Ke eng fa batho bano ba lebega ba itumetse jaana? Ba mo kopanong. Fela jaaka batlhanka ba Modimo ba nako e e fetileng, ba ba neng ba laelwa gore ba kopane mmogo gararo ka ngwaga, le rona re leba pele go kopana mmogo re le ditlhopha tse dikgolo. (Duteronome 16:16) Ngwaga le ngwaga re nna le dikopano tse tharo: dikopano tsa potologo di le pedi tsa letsatsi le le lengwe le kopano ya tikologo ya malatsi a le mararo. Dikopano tseno di re solegela molemo jang?

Di nonotsha bokaulengwe jwa rona jwa Bokeresete. Fela jaaka Baiseraele ba ne ba itumelela go baka Jehofa “fa gare ga boidiidi jo bo phuthegileng,” le rona re itumelela go obamela Jehofa mmogo kwa dikokoanong tse di kgethegileng. (Pesalema 26:12; 111:1) Dikokoano tseno di re naya tshono ya go kopana le go tsalana le Basupi ba ba tswang kwa diphuthegong le kwa dinageng tse dingwe. Motshegare re itumelela dijo mmogo kwa lefelong la kopano, e leng selo se se dirang gore dikokoano tseno di itumedise le go feta. (Ditiro 2:42) Fa re le koo, re kgona go iponela lorato lwa mmatota lo lo kopanyang “bakaulengwe botlhe” mo lefatsheng.—1 Petere 2:17.

Di re thusa go gola semoyeng. Baiseraele le bone ba ne ba solegelwa molemo ka gonne ba “tlhalogantse mafoko” a Dikwalo tse ba neng ba di tlhalosediwa. (Nehemia 8:8, 12) Le rona re anaanela thuto ya Baebele e re e newang kwa dikopanong tsa rona. Thulaganyo nngwe le nngwe e na le setlhogo se se theilweng mo Dikwalong. Dipuo tse di agang, dipuo tsa neeletsano le dipontsho di re ruta kafa re ka dirang thato ya Modimo ka teng mo botshelong jwa rona. Go utlwa maitemogelo a bakaulengwe ba ba ileng ba fenya dikgwetlho tsa go tshela e le Bakeresete mo dinakong tseno tsa mathata go a re kgothatsa. Kwa dikopanong tsa tikologo, go nna le diterama tse di dirang gore dipego tse di mo Baebeleng e nne tsa mmatota mo go rona e bile di re ruta dithuto tse di ka re solegelang molemo. Kwa kopanong nngwe le nngwe botlhe ba ba batlang go bontsha boineelo jwa bone mo Modimong ba a kolobediwa.

• Ke ka ntlha yang fa dikopano e le dinako tse di itumedisang?

• O ka solegelwa molemo jang ke go nna gone kwa kopanong?