Fetela kwa tshedimosetsong

Fetela go diteng

BAEBELE YA RENG?

Go Fedisiwa ga Lefatshe

Go Fedisiwa ga Lefatshe

Johane wa ntlha 2:17 ya re “lefatshe le a feta le keletso ya lone.” “Lefatshe” leo ke eng? Le tla fedisiwa jang le gone leng?

“Lefatshe” le le tla fedisiwang ke eng?

SE BAEBELE E SE BUANG

E re ka lefatshe le go buiwang ka lone le na le ‘dikeletso’ tse Modimo a sa di amogeleng, go raya gore ga se lefatshe le re tshelang mo go lone. Go na le moo, ke batho ba ba itlhokomolosang melao ya Modimo, ba itira mmaba wa gagwe. (Jakobe 4:4) Batho bao “ba tla tlelwa ke kotlhao ya katlholo ya tshenyego ya bosakhutleng.” (2 Bathesalonika 1:7-9) Ka fa letlhakoreng le lengwe, batho ba ba ikobelang Jesu Keresete ka ‘go se nne karolo ya lefatshe,’ ba na le tsholofelo ya go tshela ka bosakhutleng.—Johane 15:19.

Johane wa ntlha 2:17 e konela jaana: “Yo o dirang thato ya Modimo o ntse ka bosaengkae.” Ee, yo o dirang jalo o na le tsholofelo ya go tshela mo lefatsheng, jaaka go bontshitswe mo go Pesalema 37:29: “Basiami ba tla rua lefatshe, mme ba tla aga mo go lone ka bosakhutleng.”

“Lo se ka lwa bo lo rata lefatshe le fa e le dilo tse di mo lefatsheng. Fa motho a rata lefatshe, lorato lwa ga Rara ga lo yo mo go ene.”1 Johane 2:15.

Lefatshe le tla fedisiwa jang?

SE BAEBELE E SE BUANG

Lefatshe le tla fedisiwa ka dikarolo tse pedi. Ya ntlha, Modimo o tla fedisa madumedi a maaka, a a tshwantshiwang le seaka se se bidiwang “Babelona o Mogolo.” (Tshenolo 17:1-5; 18:8) Le fa a ipolela gore o a ikanyega mo Modimong, o ntse a ikamanya le baeteledipele ba lefatshe ba dipolotiki. Le fa go ntse jalo, bone baeteledipele bao ba tla mo tlhanogela. “[Ba] tla tlhoa seaka mme [ba] tla se senya [ba bo ba] se dira se se sa ikategang, mme [ba] tla ja dikarolo tsa sone tse di dinama [ba] di fetsa [ba bo ba] se ja ka molelo gotlhelele.”—Tshenolo 17:16.

Go tswa foo, Modimo o tla tlhoma mogopolo mo baeteledipeleng bao ba dipolotiki—‘dikgosi tsa lefatshe lotlhe le le nang le banni.’ Bone le batho ba ba sa siamang, ba tla fedisiwa ka ‘ntwa ya letsatsi le legolo la Modimo Mothatayotlhe,’ e gape e bidiwang “Haramagedona.”—Tshenolo 16:14, 16.

“Batlang Jehofa, lona lotlhe ba ba pelonolo ba lefatshe, . . . Batlang tshiamo, batlang bopelonolo. Gongwe lo ka nna lwa sujwa mo letsatsing la bogale jwa ga Jehofa.”Sefania 2:3.

Lefatshe le tla fedisiwa leng?

SE BAEBELE E SE BUANG

Lefatshe le tla fedisiwa fa batho botlhe ba setse ba boleletswe ka Bogosi Jwa Modimo, jo e leng puso ya lefatshe lotlhe e e tla tseelang dipuso tsa batho maemo. (Daniele 7:13, 14) Jesu Keresete o ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” (Mathaio 24:14) Tiro eo ya go rera, e e bontshang tshiamo le kutlwelobotlhoko ya Modimo, ke karolo ya “sesupo” sa gore lefatshe le gaufi le go fedisiwa. Gape sesupo seo se akaretsa dintwa, dithoromo tsa lefatshe, leuba le malwetse.—Mathaio 24:3; Luke 21:10, 11.

Baebele ga e re bolelele fela ka ditiragalo tsa lefatshe mme e re bolelela gore batho ba ba tshelang mo “metlheng ya bofelo” ba tla nna jang. Re bala jaana: “Go tla nna le dinako tsa mathata tse go leng boima go lebana le tsone. Gonne batho ba tla nna baithati, barati ba madi, . . . ba ba sa utlweng batsadi, . . . ba ba se nang boikgapo, ba ba bogale jo bo tshabegang, ba ba sa rateng se se molemo, . . . barati ba menate go na le go nna barati ba Modimo.” *2 Timotheo 3:1-5.

Mo bogautshwaneng, lefatshe la gompieno le le sa siamang ‘le tla feta.’—1 Johane 2:17

Ditiragalo tseo tsotlhe di bontsha motlha o o simologileng ka nako ya Ntwa ya Lefatshe I ka 1914. Mo godimo ga moo, fa e sa le ka ngwaga oo, Bogosi Jwa Modimo bo ntse bo bolelwa mo lefatsheng lotlhe e bile Basupi ba ga Jehofa ba go tsaya e le tshiamelo go dira tiro eo. Tota e bile, kgatiso ya bone e e itsegeng thata ke Tora ya Tebelo E Itsise Bogosi Jwa ga Jehofa.

“Jalo, nnang lo disitse, ka gonne ga lo itse letsatsi le fa e le ura.”Mathaio 25:13.

^ ser. 14 Fa o batla tshedimosetso e e oketsegileng, bona kgaolo 9 ya buka ya Totatota Baebele e Ruta Eng? e e gatisitsweng ke Basupi ba ga Jehofa. Gape e gone mo www.jw.org/tn.