Fetela kwa tshedimosetsong

Fetela go diteng

 THUTO 17

Jesu ke Motho yo o Ntseng Jang?

Jesu ke Motho yo o Ntseng Jang?

Fa re ithuta ka dilo tse Jesu a neng a di bua le tse a neng a di dira fa a ne a le mo lefatsheng, re kgona go bona botho jwa gagwe jo bo dirang gore re kgone go nna ditsala tsa gagwe le ditsala tsa ga Rraagwe e bong Jehofa. O ne a na le botho jo bo ntseng jang? Re ka mo etsa jang?

1. Jesu o tshwana jang le Rraagwe?

O ile a fetsa dingwaga di le dintsi a le kwa legodimong a ithuta mo go Rraagwe. Mme seno se dirile gore a akanye, a ikutlwe e bile a dire dilo jaaka ene. (Bala Johane 5:​19.) Tota e bile, o ne a bontsha sentle botho jwa ga Rraagwe mo a ileng a re: “Ope fela yo o mponeng o bone le Rara.” (Johane 14:9) Fa o ntse o ithuta ka botho jwa ga Jesu, o tla itse Jehofa botoka. Ka sekai, tsela e Jesu a neng a kgathalela batho ka yone e bontsha gore Jehofa o go kgathalela go le kana kang.

2. Jesu o bontshitse jang gore o rata Jehofa?

Jesu o ne a re: “Gore lefatshe le itse gore ke rata Rara, ke dira fela jaaka Rara a ntaetse gore ke dire.” (Johane 14:​31) Fa a ne a le mo lefatsheng, o ile a bontsha gore o rata Rraagwe ka go mo ikobela le fa go dira jalo go ne go se motlhofo. Gape Jesu o ne a rata go bua ka Rraagwe le go thusa batho gore ba tshwanetse go dira eng gore ba nne ditsala tsa Gagwe.​—Johane 14:23.

3. Jesu o bontshitse jang gore o rata batho?

Baebele e a re Jesu o “rata batho fela thata.” (Diane 8:​31) O ile a bontsha seno ka go ba kgothatsa le go ba thusa. O ne a sa dire dikgakgamatso fela ka gonne a na le maatla, mme gape o ne a di dira go bontsha gore o pelotlhomogi. (Mareko 1:​40-​42) O ne a le bonolo mo bathong e bile a sa ba tlhaole. Mafoko a gagwe a ne a gomotsa e bile a naya batho ba ba neng ba mo reetsa tsholofelo. O ne a tlile go boga le go swa ka gonne a rata batho. Mme o rata thata batho ba ba reetsang dithuto tsa gagwe.​—Bala Johane 15:​13, 14.

 ITHUTE MO GO OKETSEGILENG

Ithute dintlha tse dingwe ka botho jwa ga Jesu. Gape ithute gore o ka nna jang motho yo o lorato le yo o ratang go aba jaaka ene.

4. Jesu o rata Rraagwe

Sekao sa ga Jesu se re bontsha gore re tshwanetse go rata Modimo jang. Bala Luke 6:​12 le Johane 15:​10; 17:​26. Fa lo sena go bala ditemana tseno, tlotlang ka potso eno:

  • Re ka etsa Jesu jang ka go rata Jehofa?

Jesu o ne a rata Rraagwe yo o kwa legodimong e bile o ne a mo rapela ka metlha

5. Jesu o kgathalela batho ba ba tlhokang thuso

Jesu o ne a baya dilo tse batho ba bangwe ba di tlhokang kwa pele ga tsa gagwe. Le fa a ne a lapile, o ne a dirisa nako le maatla a gagwe go thusa ba bangwe. Bala Mareko 6:​30-​44, lo bo lo tlotla ka dipotso tseno:

  • Mo pegong eno, Jesu o bontshitse jang gore o ne a kgathalela ba bangwe?​—Bona temana 31, 34, 41 le 42.

  • Ke eng se se neng se dira gore Jesu a thuse batho?​—Bona temana 34.

  • E re ka Jesu a etsa botho jwa ga Jehofa, seno se re bolelela eng ka Jehofa?

  • Re ka etsa sekao sa ga Jesu jang sa go kgathalela batho ba bangwe?

 6. Jesu o rata go aba

Le fa gone Jesu a ne a se na dilo tse dintsi, o ne a rata go abela batho ba bangwe. Jesu o batla gore le rona re abele ba bangwe. Bala Ditiro 20:​35, lo bo lo tlotla ka potso eno:

  • Jesu a re ke eng se se ka dirang gore re itumele?

Tshameka BIDIO eno, lo bo lo tlotla ka potso e e latelang.

  • Re ka abela batho ba bangwe ka ditsela dife le fa re se na dilo tse dintsi?

A o ne o itse?

Baebele e a re re rapele Jehofa re dirisa leina la ga Jesu. (Bala Johane 16:​23, 24.) Fa re dira jalo, re bontsha gore re lebogela se Jesu a re diretseng sone go re thusa go nna ditsala tsa ga Jehofa.

BATHO BANGWE BA RE: “Modimo ga a kgathale fa re boga.”

  • E re ka botho jwa ga Jesu bo tshwana le jwa ga Rraagwe, re itse jang gore dilo tse a di dirang di bontsha gore Jehofa o a re kgathalela?

 O ITHUTILE ENG?

Jesu o rata Jehofa, gape o rata le batho. Jesu o tshwana le Rraagwe, mme fa o ntse o ithuta ka ene o tla itse Jehofa le go feta.

Poeletso

  • Re ka bontsha jang gore re rata Jehofa fela jaaka Jesu a ne a dira?

  • Re ka bontsha jang gore re rata batho fela jaaka Jesu a ne a dira?

  • Ke eng se o se ratang thata ka botho jwa ga Jesu?

Leka go Dira Seno

DINTLHA TSE DINGWE

Bona dilo dingwe ka botho jwa ga Jesu tse re ka di etsang.

“Etsa Jesu . . .” (Jesu ke Tsela, Boammaaruri le Botshelo, tsebe 317)

Ithute gore ke eng fa re tshwanetse go rapela re dirisa leina la ga Jesu.

“Ke ka Ntlha Yang fa re Tshwanetse go Rapela mo Leineng la ga Jesu?” (Tora ya Tebelo, February 1, 2008)

Baebele e a reng ka tsela e Jesu a lebegang ka yone?

“Jesu O ne A Lebega Jang?” (Setlhogo se se mo website)

Re ka ithuta eng mo tseleng e Jesu a neng a tshwara basadi ka yone?

“Modimo o Tshwara Basadi ka Tlotlo le ka Seriti” (Tora ya Tebelo, September 1, 2012)