Fetela kwa tshedimosetsong

Fetela go diteng

 THUTO 15

Jesu ke Mang?

Jesu ke Mang?

Jesu ke mongwe wa batho ba ba itsegeng thata mo hisitoring. Batho ba le bantsi ba itse leina la ga Jesu mme ga ba itse go le gontsi ka ene, e bile ba na le dikakanyo tse di farologaneng tsa gore ke mang. Baebele e a re eng ka ene?

1. Jesu ke mang?

Jesu ke moengele yo o maatla yo o nnang kwa legodimong. Jehofa o ne a mmopa pele ga a bopa sengwe le sengwe. Ke gone ka moo Baebele e mmitsang “leitibolo la popo yotlhe.” (Bakolosa 1:​15) Baebele e bitsa Jesu e re ke ‘morwa yo o tshotsweng a le esi wa Modimo,’ ka gonne ke ene fela yo Jehofa a mmopileng ka boene. (Johane 3:​16) Jesu o ne a bereka le Rraagwe e bong Jehofa a mo thusa go bopa dilo tse dingwe tsotlhe. (Bala Diane 8:​30.) Jesu o itumelela botsala jwa gagwe le Jehofa. O bidiwa “Lefoko” ka gonne ke mmueledi yo o ikanyegang wa Modimo, e bile o isa melaetsa le ditaelo tsa Gagwe.​—Johane 1:​14.

2. Ke eng fa Jesu a ile a tla mo lefatsheng?

Dingwaga tse 2 000 tse di fetileng, Jehofa o ile a dira kgakgamatso. O ile a dirisa moya wa gagwe o o boitshepo go ntsha botshelo jwa ga Jesu kwa legodimong a bo a bo tsenya mo popelong ya lekgarebane lengwe le le bidiwang Marea. Mme seo se ne sa dira gore a kgone go tshela mo lefatsheng. (Bala Luke 1:​34, 35.) Jehofa o ne a romela Jesu mo lefatsheng gore a tle go nna Mesia kgotsa Keresete yo o solofeditsweng, le gore a boloke batho. * Dilo tsotlhe tse di mo Baebeleng tse Jehofa a ileng a di bolela pele ka Mesia, di ne tsa direga mo go Jesu. Seno se ne sa thusa batho gore ba itse gore Jesu e ne e le “Keresete, Morwa Modimo yo o tshelang.”​Mathaio 16:16.

3. Gone jaanong Jesu o kae?

Fa Jesu a sena go swa, Modimo o ne a mo tsosa e le moengele mme a boela kwa legodimong. Fa a le koo, “Modimo o ne a mmaya mo maemong a a kwa godimo.” (Bafilipi 2:9) Gone jaanong Jesu ke moengele yo o maatla, mme Jehofa ke ene fela yo o mo fetang ka maatla.

 ITHUTE MO GO OKETSEGILENG

Ithute mo go oketsegileng gore tota Jesu ke mang le gore ke eng fa go le botlhokwa go ithuta ka ene.

4. Jesu ga se Modimo Mothatayotlhe

Baebele e ruta gore le fa Jesu e le moengele yo o maatla kwa legodimong, o ikobela Modimo wa gagwe le Rraagwe e bong Jehofa. Ke eng fa re bua jalo? Tshameka BIDIO eno gore o bone gore Baebele e a re Jesu o farologana jang le Modimo.

Ditemana tse di latelang di re thusa go tlhaloganya gore Jehofa le Jesu ba amana jang. Bala ditemana tseno, go tswa foo lo bo lo tlotla ka dipotso tse di latelang:

Bala Luke 1:​30-​32.

  • Moengele o ile a tlhalosa jang tsela e Jesu le Jehofa Modimo “Mogodimodimo” ba amanang ka yone?

Bala Mathaio 3:​16, 17.

  • Fa Jesu a kolobediwa, lentswe le le neng le tswa kwa legodimong le ne le reng?

  • O akanya gore e ne e le lentswe la ga mang?

Bala Johane 14:28.

  • Ke mang yo mogolo e bile a na le taolo e ntsi? Rre kgotsa morwa?

  • Jesu o ne a bitsa Jehofa a re Rara. Seno se re ruta eng?

Bala Johane 12:49.

  • A Jesu o ne a akanya gore ene le Rraagwe ba a lekana? O akanya eng?

 5. Ke eng se se neng se bontsha gore Jesu ke Mesia?

Go na le boporofeti bo le bontsi mo Baebeleng jo bo buang ka Mesia. Modimo o ne a mo tlhopha gore a boloke batho. Boporofeti joo bo ne jwa thusa batho gore ba itse gore Mesia ke mang. Tshameka BIDIO eno gore o ithute ka boporofeti bongwe jo Jesu a ileng a bo diragatsa fa a ne a tla mo lefatsheng.

Bala boporofeti jono jo bo mo Baebeleng, go tswa foo lo bo lo tlotla ka dipotso tse di latelang:

Bala Mika 5:2 mme o bone gore Mesia o ne a tla tsholelwa kae. *

  • A boporofeti jono bo ne jwa diragadiwa fa Jesu a tsholwa?​—Mathaio 2:1.

Bala Pesalema 34:​20 le Sekarea 12:​10 gore o bone dintlha tse di tlhalosang gore Mesia o ne a tla swa jang.

  • A boporofeti jono bo ne jwa diragadiwa?​—Johane 19:​33-​37.

  • A o akanya gore Jesu ke ene a ka tswang a dirile gore boporofeti jono bo direge?

  • Seno se go bontsha eng ka Jesu?

6. Re solegelwa molemo fa re ithuta ka Jesu

Baebele e a re go botlhokwa go ithuta ka Jesu le seabe se a nang le sone. Bala Johane 14:6 le 17:3, lo bo lo tlotla ka potso eno:

  • Ke eng fa go le botlhokwa go ithuta ka Jesu?

Jesu o re buletse tsela ya gore re nne ditsala tsa Modimo. O ne a ruta boammaaruri ka Jehofa, e bile re ka kgona go tshela botshelo jo bo sa khutleng ka ntlha ya gagwe

BATHO BANGWE BA RE: “Basupi ba ga Jehofa ga ba dumele mo go Jesu.”

  • Wena o ne o ka araba jang?

 O ITHUTILE ENG?

Jesu ke moengele yo o maatla. Ke Morwa Modimo e bile ke Mesia.

Poeletso

  • Ke eng fa Jesu a bidiwa “leitibolo la popo yotlhe”?

  • Jesu o ne a dira eng pele a tla mo lefatsheng?

  • Re itse jang gore Jesu ke Mesia?

Leka go Dira Seno

DINTLHA TSE DINGWE

Ithute mo go oketsegileng gore re itse jang gore Jesu ke Mesia.

“A Jesu ke Ene a Diragaditseng Boporofeti jo bo Buang ka Mesia?” (Setlhogo se se mo website)

Bona gore a Baebele e ruta gore Modimo o ne a nna rraagwe Jesu ka tsela e batho ba nnang le bana ka yone.

“Goreng Jesu a Bidiwa Morwa Modimo?” (Setlhogo se se mo website)

Bona gore ke eng fa thuto ya gore go na le medimo e le meraro mo modimong a le mongwe e sa tswe mo Baebeleng.

“A Jesu ke Modimo?” (Tora ya Tebelo, April 1, 2009)

Bona gore botshelo jwa mosadi mongwe bo ile jwa fetoga jang fa a sena go ithuta gore Baebele e a reng ka Jesu.

“Mosadi wa Mojuda o Tlhalosa Lebaka la go Sekaseka Bodumedi Jwa Gagwe Sesha” (Tsogang! May 2013)

^ ser. 7 Thuto 26 le 27 di tla bontsha lebaka la go bo batho ba tlhoka go bolokwa le gore Jesu o re boloka jang.

^ ser. 30 Bala Ntlha e e Kwa Bofelong ya 2 gore o bone boporofeti jo bo neng jwa bolelela pele gore Mesia o ne a tla tlhagelela leng mo lefatsheng.