Fetela kwa tshedimosetsong

Fetela go diteng

 BAEBELE YA RENG

Lefatshe

Lefatshe

Boikaelelo jwa Modimo ke eng ka lefatshe?

“Gonne Jehofa o buile jaana, . . . Mmopi wa lefatshe le Modiri wa lone, . . . yo o sa le bopelang lefela, yo o le bopetseng go nniwa.”—Isaia 45:18.

SE BATHO BA SE BUANG

Batho ba bantsi ba re lefatshe ga le a bopiwa ke ope. Madumedi a mangwe a ruta gore lefatshe ke lefelo le Modimo a lekang batho mo go lone go bona gore a ba tshwanelwa ke go tshela kwa legodimong kgotsa go tlhokofadiwa kwa diheleng.

SE BAEBELE E SE BUANG

Baebele ya re “Modimo o ne a bopa magodimo le lefatshe.” (Genesise 1:1) O ne a raya banyalani ba ntlha a re: “Atang lo ntsifale lo tlatse lefatshe lo bo lo le fenye, mme lo laole . . . sengwe le sengwe se se tshelang se se tsamayang mo lefatsheng.” (Genesise 1:28) Loso lo ne lwa umakiwa fela fa lo ne lo amanngwa le go sa ikobele Modimo. (Genesise 2:17) Ka jalo, Modimo o ne a ikaeletse gore lefatshe e nne legae la batho ka bosakhutleng. Le ne le tshwanetse go tlala ka batho ba ba kutlo ba ba neng ba tla le tlhokomela ba bo ba nna mo go lone ka bosakhutleng.

 A lefatshe le tla senngwa?

“O thaile lefatshe mo mafelong a lone a a tlhomameng; ga le kitla le reketlisiwa ka bosakhutleng, kgotsa ka bosaengkae.”—Pesalema 104:5.

SE BATHO BA SE BUANG

Baitsesaense ba bua ka maemo a a farologaneng a mo go one lefatshe le ka senngwang gotlhelele kgotsa la se ka la nniwa. Ka dinako dingwe maemo ao a a bidiwang dikotsi tse di ka senyang isagwe ya batho, a akaretsa dikotsi tsa masetlapelo a tlholego—tse di jaaka asteroid kgotsa dilo tse di tswang kwa lefaufaung, makgwamolelo a a boitshegang, go nyelela ga letsatsi kgotsa go gotela ga moya o o mo loaping—gape a akaretsa tshenyo e e bakwang ke batho—jaaka ntwa ya nuklea kgotsa borukhutlhi.

SE BAEBELE E SE BUANG

Boikaelelo jwa Modimo ka lefatshe ga bo ise bo fetoge. Lefoko la Modimo la re: “Lefatshe le eme ka bosakhutleng.” (Moreri 1:4) Mo godimo ga moo, le tla nniwa ka bosakhutleng: “Basiami ba tla rua lefatshe, mme ba tla aga mo go lone ka bosakhutleng.”—Pesalema 37:29.

GORENG GO LE BOTLHOKWA?

Kgopolo ya gore lefatshe le tla senngwa e dirile gore bangwe ba senye dikungo tse di botlhokwa tsa lone. Go dirile gore batho ba felelwe ke tsholofelo ka isagwe ba bo ba tshelele gompieno fela. Seno se ka dira gore botshelo jwa bone bo se ka jwa nna le bokao. Ka fa letlhakoreng le lengwe, fa re dumela gore re ka tshelela ruri mo lefatsheng, re tla dira ditshwetso tse di tla solegelang rona le ba malapa a rona molemo—tota le mo isagweng.

A batho botlhe ba ya legodimong?

“Fa e le magodimo, magodimo ke a ga Jehofa, mme lefatshe o le neile bana ba batho.”—Pesalema 115:16.

SE BATHO BA SE BUANG

Batho ba bantsi ba dumela gore batho botlhe ba ba siameng ba ya legodimong.

SE BAEBELE E SE BUANG

Legodimo ke la Modimo, mme lefatshe ke la batho. Baebele e bua ka “lefatshe le le nang le banni le le tla tlang.” (Bahebera 2:5) Jesu e ne e le motho wa ntlha go tlhatlogela kwa legodimong e bile Baebele e bontsha gore ke ba le mmalwa fela ba ba tlhophilweng gore ba ye legodimong ka boikaelelo bongwe. Ba tla “busa lefatshe e le dikgosi” mmogo le Jesu.—Tshenolo 5:9, 10; Luke 12:32; Johane 3:13.

GORENG GO LE BOTLHOKWA?

Kgopolo ya gore batho botlhe ba ba siameng ba ya legodimong ga e tswe mo Baebeleng. Fa e le gore batho botlhe ba ba siameng ba ya legodimong, seo se ne se tla raya gore Modimo o paletswe ke go diragatsa boikaelelo jwa gagwe ka lefatshe le gore ditsholofetso tsa gagwe ka botshelo jo bo sa khutleng mo lefatsheng ga di boammaaruri. Go farologana le seo, Lefoko la Modimo le solofetsa jaana: “Solofela mo go Jehofa mme o boloke tsela ya gagwe, mme o tla go godisa gore o rue lefatshe.”—Pesalema 37:34.