Fetela kwa tshedimosetsong

Fetela go diteng

 A LE TLHAMILWE?

Lesedi la Bobtail Squid ya Hawaii

Lesedi la Bobtail Squid ya Hawaii

BOBTAIL squid ya Hawaii e tsoma bosigo e bile e itirela lesedi e thusiwa ke ngwedi le dinaledi gore e se ka ya bonwa. Phologotswana eno e kgona go dira seno ka ntlha ya dibaketeria tse di mo go yone. Dibaketeria tseno di ka re solegela molemo ka ditsela tse dingwe tse dintsi. Tsela e nngwe ke mo dilong tsa botsogo.

Akanya ka seno: Bobtail squid ya Hawaii e nna mo metsing a a phepa a kwa Ditlhaketlhakeng Tsa Hawaii. Gantsi lesedi la ngwedi le la dinaledi le dira gore diphologolo tse di e tsomang di bone moriti wa yone. Le fa go ntse jalo, bobtail squid e ntsha marang a a tshwanang le a lesedi la ngwedi le la dinaledi mo karolong ya yone e e ka fa tlase. Seno se dira gore moriti wa yone o se ka wa bonala. Squid se dirisa karolo eo e e lesedi e e nang le dibaketeria gore se se ka sa bonwa.

Dibaketeria di ka thusa go laola nako e squid se robalang le go tsoga ka yone. Babatlisisi ba rata tsela e dibaketeria di amanang ka yone le thulaganyo ya go robala ya bobtail squid ka gonne diphologolo tse dingwe le tsone di ka tswa di na le yone. Ka sekai, dibaketeria tse di thusang diamusi go sila dijo sentle di amana le thulaganyo ya tsone ya go robala le go tsoga ka nako e e tshwanang ka metlha. Fa thulaganyo eno e ka kgorelediwa, seno se ka baka bolwetse jwa go tshwenyega thata mo maikutlong, bolwetse jwa sukiri, go nona thata le mathata a go robala sentle. Ka jalo, go ithuta ka tsela e dibaketeria di dirang ka yone mo mmeleng go ka re thusa go tlhaloganya dilo tse di amanang le boitekanelo jwa rona.

O akanyang? A lesedi la bobtail squid ya Hawaii le itlhagetse ka bolone fela? Kgotsa a le tlhamilwe?