Fetela kwa tshedimosetsong

Fetela go diteng

 THUTO 23

Kolobetso e Botlhokwa Thata

Kolobetso e Botlhokwa Thata

Jesu o ile a re Bakeresete ba tshwanetse go kolobediwa. (Bala Mathaio 28:19, 20.) Mme gone, kolobetso ke eng? Fa motho a batla go kolobediwa o tshwanetse go dira eng?

1. Kolobetso ke eng?

Lefoko “kolobetsa” le tswa mo lefokong la Segerika le le kayang “go ina” mo metsing. Fa Jesu a ne a kolobediwa, o ile a tsenngwa mo Nokeng ya Joredane, mme go tswa foo, “a tswa mo metsing.” (Mareko 1:9, 10) Ka tsela e e tshwanang, fa Bakeresete ba boammaaruri ba kolobediwa, mmele wa bone otlhe o tshwanetse go tsenngwa mo metsing.

2. Kolobetso e kaya eng?

Fa motho a kolobediwa, o bontsha gore o ineetse mo go Jehofa Modimo. Mme gone, motho o ineela jang? Pele a kolobediwa, o rapela Jehofa a mmolelela gore o batla go mo direla botshelo jwa gagwe jotlhe. O solofetsa Jehofa gore o tla obamela ene fela e bile o tla dira gore thato ya gagwe e tle pele mo botshelong jwa gagwe. O a ‘iitatola a bo a latela’ dithuto tsa ga Jesu le sekao sa gagwe. (Mathaio 16:24) Fa a ineetse a bo a kolobediwa, o kgona go nna tsala ya ga Jehofa le badumedimmogo le ene.

3. O tshwanetse go dira eng fa o batla go kolobediwa?

Pele o kolobediwa, go botlhokwa gore o ithute ka Jehofa le gore o nne le tumelo mo go ene. (Bala Bahebera 11:6.) Fa tumelo ya gago le kitso ya gago di ntse di gola, o tla rata Jehofa le go feta. Go tswa foo, o tla batla go bolelela ba bangwe ka ene le go tshela ka melao ya gagwe. (2 Timotheo 4:2; 1 Johane 5:3) Fa o tshela ka tsela e e “itumedisang Jehofa,” o ka nna wa batla go ineela mo go ene o bo o kolobediwa.—Bakolosa 1:9, 10. *

 ITHUTE MO GO OKETSEGILENG

Bona gore re ka ithuta eng mo tseleng e Jesu a kolobeditsweng ka yone, le gore motho a ka dira eng fa a batla go kolobediwa.

4. Re ka ithuta mo kolobetsong ya ga Jesu

Bala Mathaio 3:13-17 gore o ithute mo go oketsegileng ka kolobetso ya ga Jesu. Go tswa foo, lo bo lo tlotla ka dipotso tseno:

  • A Jesu e ne e le losea fa a kolobediwa?

  • Jesu o ile a kolobediwa jang? A o ile a kgatšhiwa fela ka metsi?

Jesu o ile a simolola go dira tiro e Modimo a mo neileng yone fa a sena go kolobediwa. Bala Luke 3:21-23 le Johane 6:38, lo bo lo tlotla ka potso eno:

  • Fa Jesu a sena go kolobediwa, ke tiro efe e e neng e le botlhokwa thata mo botshelong jwa gagwe?

5. O ka kgona go kolobediwa

Gongwe o ka tswa o tshoga fa o akanya ka go ineela le go kolobediwa. Mme fa nako e ntse e tsamaya, o ka fenya maikutlo ao o bo o dira tshwetso ya go kolobediwa. Fa o batla go bona bangwe ba ba ileng ba fenya maikutlo ao, tshameka BIDIO eno.

Bala Johane 17:3 le Jakobe 1:5, lo bo lo tlotla ka potso eno:

  • Ke eng se se ka thusang motho gore a tshwanelege go kolobediwa?

  1. Re ineela mo go Jehofa ka go mo rapela, re mmolelela gore re batla go mo direla botshelo jotlhe

  2. Fa re kolobediwa, re bontsha batho gore re ineetse mo go Jehofa

 6. Fa o kolobediwa o nna karolo ya lelapa la ga Jehofa

Fa o kolobediwa, o nna karolo ya lelapa la Basupi ba ga Jehofa ba ba mo lefatsheng lotlhe. Le fa gone re tswa mo mafelong a a farologaneng e bile re godile ka ditsela tse di farologaneng, re dumela dithuto tse di tshwanang e bile re tshela ka melao e e mo Baebeleng. Bala Pesalema 25:14 le 1 Petere 2:17, lo bo lo tlotla ka potso eno:

  • Kolobetso e ama jang botsala jwa motho le Jehofa le Bakeresetemmogo le ene?

BATHO BANGWE BA RE: “Ga ke ise ke siamele go kolobediwa.”

  • Fa e le gore o ikutlwa jalo, a o akanya gore go kolobediwa ke selo se se molemo?

 O ITHUTILE ENG?

Jesu o ile a re Bakeresete ba tshwanetse go kolobediwa. Fa motho a batla go kolobediwa, o tshwanetse go nna le tumelo mo go Jehofa, a tshele ka melao ya gagwe e bile a ineele mo go ene.

Poeletso

  • Kolobetso ke eng, mme goreng e le botlhokwa?

  • Go ineela le go kolobediwa go kaya eng?

  • Ke eng se o tlhokang go se dira gore o kolobediwe?

Leka go Dira Seno

DINTLHA TSE DINGWE

Bona gore motho a ka dira eng gore a tshwanelege go kolobediwa.

“Go Rata Jehofa go Tla go Tlhotlheletsa Gore o Kolobediwe” (Tora ya Tebelo, March 2020)

Utlwa gore monna mongwe o ile a tlhotlhelediwa ke eng gore a dire tshwetso ya go kolobediwa.

“Ba ne ba Batla Gore ke Iponele Boammaaruri” (Tora ya Tebelo, February 1, 2013)

Bona gore ke eng fa go kolobediwa go le botlhokwa, le gore o ka ipaakanyetsa jang go kolobediwa.

“A ke Kolobediwe?” (Dipotso Tse Basha ba di Botsang—Dikarabo Tse di Nang le Tharabololo, Bolumo 2, kgaolo 37)

^ ser. 9 Fa motho a ne a kolobeditswe kwa kerekeng ya gagwe ya pele, o tshwanetse go kolobediwa gape. Goreng? Ka gonne kereke eo e ne e sa mo rute boammaaruri jo bo mo Baebeleng.—Bona Ditiro 19:1-5 le Thuto 13.