baebele e tlhalosa gore fa Jesu a sena go dirwa Kgosi, o ne a leleka Satane le madimona a gagwe kwa legodimong. Gone jaanong ba mo lefatsheng, mme fa e sa le ba latlhelwa mo lefatsheng go ne ga simologa go diragala dilo tse di bosula le go feta go tloga ka 1914.—Tshenolo 12:7, 9.

Le fa gone maemo a lefatshe leno a ntse a nnela maswe go ya pele, Kgosi ya Bogosi Jwa Modimo e bong Jesu o dirile dilo tse dintsi go thusa batho mo lefatsheng. Batho ba le bantsi ba ile ba ithuta go dirisa melaometheo ya Baebele mo matshelong a bone. Mme seo e ne e le ka ntlha ya tiro e Jesu a neng a bua ka yone e e dirwang mo lefatsheng lotlhe ya go ruta batho Baebele. (Isaia 2:2-4) Batho ba le bantsi ba ithutile gore ba ka dira eng gore malapa a bone a itumele le gore tiro ya bone le dikhumo di se ka tsa nna botlhokwa thata mo botshelong. Batho bao ba solegelwa molemo ke se ba se ithutang e bile ba nna batho ba Modimo a batlang gore ba busiwe ke Bogosi jwa gagwe.

BOGOSI JWA MODIMO BO TLA DIRA ENG GAPE?

Le fa gone Jesu a setse a busa kwa legodimong, dipuso tsa batho tsone di sa ntse di busa mo lefatsheng. Mme gone Modimo o ile a raya Jesu a re: “Tsamaya o fenye mo gare ga baba ba gago.” (Pesalema 110:2) Mo nakong e e sa fediseng pelo, Jesu o tlile go fedisa baba botlhe ba gagwe a bo a fedisa mathata a batho ba ba batlang go ikobela Modimo.

Ka nako eo Bogosi Jwa Modimo:

  • Bo tla senya bodumedi jwa maaka. Baebele e tshwantsha bodumedi jwa maaka le seaka se se tlogang se fedisiwa. Madumedi a a ntseng a ruta maaka ka Modimo e bile a gatelela batho a tla fedisiwa. Batho ba le bantsi ba tla gakgamala tota fa ba bona bo senngwa.—Tshenolo 17:15, 16.

  • Bo tla fedisa dipuso tsa batho. Bogosi Jwa Modimo bo tla nyeletsa magosi otlhe a batho—Tshenolo 19:15, 17, 18.

  • Bo tla fedisa batho ba ba bosula. Go tla diragalang ka batho ba ba dirang dilo tse di bosula le ba ba ganang go ikobela Modimo? Baebele ya re: “Fa e le baikepi bone, ba tla kgaolwa mo lefatsheng.”—Diane 2:22.

  • Bo tla tswalela Satane le madimona a gagwe. Satane le madimona a gagwe ga ba kitla ba ‘tlhola ba tsietsa ditšhaba.’—Tshenolo 20:3, 10

Go tla diragala eng ka ba ba ikobelang Bogosi Jwa Modimo?

BOGOSI JWA MODIMO BO TLA DIRELA BATHO ENG?

Kgosi ya Bogosi Jwa Modimo e bong Jesu o tla direla batho dilo di le dintsi go feta sepe fela se se kileng sa dirwa ke dipuso tsa batho. O tla busa le ba ba 144 000 ba ba tlhophilweng go tswa mo lefatsheng. (Tshenolo 5:9, 10; 14:1, 3) Jesu o tla dira gore thato ya Modimo e diragadiwe mo lefatsheng. Bogosi Jwa Modimo bo tla direla batho eng?

  • Bo tla fedisa bolwetse, botsofe le loso. “Ga go na monni ope yo o tla reng: ‘Ke a bobola,’” gape “loso lo tla bo lo seyo.”—Isaia 33:24; Tshenolo 21:4.

  • Bo tla tlisa kagiso ya mmatota le polokesego. “Kagiso ya bomorwao e tla nna kgolo,” gape “ba tla nna, mongwe le mongwe kafa tlase ga mofine wa gagwe le kafa tlase ga setlhare sa gagwe sa mofeige mme go tla bo go se na ope yo o ba boifisang.”—Isaia 54:13; Mika 4:4.

  • Bo tla dira gore batho ba itumelele ditiro tsa bone. “Batho ba me ba ba tlhophilweng ba tla dirisa tiro ya diatla tsa bone ka botlalo. Ga ba kitla ba direla ka natla lefela.”—Isaia 65:22, 23.

  • Bo tla fedisa mathata a tikologo. “Naga le kgaolo e e se nang metsi di tla itumela, le lebala le le sekaka le tla ipela le bo le ntsha dithunya jaaka saferone.”—Isaia 35:1.

  • Bo tla ruta batho gore ba tlhoka go dira eng gore ba kgone go tshelela ruri. “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.”—Johane 17:3.

Modimo o batla gore o itumelele masego ano. (Isaia 48:18) Setlhogo se se latelang se tla tlhalosa gore ke eng se o ka se dirang gone jaanong gore o kgone go itumelela masego ano.