Fa Jesu le barutwa ba gagwe ba tswa mo Galalea, ba kgabaganya Noka ya Joredane ba bo ba ralala Perea ba ya kwa borwa. Fa a ne a le mo Perea mo nakong e e fetileng, o ne a bolelela Bafarasai molao wa Modimo o o amanang le tlhalo. (Luke 16:18) Jaanong ba tsosa kgang eo gape ba mo leka.

Moshe o ne a kwala gore mosadi a ka tlhalwa fa go na le “sengwe se se sa siamang” mo go ene. (Duteronome 24:1) Go na le dikgopolo tse di farologaneng tse di amanang le mabaka a go tlhala. Bangwe ba dumela gore motho a ka tlhala ka ntlha ya dikgang tse di sa reng sepe fela. Ka jalo, Bafarasai ba botsa Jesu ba re: “A molao o letlelela monna gore a tlhale mosadi wa gagwe ka lebaka lengwe le lengwe fela?”—Mathaio 19:3.

Go na le gore Jesu a dirise dikgopolo tsa batho, o ba araba ka botlhale a tlhalosa boikaelelo jwa Modimo ka lenyalo. A re: “A ga lo ise lo bale gore go tswa kwa tshimologong Modimo o ne a bopa monna le mosadi a bo a re: ‘Ka lebaka leno, monna o tla tlogela rraagwe le mmaagwe mme o tla ngaparela mosadi wa gagwe, mme batho bano ba babedi ba tla nna nama e le nngwe’? Mo e leng gore ga ba tlhole ba le babedi, mme ke nama e le nngwe. Ka jalo, se Modimo a se kopantseng, a motho ope a se ka a se kgaoganya.” (Mathaio 19:4-6) Fa Modimo a ne a nyadisa Adame le Efa, o ne a sa rulaganya gore ba ka fedisa lenyalo leo la bone.

Bafarasai ba ganetsa Jesu, ba re: “Jaanong ke ka ntlha yang fa Moshe a ne a laela gore monna a neele mosadi lekwalo la tlhalo a bo a mo tsamaisa?” (Mathaio 19:7) Jesu o ba raya a re: “Moshe o ne a lo dumelela gore lo tlhale basadi ba lona, ka gonne o ne a akanyetsa dipelo tsa lona tse di thata, mme go ne go sa nna jalo go tswa kwa tshimologong.” (Mathaio 19:8) Lefoko “tshimologong” ga le reye ka nako ya ga Moshe; le raya fa Modimo a ne a simolola thulaganyo ya lenyalo kwa Edene.

Go tswa foo Jesu o bua ntlha eno ya botlhokwa: “Ke lo raya ke re ope fela yo o tlhalang mosadi wa gagwe, mme mosadi wa gagwe a sa dira boitsholo jo bo sa siamang jwa tlhakanelodikobo, [ka Segerika, por·neiʹa], a bo a nyala mosadi yo mongwe, o dira boaka.” (Mathaio 19:9) Ka jalo, boitsholo jo bo sa siamang jwa tlhakanelodikobo, ke jone fela lebaka la go tlhala le le tlhalosiwang mo Dikwalong.

Seno se dira gore barutwa ba bue jaana: “Fa e le gore go ntse jalo ka monna le mosadi wa gagwe, go tla bo go se botlhale go nyala.” (Mathaio 19:10) Ka jalo, motho yo o akanyetsang go nyala kgotsa go nyalwa, o tshwanetse a bo a itse gore eno ke thulagayo e e nnelang ruri!

Fa Jesu a bua ka go nyala le go sa nyalwe, o tlhalosa gore batho bangwe ba tsholwa e le baopafadiwa, ba se na keletso ya go tlhakaneladikobo. Ba bangwe ba dirilwe baopafadiwa ke batho gore dirwe tsa bone tsa tsalo di se ka tsa bereka. Mme ba bangwe bone ba itlhokomolosa keletso e ba nang le yone ya go itumelela tlhakanelodikobo. Ba dira jalo gore ba kgone go tlhoma mogopolo mo dilong tse di direlwang Bogosi. Jesu o rotloetsa bareetsi ba gagwe jaana: “A yo o kgonang go tshela [a sa nyala kgotsa a sa nyalwa] a dire jalo.”—Mathaio 19:12.

Jaanong batho ba simolola go tlisa bana ba bone ba bannye kwa go Jesu. Le fa go ntse jalo, barutwa ba kgalemela batho bao, gongwe e le ka gonne ba sa batle gore ba tshwenye Jesu. Fa Jesu a bona seno o a galefa a bo a ba raya a re: “Tlogelang bana ba bannye bano ba tle kwa go nna; lo se ka lwa leka go ba thibela, ka gonne Bogosi Jwa Modimo ke jwa ba ba ntseng jalo. Ammaaruri ke a lo bolelela, ope fela yo o sa amogeleng Bogosi Jwa Modimo jaaka ngwana yo monnye yo o amogelang dilo tse a di newang, ga a kitla a tsena mo go jone gotlhelele.”—Mareko 10:14, 15; Luke 18:15.

Ruri eno ke thuto e e molemo! Fa re batla go amogela Bogosi Jwa Modimo, re tshwanetse go nna boikokobetso le go rutega jaaka bana ba bannye. Jesu o bontsha gore o rata bana bano ka go ba kuka le go ba segofatsa. Mme gone o rata batho botlhe ba ba ‘amogelang Bogosi Jwa Modimo jaaka ngwana yo monnye.’—Luke 18:17.