Fetela kwa tshedimosetsong

Fetela go diteng

 THUTO 38

Lebogela Mpho ya Botshelo

Lebogela Mpho ya Botshelo

Go na le dilo di le dintsi tse di kgatlhang tse re ka di dirang, le tse re ka di itumelelang ka gonne re tshela. Le fa gone re nna le mathata, re ka kgona go itumelela dikarolo tse dingwe tsa botshelo. Re ka bontsha jang gore re lebogela mpho ya botshelo? Mme lebaka la botlhokwa thata la go dira jalo ke lefe?

1. Ke eng fa re tshwanetse go lebogela botshelo?

Re tshwanetse go lebogela botshelo ka gonne ke mpho e Rraarona yo o lorato e bong Jehofa, a re fileng yone. Ke “motswedi wa botshelo,” tota ke ene a bopileng sengwe le sengwe se se tshelang. (Pesalema 36:9) “Ene ka boene o naya batho botlhe botshelo le mohemo le dilo tsotlhe.” (Ditiro 17:25, 28) Jehofa o re naya sengwe le sengwe se re se tlhokang gore re tswelele re tshela. Mme gape o dira gore re kgone go itumelela botshelo.—Bala Ditiro 14:17.

2. Re ka bontsha Jehofa jang gore re lebogela mpho ya botshelo?

Go tloga fela fa mmê wa gago a ne a go ima, Jehofa o ne a go tlhokomela. Motlhanka wa Modimo e bong Dafide, o ne a bua jaana a tlhotlhelediwa ke Modimo: “Matlho a gago a ne a mpona ke sa ntse ke le losea lo lo mo popelong.” (Pesalema 139:16) Jehofa o tsaya botshelo jwa gago bo le tlhwatlhwakgolo. (Bala Mathaio 10:29-31.) Fa mongwe a ka fedisa botshelo jwa yo mongwe ka boomo kgotsa jwa gagwe, seo se ka utlwisa Modimo botlhoko fela thata. * (Ekesodo 20:13) Gape Jehofa o utlwa botlhoko fa re tsenya matshelo a rona mo kotsing go sa tlhokege, kgotsa re sa tseye ditlhagiso tsia gore re sireletse matshelo a ba bangwe. Fa re tlhokomela botshelo jwa rona e bile re sireletsa matshelo a ba bangwe, re bontsha gore re lebogela mpho eno e e kgatlhang thata ya botshelo.

 ITHUTE MO GO OKETSEGILENG

Ela tlhoko ditsela tse dingwe tse o ka bontshang ka tsone gore o lebogela mpho ya botshelo.

3. Tlhokomela botsogo jwa gago

Batho ba ba ineetseng mo go Jehofa ba dirisa botshelo jotlhe jwa bone go mo direla. Go ntse jaaka e kete ba mo ntshetsa setlhabelo ka mebele ya bone. Bala Baroma 12:1, 2, lo bo lo tlotla ka dipotso tseno:

  • Ke eng se se tshwanetseng go go tlhotlheletsa go tlhokomela botsogo jwa gago?

  • O ka dira seo ka ditsela dife?

4. Nna kelotlhoko fa o dira sepe fela gore ope a se ka a gobala kgotsa a swa

Baebele e re kgothaletsa gore re se ka ra dira dilo tse di ka re tsenyang mo kotsing. Tshameka BIDIO eno mme o ithute dilo dingwe tse o ka di dirang gore o nne o sireletsegile.

Bala Diane 22:3, go tswa foo lo bo lo tlotla ka kgang ya gore wena le ba bangwe lo ka nna lo sireletsegile jang . . .

  • mo lelapeng.

  • kwa tirong.

  • fa o tshameka.

  • fa o kgweetsa koloi kgotsa o le mo go yone.

 5. O se ka wa fedisa botshelo jwa ngwana yo a iseng a tsholwe

Dafide o ne a tlhalosa gore Jehofa o kgatlhegela sengwe le sengwe se se diregang fa ngwana a ntse a gola mo popelong ya ga mmaagwe. Bala Pesalema 139:13-17, lo bo lo tlotla ka potso eno:

  • Go ya ka Jehofa, a botshelo jwa motho bo simologa fa a tsholwa kgotsa fa mmaagwe a mo ima?

Melao e Jehofa a neng a e file Baiseraele ba bogologolo, e ne e sireletsa bommê le bana ba bone ba ba iseng ba tsholwe. Bala Ekesodo 21:22, 23, lo bo lo tlotla ka dipotso tseno:

  • Jehofa o ne a leba jang motho yo o fedisang botshelo jwa ngwana yo a iseng a tsholwe ka phoso?

  • A ka ikutlwa jang fa mongwe a dira jalo ka boomo? *

  • Wena o ikutlwa jang ka tsela e Modimo a lebang kgang eno ka yone?

Tshameka BIDIO eno.

Tota le mosadi yo o lemogang gore botshelo bo botlhokwa, a ka nna a akanya gore go ntsha mpa ke gone fela tharabololo. Bala Isaia 41:10, lo bo lo tlotla ka dipotso tseno:

  • Fa mosadi a patelediwa go ntsha mpa, o tshwanetse go kopa thuso kwa go mang? Goreng o rialo?

BATHO BANGWE BA RE: “Mosadi o na le tshwanelo ya go itlhophela gore a o batla go ntsha mpa kgotsa jang. Ke mmele wa gagwe.”

  • Ke eng se se go tlhomamisetsang gore Jehofa o tsaya botshelo jwa mmê le jwa ngwana wa gagwe yo a iseng a tsholwe bo le botlhokwa thata?

 O ITHUTILE ENG?

Baebele e re ruta gore re rate mpho ya botshelo e Jehofa a re e fileng, re e tlotle re bo re e sireletse. Seno se akaretsa botshelo jwa rona le matshelo a batho ba bangwe.

Poeletso

  • Ke eng fa Jehofa a tsaya botshelo jwa motho bo le botlhokwa thata?

  • Jehofa o ikutlwa jang fa motho a bolaya yo mongwe ka boomo?

  • Ke eng se o se lebogelang ka mpho ya botshelo?

Leka go Dira Seno

DINTLHA TSE DINGWE

Re ka bontsha Jehofa jang gore re lebogela mpho ya botshelo?

Pina 141—Kgakgamatso ya Botshelo (2:41)

Bona karabo ya potso e e reng, A Modimo a ka itshwarela mosadi yo o kileng a ntsha mpa?

“Baebele e a Reng ka go Ntsha Mpa?” (Setlhogo se se mo website)

Ithute gore tsela e Modimo a lebang botshelo ka yone e tshwanetse go ama jang boitlosobodutu jo re bo tlhophang.

“‘Metshameko e e Feteletseng’—A o Tshwanetse go Itsenya mo Kotsing?” (Tsogang!, October 8, 2000)

Go tweng fa motho a na le maikutlo a go batla go ipolaya? Bona gore Baebele e ka mo thusa jang.

“Ke Batla go Swa—A Baebele e ka Nthusa Fa ke Na le Maikutlo a go Batla go Ipolaya?” (Setlhogo se se mo website)

^ ser. 7 Jehofa o amega thata ka batho ba ba pelo e phatlogileng. (Pesalema 34:18) O tlhaloganya maikutlo a a utlwisang botlhoko a a dirang gore batho ba batle go ipolaya, e bile o batla go ba thusa. Fa o batla go bona gore thuso ya gagwe e ka thusa jang motho yo o nang le maikutlo ao gore a a fenye, bala setlhogo se se reng “Ke Batla go Swa—A Baebele e ka Nthusa Fa ke Na le Maikutlo a go Batla go Ipolaya?” se se tlhagang mo karolong ya Dintlha Tse Dingwe mo thutong eno.

^ ser. 27 Batho ba ba kileng ba ntsha mpa ga ba a tshwanela go ikutlwa ba le molato. Jehofa a ka ba itshwarela. Fa o batla go bona tshedimosetso e e oketsegileng, bala setlhogo se se reng “Baebele e a Reng ka go Ntsha Mpa?” se se mo karolong ya Dintlha Tse Dingwe mo thutong eno.