Fetela kwa tshedimosetsong

Fetela go diteng

 SETLHOGO SA KA FA NTLE | A GO NA LE BAENGELE? GORENG O TSHWANETSE GO ITSE?

A Baengele Ba ka Go Thusa?

A Baengele Ba ka Go Thusa?

Maitseboa mangwe ka Sontaga, Kenneth le Filomena ba ba nnang kwa Curaçao, ba ne ba etela banyalani bangwe ba ba neng ba ithuta Baebele le bone.

Kenneth a re: “Fa re goroga, re fitlhetse ntlo e tswetswe e bile koloi e seyo. Mme sengwe se ne sa ntlhotlheletsa go leletsa mosadi.”

Mosadi yoo o ile a araba mogala a bo a ba bolelela gore monna wa gagwe o kwa tirong. Mme fa a sena go lemoga gore Kenneth le Filomena ba ne ba eme fa kgorong, o ne a ya go ba bulela gore ba tsene.

Ba ne ba lemoga gore o ntse a lela. Fa Kenneth a rapela pele ba simolola go ithuta, mosadi yoo o ne a simolola go lela gape. Ka jalo, ba ne ba botsa mosadi yoo gore bothata ke eng.

Mosadi yoo o ne a ba raya a re o ne a batla go ipolaya ka one maitseboa ao le gore o ne a kwalela monna wa gagwe lekwalo fa Kenneth a mo leletsa. O ne a ba bolelela gore o na le kgatelelo ya maikutlo, ka jalo ba ne ba mo gomotsa ba dirisa Baebele. Seo se ne sa boloka botshelo jwa mosadi yoo.

Kenneth a re: “Re ne ra leboga Jehofa go bo a re dirisitse go thusa mosadi yono yo o hutsafetseng le go re kaela a dirisa moengele kgotsa moya wa Gagwe o o boitshepo gore re leletse mosadi yono!” *

A Kenneth le Filomena ba nepile fa ba re Modimo o dirisitse moengele kgotsa moya wa Gagwe o o boitshepo? Kgotsa a go itiragaletse fela gore Kenneth a leletse mosadi yoo?

Ga re itse. Mme se re se itseng ke gore Modimo o dirisa baengele go thusa batho go nna le kamano le Ene. Ka sekai, Baebele ya re Modimo o ne a dirisa moengele go kaela moreri wa Mokeresete e bong Filipo go thusa modiredi wa Moethiopia go tlhaloganya se a neng a se bala ka Modimo.—Ditiro 8:26-31.

Madumedi a le mantsi a ruta batho go dumela gore go na le dibopiwa tsa moya tse di nang le maatla a a sa tlwaelegang, tse dingwe tsa tsone di tlhalosiwang e le dibopiwa tse di siameng tse di dirang tiro ya Modimo kgotsa tse di tlhokomelang batho. Batho ba le bantsi ba ba dumelang gore baengele ba teng, ba re meya eo e ba thusa ka tsela nngwe. Le fa go ntse jalo, go na le batho bangwe ba ba sa dumeleng gore go na le baengele.

A tota baengele ba teng? Fa e le gore go ntse jalo, ba tswa kae? Boammaaruri ke eng ka baengele? A ba ka go thusa? A re bone.

^ ser. 8 Baebele ya re leina la Modimo ke Jehofa.—Pesalema 83:18.