Fetela kwa tshedimosetsong

Fetela go diteng

O ka Tokafatsa Jang Botshelo Jwa Gago?

O ka Tokafatsa Jang Botshelo Jwa Gago?

BOTSHELO ga bo ka tsela e Modimo a neng a batla gore bo nne ka yone. Modimo o ne a batla gore lefatshe le tlale ka batho ba ba tlotlang melao ya gagwe, ba ba reetsang kgakololo ya gagwe le ba ba nang le botho jo bo tshwanang le jwa gagwe. O ne a batla gore batho botlhe ba tshedisane mmogo ka kagiso ba itumetse, ba nne le malapa, ba ithute dilo tse disha e bile ba dire gore lefatshe lotlhe le nne paradaise.

MODIMO O RE SOLOFETSA GORE O TLILE GO DIRA GORE LEFATSHE LE NNE KA TSELA E A NENG A LE BATLA KA YONE

  • “O dira gore dintwa di kgaotse go ya kwa ntlheng ya lefatshe.”Pesalema 46:9.

  • Modimo ‘o tlhomile nako ya gore a senye ba ba senyang lefatshe.’Tshenolo 11:18.

  • “Ga go na monni ope yo o tla reng: ‘Ke a bobola.’”Isaia 33:24.

  • “Batho ba me ba ba tlhophilweng ba tla dirisa tiro ya diatla tsa bone ka botlalo.”Isaia 65:22.

Dilo tse ditemana tseno di buang ka tsone di tla diragadiwa jang? Modimo o tlhomile Jesu gore a nne Kgosi ya puso ya gagwe mme Jesu o tla busa lefatshe a le kwa legodimong. Baebele e bitsa puso eo e re ke Bogosi Jwa Modimo. (Daniele 2:44) Baebele ya re ‘Modimo o tla naya Jesu setulo sa bogosi mme o tla busa e le kgosi.’—Luke 1:32, 33.

Fa Jesu a ne a le mo lefatsheng, o ile a dira dikgakgamatso go re bontsha se a tlileng go re direla sone fa e le Kgosi.

JESU O ILE A BONTSHA SE A TLA SE DIRELANG BATHO BA BA REETSANG MODIMO

  • O ile a alafa malwetse a a farologaneng go bontsha gore ka nako ya fa a busa, ga go na motho ope yo o tlileng go lwala.Mathaio 9:35.

  • Fa a ne a kgalemela lewatle, o ile a bontsha gore o tla sireletsa batho gore dilo tsa tlholego di se ka tsa ba gobatsa.Mareko 4:36-39.

  • O ile a naya batho dijo go bontsha gore ka nako ya fa a busa, ga go na motho ope yo o tla tshwarwang ke tlala.Mareko 6:41-44.

  • O ile a fetola metsi gore e nne beine go bontsha gore o tla thusa batho gore ba itumelele botshelo.Johane 2:7-11.

O ka dirang gore o nne teng ka nako ya fa Modimo a tla bo a direla batho dilo tsotlhe tse re buileng ka tsone? Go na le tsela e o tshwanetseng wa bo o le mo go yone. Baebele ya re ‘tsela eo e isa botshelong jo bo sa khutleng’ mme ke ba le mmalwa fela ba ba e bonang.—Mathaio 7:14.

GO BONA TSELA E E RE ISANG KWA BOTSHELONG JO BO BOTOKA

Tsela e e isang botshelong ke eng? Modimo a re: “Nna Jehofa, ke Modimo wa gago, Yo ke go rutang gore o solegelwe molemo, Yo ke dirang gore o gate mo tseleng e o tshwanetseng wa tsamaya mo go yone.” (Isaia 48:17) Fa o latela kgakololo eno, botshelo jwa gago bo tla tokafala.

 Jesu o ile a re: “Ke nna tsela le boammaaruri le botshelo.” (Johane 14:6) Fa re dira dilo tse Jesu a ileng a bua ka tsone e bile re etsa sekao sa gagwe, le rona re tla nna ditsala tsa Modimo mme botshelo jwa rona bo tla nna botoka thata.

O ka bona jang tsela e e isang botshelong? Go na le madumedi a le mantsi mme Jesu o ile a re tlhagisa jaana: “Ga se mongwe le mongwe yo o nthayang a re, ‘Morena, Morena,’ yo o tla tsenang mo bogosing jwa magodimo, mme yo o dirang thato ya ga Rre yo o kwa magodimong o tla tsena.” (Mathaio 7:21) Gape o ile a re: “Lo tla ba lemoga ka maungo a bone.” (Mathaio 7:16) Baebele e kgona go go thusa go itse gore ke bomang ba ba direlang Modimo ka tsela e a e batlang.—Johane 17:17.

O ka dirang gore o tsamaye mo tseleng ya botshelo? O tshwanetse go itse gore ke mang yo o re neileng botshelo, leina la gagwe ke mang, ke Modimo yo o ntseng jang, o re direla eng gone jaanong le gore o batla gore rona re direng. *

Modimo o batla gore batho ba itumelele go bereka, go ja, go tshameka le go nna le malapa. Mo godimo ga moo, o ne a batla gore re itse gore ke ene a re bopileng le gore re nne ditsala tsa gagwe. Re ka bontsha Modimo gore re a mo rata ka go dira dilo tse a di batlang. Jesu o ile a re: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri.”—Johane 17:3.

MODIMO O DIRISA BAEBELE GO RE RUTA GORE RE “SOLEGELWE MOLEMO.”—ISAIA 48:17

TSENA MO TSELENG YA BOTSHELO

Fa e le gore o batla gore Modimo a go amogele, go na le dilo dingwe tse o tla tlhokang go di fetola. Kwa tshimologong go ka lebega go le thata mme fela jaaka loeto longwe le longwe mo botshelong, gore o fitlhe kwa go lone, o tlhoka go tsena mo tseleng. Fa e le gore o na le dipotso tsa Baebele, Basupi ba ga Jehofa ba ka itumelela go ithuta Baebele le wena ka nako le kwa lefelong le o le batlang. Fa o batla go ikgolaganya le rona, o ka tsena mo website ya www.jw.org/tn.