Fetela kwa tshedimosetsong

Fetela go diteng

 THUTO 21

Dikgang Tse di Molemo di Rerwa Jang?

Dikgang Tse di Molemo di Rerwa Jang?

Jehofa o tlile go dirisa Bogosi jwa gagwe go fedisa mathata otlhe a re nang le one. Dikgang tseno di botlhokwa thata mo re sa kgoneng go didimala fela re sa di bolelele ba bangwe. Jesu o ne a batla gore balatedi ba gagwe ba bolelele batho dikgang tseno. (Mathaio 28:19, 20) Basupi ba ga Jehofa ba dira eng go bontsha gore ba ikobela taelo eno ya ga Jesu?

1. Mathaio 24:14 e diragadiwa jang gompieno?

Jesu o ile a re: “Dikgang tseno tse di molemo tsa Bogosi di tla rerelwa batho ba ba mo lefatsheng lotlhe.” (Mathaio 24:14) Basupi ba ga Jehofa ba itumelela go dira tiro eno e e botlhokwa. Re rera dikgang tse di molemo mo lefatsheng lotlhe ka dipuo di feta 1 000! Tiro eno e kgolo e tlhoka go tseelwa matsapa le go rulaganngwa sentle. Re ne re ka se kgone go e dira fa re ne re sa thusiwe ke Jehofa.

2. Re dira maiteko afe gore re kgone go rerela batho?

Re rera gongwe le gongwe kwa re fitlhelang batho gone. Fela jaaka Bakeresete ba bogologolo, re rera “ka ntlo le ntlo.” (Ditiro 5:42) Seno se dira gore re kgone go bua le batho ba le dimilione ngwaga le ngwaga. Re rera le kwa mafelong a le mantsi a re ka fitlhelang batho kwa go one, ka gonne ka dinako tse dingwe ga re fitlhele batho kwa magaeng a bone. Re nna re batla ditshono tsa go bolelela batho ka Jehofa le ka se a se ikaeletseng.

3. Ke bomang ba ba tshwanetseng go rera dikgang tse di molemo?

Bakeresete botlhe ba boammaaruri ba tshwanetse go rerela batho ba bangwe dikgang tse di molemo. Re tsaya boikarabelo jono bo le masisi tota. Re dira sotlhe se re ka se kgonang gore re rere, ka gonne re a itse gore seno se ka boloka matshelo a batho. (Bala 1 Timotheo 4:16.) Ga re duelelwe go dira tiro eno ka gonne Baebele e a re: “Lo ne lwa amogela mahala, nayang mahala.” (Mathaio 10:7, 8) Ga se batho botlhe ba ba reetsang molaetsa wa rona. Mme gone re tswelela re rera ka gonne re ikobela Jehofa e bile re batla go mo itumedisa.

 ITHUTE MO GO OKETSEGILENG

Ithute gore Basupi ba ga Jehofa ba rera jang mo lefatsheng lotlhe, mme o bone gore Jehofa o re thusa jang.

4. Re leka ka natla go rerela batho botlhe

Basupi ba ga Jehofa ba tsaya matsapa a magolo go rerela batho gongwe le gongwe. Tshameka BIDIO eno, lo bo lo tlotla ka potso e e latelang.

  • Ke eng se se go kgatlhang ka matsapa a Basupi ba ga Jehofa ba a tsayang gore ba rere?

Bala Mathaio 22:39 le Baroma 10:13-15, lo bo lo tlotla ka dipotso tseno:

  • Tiro ya rona ya go rera e bontsha jang gore re rata baagelani ba rona?

  • Jehofa o ikutlwa jang ka batho ba ba rerang dikgang tse di molemo?—Bona temana 15.

 5. Re dira mmogo le Modimo

Go na le bosupi bo le bontsi jo bo bontshang gore Jehofa o kaela tiro eno. Ka sekai, mokaulengwe mongwe yo o bidiwang Paul yo o nnang kwa New Zealand, o ile a kopana le mosadi mongwe fa a rera ka ntlo le ntlo motshegare. Mo mosong oo, mosadi yoo o ile a rapela a dirisa leina la Modimo e bong Jehofa, mme a rapelela gore mongwe a mo etele. Paul a re: “Diura di le tharo moragonyana, ke ne ka etela mosadi yoo.”

Bala 1 Bakorintha 3:9, lo bo lo tlotla ka potso eno:

  • Se se diragetseng kwa New Zealand se bontsha jang gore Jehofa o kaela tiro ya go rera?

Bala Ditiro 1:8, lo bo lo tlotla ka potso eno:

  • Goreng re tlhoka thuso ya ga Jehofa gore re dire tiro ya go rera?

A o ne o itse?

Beke le beke kwa pokanong ya rona ya mo gare ga beke, re rutiwa gore re ka rerela batho jang. Fa e le gore o kile wa nna teng mo go nngwe ya dipokano tseno, o akanya eng ka thuto eo?

6. Re ikobela taelo ya Modimo ya gore re rere

Mo lekgolong la ntlha la dingwaga, batho ba ne ba leka go thibela balatedi ba ga Jesu gore ba se ka ba rera. Bakeresete ba bogologolo ba ile ba femela tshwanelo ya bone ya go rera ka ‘go iphemela mo balaoding gore ba rere.’ (Bafilipi 1:7) Le gompieno Basupi ba ga Jehofa ba dira se se tshwanang. *

Bala Ditiro 5:27-42, lo bo lo tlotla ka potso eno:

MONGWE A KA BOTSA A RE: “Goreng Basupi ba ga Jehofa ba rera ka ntlo le ntlo?”

  • O ka mo araba jang?

 O ITHUTILE ENG?

Jesu o ne a laela balatedi ba gagwe gore ba rere dikgang tse di molemo mo ditšhabeng tsotlhe. Jehofa o thusa batho ba gagwe gore ba dire tiro eno.

Poeletso

  • Dikgang tse di molemo di rerwa jang mo lefatsheng lotlhe?

  • Tiro ya rona ya go rera e bontsha jang gore re rata baagelani ba rona?

  • A o akanya gore tiro ya go rera e a re itumedisa? Goreng o rialo?

Leka go Dira Seno

DINTLHA TSE DINGWE

Bona gore Basupi ba ga Jehofa ba dira jang gore ba rerele batho mo ditoropong tse dikgolo.

Go Rera ka Dikolotsana mo Ditoropong Tse Dikgolo Kwa Paris (5:11)

Basupi ba ga Jehofa ba ile ba dira eng gore ba rerele batshabi?

Go Thusa Batshabi Gore ba Itse Boammaaruri ka Modimo (5:59)

Utlwa fa mosadi mongwe a tlhalosa kafa tiro ya go rera e mo itumedisang ka gone.

Ke Itumelela Gore Ke ne Ka Tlhopha Tiro Eno (6:29)

Ithute ka ditshwetso dingwe tsa botlhokwa tse kgotlatshekelo e neng ya di dira, tse di neng tsa dira gore go rera dikgang tse di molemo go nne motlhofo.

“Bareri ba Bogosi ba Isa Kgetsi ya Bone Kwa Kgotlatshekelong” (Bogosi Jwa Modimo bo a Busa!, kgaolo 13)

^ ser. 28 Modimo ke ene a re laelang gore re rere. Ka jalo, Basupi ba ga Jehofa ga ba tlhoke go newa tetla ke balaodi ba bagolo gore ba rere dikgang tse di molemo.