Fetela kwa tshedimosetsong

Fetela go diteng

Itse Nnete ka Modimo le Jesu

Itse Nnete ka Modimo le Jesu

Le fa batho ba obamela medimo e le mentsi, go na le Modimo o le esi fela wa boammaruri. (Johane 17:3) Ke “Mogodimodimo,” Mmopi wa dilo tsotlhe le Monei botshelo. Ke ene fela o re tshwanetseng go mo obamela.—Daniele 7:18; Tshenolo 4:11.

Modimo ke Mang?

Leina la Modimo le tlhaga mo Baebeleng MAKGETLO A A KA NNANG 7 000

JEHOFA ke leina la Modimo

MORENA, MODIMO, RARA—Ke dingwe tsa direto tsa ga Jehofa

Leina la Modimo ke Mang? Modimo o ile a re:“Ke nna Jehofa. Ke lone leina la me.” (Isaia 42:8) Leina la Modimo le tlhaga makgetlho a ka nna 7000 mo Baebeleng. Le fa go ntse jalo, baranodi bangwe ba ile ba ntsha leina la Modimo ba bo ba tsenya sereto se se jaaka “Morena.” Modimo o batla gore re nne ditsala tsa gagwe, ka jalo, o re kgothaletsa gore re ‘bitse leina la gagwe.’—Pesalema 105:1.

Direto Tsa ga Jehofa. Baebele e bitsa Jehofa ka direto tse di jaaka “Modimo,” “Mothatayotlhe,” “Mmopi,” “Rara,” “Morena,” le “Molaodimogolo.” Go na le dithapelo tse dintsi tse di kwadilweng mo Baebeleng mme mo go tsone Modimo o bidiwa ka leina la gagwe e bong Jehofa le sereto se se mo tlotlomatsang.—Daniele 9:4.

 Modimo o Ntse Jang? Modimo ke moya. (Johane 4:24) Baebele ya re “ga go na motho ope yo o kileng a bona Modimo.” (Johane 1:18) Baebele e tlhalosa gore Modimo o na le maikutlo. Batho ba ka kgona go mo utlwisa botlhoko kgotsa ba ka kgona go dira gore a itumele.—Diane 11:20; Pesalema 78:40, 41.

Dinonofo Tse di Molemo Tsa Modimo. Jehofa ga a tlhaole batho go ya ka setso sa bone kgotsa tsela e ba godisitsweng ka yone. (Ditiro 10:34, 35) Gape Jehofa ke Modimo “yo o kutlwelobotlhoko le yo o pelontle, yo o bonya go galefa le yo o nang le bopelonomi jo bogolo jwa lorato le boammaaruri.” (Ekesodo 34:6, 7) Mme gone, go na le dinonofo tsa Modimo tse nnê tse di kgatlhang thata.

Maatla. E re ka e le “Modimo Mothatayotlhe” ga a palelwe ke go dira dilo tse a di solofeditseng.—Genesise 17:1.

Botlhale. Modimo o botlhale go gaisa ope fela. Ke gone ka moo Baebele e reng o “botlhale a le nosi.”—Baroma 16:27.

Tshiamiso. Ka metlha Modimo o dira dilo tse di siameng. Ga a ke a dira diphoso e bile ga a “tshiamololo.”—Duteronome 32:4.

Lorato. Baebele ya re “Modimo ke lorato.” (1 Johane 4:8) Modimo ga a bontshe lorato fela, ene ka bo ene ke lorato. O bontsha lorato lwa gagwe mo dilong tsotlhe tse a di dirang mme seo se re tswela mosola.

Modimo o Kgona go Nna Tsala le Batho. Modimo ke Rraarona yo o lorato yo o kwa legodimong. (Mathaio 6:9) Fa re na le tumelo mo go ene re ka kgona go nna ditsala tsa gagwe. (Pesalema 25:14) Tota e bile, Modimo a re re atamalane le ne ka thapelo e bile a re re ‘latlhele tlhobaelo yotlhe ya rona mo go ene, ka gonne o a re kgathalela.’—1 Petere 5:7; Jakobe 4:8.

Modimo le Jesu ba Farologana ka Eng?

Jesu ga se Modimo. Go farologana le batho botlhe, Jesu ke ene fela a bopilweng ke Modimo ka tlhamalalo. Ke gone ka moo Baebele e mmitsang Morwa Modimo. (Johane 1:14) Fa Jehofa a se na go bopa Jesu, Jesu o ne a bontsha gore ke “modiri yo o setswerere” ka go dira tiro e Modimo a mo neileng yone ya go bopa batho le dilo tse dingwe tsotlhe.—Diane 8:30, 31; Bakolosa 1:15, 16.

 Jesu Keresete ga ise a ko a re ke ene Modimo. Go na le moo, o ile a re: “Ke moemedi yo o tswang kwa . . . [Modimong], mme Ene yoo o nthomile.” (Johane 7:29) Fa a ne a bua le barutwa ba gagwe o ne a re Jehofa ke “Rre le Rraalona” le ‘Modimo wa me le Modimo wa lona.’ (Johane 20:17) Fa Jesu a sena go swa, Jehofa o ile a mo tsosa gore a ye go tshela kwa legodimong a bo a mo naya maatla a magolo a go laola dilo tse dingwe.—Mathaio 28:18; Ditiro 2:32, 33.

Jesu A ka Go Thusa Gore o Atamalane le Modimo

Jesu o ile a tla mo lefatsheng go tla go re ruta ka ga Rraagwe. Jehofa o ne a bua jaana ka Jesu: “Yono ke Morwaake, moratwa; mo reetseng.” (Mareko 9:7) Jesu o itse Modimo go feta mongwe le mongwe. O ne a re: “Ga go yo o itseng [Rara] fa e se Morwa, le ene yo Morwa a ratang go mo mo senolela.”—Luke 10:22.

Re kgona go bona dinonofo tsa Modimo sentle mo go Jesu. Jesu o ne a etsa dinonofo tsa ga Rraagwe thata jaana mo a neng a feleletsa a re: “Yo o mponeng o bone le Rara.” (Johane 14:9) Jesu o ile a gogela batho kwa go Jehofa ka go ba rata fela jaaka Rraagwe a ne a ba rata. O ile a re: “Ke nna tsela le boammaaruri le botshelo. Ga go na ope yo o tlang kwa go Rara fa e se ka nna.” (Johane 14:6) Gape o ile a re: ‘Baobamedi ba boammaaruri ba tla obamela Rara ka moya le boammaaruri, gonne, eleruri, Rara o batla ba ba ntseng jalo go mo obamela.’ (Johane 4:23) Akanya fela, Jehofa o batla gore batho ba ba tshwanang le wena ba mo itse e bile ba itse boamaaruri.