Fetela kwa tshedimosetsong

Fetela go diteng

Ditshupanako Tsa Bogologolo

Ditshupanako Tsa Bogologolo

Ditshupanako Tsa Bogologolo

● Go ka direga gore tshupanako e e sa diriseng betiri e ile ya tlhamiwa kwa China dingwaga di feta 900 tse di fetileng. Fa e sa le ka nako eo, ditshupanako di ile tsa tokafadiwa thata. Phetogo e e tlhomologileng e nnile gone mo magareng a dingwaga tsa bo1600 fa go ne go dirisiwa tshipi e e akgegang (pendulum) mo ditshupanakong tse di sa diriseng betiri. Ka ntlha ya phetogo eno e kgolo, ditshupanako di ne tsa nepa nako thata jaana mo e leng gore go ile ga tsenngwa karolo e nngwe e ntšha mo go tsone—lonakana lwa motsotso! Tshupanako eno e e neng e tlhabolotswe—e e nang le tshipi e e akgegang, ditshipi tse di bokete le metšhini e e bokete—e ne e tlhoka lebokoso le le nonofileng e bile le tsepame. Moitse mongwe wa ditshupanako o ne a tlhalosa gore mofuta ono wa ditshupanako “o nepa nako thata, tota le mo maemong a a thata.”

Pele, ditshupanako tseno tse di tlhwatlhwakgolo di ne di dirwa fela kwa ditoropong tse dikgolo tsa kwa Yuropa, tse di jaaka Lontone le Paris. Le fa go ntse jalo, fa nako e ntse e tsamaya, madirelo a tsone a ile a anama a bo a fitlha le kwa dikarolong tse di kgakala tsa kontinente ya Yuropa. Ka jalo, ditshupanako tse di neng di dirilwe ka tsela e e tlwaelegileng di ile tsa simolola go kgabisiwa ka tsela ya mo lefelong le di dirwang mo go lone. Popego ya tshupanako e ne e ka nna e e tlhamaletseng kgotsa e e makoro; e le tshesane kgotsa e le kima. E ne e ka dirwa ka logong lwa phaene, lwa ebony, lwa mahogany, lwa moakere kgotsa lwa walnut mme lebokoso la yone le ne le ka kgabisiwa kgotsa la tlogelwa jaaka le ntse. Ka jalo, tshupanako eno ya bogologolo ga e a ka ya ratiwa thata fela ka gonne e nepa nako sentle mme gape e ne ya ratega ka gonne e le sengwe se sentle se se nang le seriti se se ka kgabisang phaposi.

Go ka direga gore go na le lebaka le lengwe gape la go bo tshupanako eno ya bogologolo e kgatlha jaana e bile e ngoka. Ka tsela nngwe, e na le ditebego tsa motho. Mmatlisisi mongwe wa kwa Finland e bong Dr. Sinikka Mäntylä, o lemogile gore tshupanako eno “e batlile e lekana le motho ka boleele e bile e lebega e kete e na le maikutlo.” Tota le fa dinaka tsa yone di itaya, di utlwala jaaka pelo e e itayang. Gompieno, ditshupanako tse di laolwang ke legakwa, tse di tshwarang nako sentle e bile di sa ture, di emiseditse bontsi jwa ditshupanako tseno tse dikgolo, tse di tlhamaletseng e bile di dirilwe ka botswerere. Mme tota le mo dinakong tseno tsa rona tse di potlakileng, tshupanako eno e sa ntse e dira gore batho ba ikutlwe ba ritibetse. Buka ya Keeping Time—Collecting and Caring for Clocks e bolela jaana: “Tshupanako eno e dinaka tsa yone di itayang ka bonya e ka dira gore re ritibale le go akanya ka dinako tsa bogologolo tse go neng go na le kagiso ka tsone.”

[Setshwantsho mo go tsebe 19]

Go ka direga gore tshupanako eno e dirilwe mo masimologong a dingwaga tsa bo1800