Fetela kwa tshedimosetsong

Fetela go diteng

 THUTO 31

Bogosi Jwa Modimo ke Eng?

Bogosi Jwa Modimo ke Eng?

Molaetsa wa botlhokwa thata o Baebele e buang ka one ke Bogosi Jwa Modimo. Jehofa o tla dirisa Bogosi joo go diragatsa boikaelelo jwa gagwe jwa go dira lefatshe paradaise. Bogosi ke eng? Re itse jang gore bo a busa gone jaanong? Bo setse bo dirile eng? Mme gone, bo tlile go dira eng mo nakong e e tlang? Thuto eno le tse pedi tse di latelang di tla araba dipotso tseno.

1. Bogosi Jwa Modimo ke eng, mme Kgosi ya jone ke mang?

Bogosi Jwa Modimo ke puso e e tlhomilweng ke Jehofa Modimo. Kgosi ya Bogosi joo ke Jesu Keresete, mme o busa a le kwa legodimong. (Mathaio 4:17; Johane 18:36) Fa Baebele e bua ka Jesu, e a re: “O tla busa . . . ka bosakhutleng e le Kgosi.” (Luke 1:32, 33) E re ka Jesu e le Kgosi ya Bogosi Jwa Modimo, o tla busa batho botlhe mo lefatsheng.

2. Ke bomang ba ba busang le Jesu?

Jesu ga a buse a le esi. Batho ba ba tswang “mo ditsong tsotlhe, mo dipuong tsotlhe, mo merafeng yotlhe le mo ditšhabeng tsotlhe . . . ba tla busa lefatshe e le dikgosi.” (Tshenolo 5:9, 10) Ke batho ba ba kae ba ba tla busang le Keresete? Fa e sa le Jesu a tla mo lefatsheng, Bakeresete ba le dimilione ba ile ba nna balatedi ba gagwe. Mme ke ba le 144 000 fela ba ba yang legodimong go ya go busa le ene. (Bala Tshenolo 14:1-4.) Bakeresete ba bangwe botlhe mo lefatsheng ba tla busiwa ke Bogosi joo.—Pesalema 37:29.

3. Bogosi Jwa Modimo bo gaisa dipuso tsa batho ka ditsela dife?

Le fa gone babusi ba lefatshe ba leka go dira dilo tse di molemo, ga ba na maatla a go dira dilo tsotlhe tse ba eletsang go di dira. Fa nako e ntse e ya, go busa babusi ba bangwe mo boemong jwa bone, ba le bone ba ka tswang ba sa kgathalele batho. Mme Mmusi wa Bogosi Jwa Modimo e bong Jesu ene, ga a kitla a emisediwa ke motho ope. Modimo o tlhomile “bogosi jo bo se kitlang bo senngwa.” (Daniele 2:44) Jesu o tla busa lefatshe lotlhe, mme ga a kitla a tlhaola ope. O lorato, o pelonomi e bile o rata tshiamiso, mme o tla ruta batho gore le bone ba ratane, ba bontshane bopelomoni e bile ba direle ba bangwe tshiamiso.—Bala Isaia 11:9.

 ITHUTE MO GO OKETSEGILENG

Ithute gore ke eng fa Bogosi Jwa Modimo bo le botoka go gaisa dipuso tsa batho.

4. Puso e e maatla e tla busa lefatshe lotlhe

Jesu Keresete o na le maatla a go busa go feta mmusi ope yo o kileng a busa. Bala Mathaio 28:18, lo bo lo tlotla ka potso eno:

  • Maatla a ga Jesu a go busa a farologana jang le a dipuso tsa batho?

Dipuso di nna di fetoga, e bile puso nngwe le nngwe e busa karolo e e rileng fela ya lefatshe. Go tweng ka Bogosi Jwa Modimo? Bala Daniele 7:14, lo bo lo tlotla ka dipotso tseno:

  • Ke eng fa go itumedisa go itse gore Bogosi Jwa Modimo “ga bo kitla bo senngwa”?

  • Ke eng fa go itumedisa go itse gore Bogosi Jwa Modimo bo tlile go busa lefatshe lotlhe?

5. Dipuso tsa batho di tshwanetse go fedisiwa

Ke eng fa Bogosi Jwa Modimo bo tshwanetse go fedisa dipuso tsa batho? Tshameka BIDIO eno, lo bo lo tlotla ka potso e e latelang.

  • Go ntse go diragala eng fa e sa le dipuso tsa batho di busa?

Bala Moreri 8:9, lo bo lo tlotla ka dipotso tseno:

  • A o akanya gore Bogosi Jwa Modimo bo tshwanetse go busa mo boemong jwa dipuso tsa batho? Goreng o rialo?

 6. Babusi ba Bogosi Jwa Modimo ba a re tlhaloganya

E re ka Kgosi ya rona e bong Jesu a kile a tshela mo lefatsheng, o kgona go re “utlwela botlhoko ka ntlha ya makoa a rona.” (Bahebera 4:15) Jehofa o tlhophile banna le basadi ba le 144 000 ba ba ikanyegang, ba ba tswang “mo ditsong tsotlhe, mo dipuong tsotlhe, mo merafeng yotlhe le mo ditšhabeng tsotlhe,” gore ba buse le Jesu.—Tshenolo 5:9.

  • A ga go go gomotse go itse gore Jesu le ba ba tla busang le ene, ba a itse gore go ntse jang go tshela mo lefatsheng? Goreng o rialo?

Jehofa o tlhophile banna le basadi ba ditso tse di farologaneng gore ba buse le Jesu

7. Melao ya Bogosi Jwa Modimo e gaisa melao ya dipuso tsa batho

Dipuso di dira melao e e thusang babusiwa ba tsone le go ba sireletsa. Bogosi Jwa Modimo le jone bo na le melao e babusiwa ba jone ba tshwanetseng go e ikobela. Bala 1 Bakorintha 6:9-11, lo bo lo tlotla ka dipotso tseno:

  • O akanya gore lefatshe le tla nna jang fa batho botlhe ba ikobela melao eno ya Modimo? *

  • A o akanya gore go a utlwala gore Jehofa a lebelele gore babusiwa ba Bogosi jwa gagwe ba ikobele melao eno? Goreng o rialo?

  • Ke eng se se bontshang gore batho ba ba sa ikobeleng melao eno ba ka fetoga?—Bona temana 11.

Dipuso di dira melao e e thusang babusiwa ba tsone le go ba sireletsa. Bogosi Jwa Modimo le jone bo na le melao e babusiwa ba jone ba tshwanetseng go e ikobela

MONGWE A KA BOTSA A RE: “Bogosi Jwa Modimo ke eng?”

  • O ka mo araba jang?

 O ITHUTILE ENG?

Bogosi Jwa Modimo ke puso ya mmatota e e kwa legodimong, mme bo tla busa lefatshe lotlhe.

Poeletso

  • Ke bomang ba ba tla busang mo Bogosing Jwa Modimo?

  • Bogosi Jwa Modimo bo gaisa dipuso tsa batho ka ditsela dife?

  • Ke dilo dife tse Jehofa a lebeletseng gore babusiwa ba Bogosi jwa gagwe ba di dire?

Leka go Dira Seno

DINTLHA TSE DINGWE

Utlwa gore Jesu o ile a re Bogosi Jwa Modimo bo kwa kae.

“A Bogosi Jwa Modimo bo mo Pelong ya Gago?” (Setlhogo se se mo website)

Goreng Basupi ba ga Jehofa ba tlhopha go tshegetsa Bogosi Jwa Modimo go na le jwa batho?

Go Tshegetsa Bogosi Jwa Modimo (1:43)

Ithute se Baebele e se tlhalosang ka ba ba 144 000 ba Jehofa a ba tlhophang gore ba buse le Jesu.

“Ke Bomang ba ba Yang Kwa Legodimong?” (Setlhogo se se mo website)

Mosadi mongwe yo o neng a le mo kgolegelong o ile a tlhatswiwa pelo ke eng gore Modimo ke ene fela a ka dirang gore go nne le tshiamiso mo lefatsheng?

“Kafa ke Boneng Tharabololo ya Tshiamololo ka Teng” (Tsogang!, November 2011)

^ ser. 29 Re tla tlotla ka mengwe ya melao eno mo Karolo 3.