Fetela kwa tshedimosetsong

Fetela go diteng

 KAROLO 2

Rebeka O ne A Batla go Itumedisa Jehofa

Rebeka O ne A Batla go Itumedisa Jehofa

Rebeka e ne e le mosadi yo o neng a rata Jehofa. Leina la monna wa gagwe e ne e le Isake. Le ene o ne a rata Jehofa. Rebeka o ne a kopana jang le Isake? Rebeka o ne a bontsha jang gore o ne a batla go itumedisa Jehofa? A re ithute ka ene.

Batsadi ba ga Isake e ne e le Aborahame le Sara. Ba ne ba nna kwa nageng ya Kanana, kwa batho ba neng ba sa obamele Jehofa gone. Mme Aborahame o ne a batla gore morwawe a nyale mosadi yo o obamelang Jehofa. Ka jalo, o ne a roma motlhanka wa gagwe, yo gongwe a neng a bidiwa Eliasare, gore a ye go batlela Isake mosadi kwa lefelong le le bidiwang Harane, kwa bangwe ba losika lwa ga Aborahame ba neng ba nna gone.

Rebeka o ne a batla go dira ka natla go gela dikamela metsi

Eliasare o ne a tsamaya le batlhanka ba bangwe ba ga Aborahame. E ne e le loeto lo loleele. Ba ne ba tsamaya ka dikamela di le lesome di rwele dijo le dimpho. Eliasare o ne a tla itse jang gore a tlhophele Isake mosadi ofe? Fa Eliasare le batlhanka ba bangwe ba fitlha kwa Harane, ba ne ba ema kwa sedibeng, ka gonne Eliasare o ne a itse gore batho ba tla tloga ba tla go ga metsi. O ne a rapela Jehofa mme a re: ‘Fa ke kopa morweetsana mongwe gore a nnose metsi mme a bo a nosa nna le dikamela tsa me metsi, ke tla itse gore mosadi yono ke ene yo o mo tlhophileng.’

 Rebeka yo mosha o ne a tla kwa sedibeng. Baebele ya re o ne a le montle thata. Eliasare o ne a mo kopa metsi a go nwa mme o ne a re: ‘Ee. Ke tla go gelela metsi ke bo ke gelela le dikamela tsa gago metsi.’ Akanya fela! Dikamela tse di nyorilweng di nwa metsi a mantsi, ka jalo, Rebeka o ne a tshwanetse go tabogela kwa sedibeng gantsi. A o bona gore o bereka thata jang mo setshwantshong seno?— Eliasare o ne a gakgamala go bona kafa Jehofa a arabileng thapelo ya gagwe ka teng.

Eliasare o ne a naya Rebeka dimpho tse dintsi tse dintle. Rebeka o ne a laletsa Eliasare le batlhanka ba bangwe gore ba tle kwa ntlong ya batsadi ba gagwe. Eliasare o ne a tlhalosa gore ke ka ntlha yang fa Aborahame a mo rometse koo le gore Jehofa o ne a araba jang thapelo ya gagwe. Ba lelapa la gaabo Rebeka ba ne ba dumela gore a nyalane le Isake.

Rebeka o ne a ya Kanana le Eliasare mme a nyalana le Isake

A o akanya gore Rebeka o ne a batla go nyalwa ke Isake?— Rebeka o ne a itse gore Jehofa ke ene a rometseng Eliasare koo. Ka jalo, fa ba lelapa la ga Rebeka ba mmotsa gore a o batla go ya kwa Kanana go ya go nyalana le Isake, o ne a re: ‘Ee, ke batla go ya.’ Ka yone nako eo, o ne a tsamaya le Eliasare. Fa ba fitlha kwa Kanana, ene le Isake ba ne ba nyalana.

E re ka Rebeka a ne a dira se Jehofa a neng a batla gore a se dire, Jehofa o ne a mo segofatsa. Dingwaga di le dintsi moragonyana, Jesu o ne a tsholelwa mo lelapeng la gagwe! Fa o tshwana le Rebeka mme o itumedisa Jehofa, le wena o tla go segofatsa.

BALA MO BAEBELENG YA GAGO