Fetela kwa tshedimosetsong

Fetela go diteng

 THUTO 11

Go Bala Baebele Go ka Go Solegela Molemo Jang?

Go Bala Baebele Go ka Go Solegela Molemo Jang?

A o kile wa batla go simolola porojeke e kgolo e bile e le boima? Gongwe o ile wa e kgaoganya gore e nne motlhofo. Go ntse fela jalo le fa o bala Baebele. Mme gongwe o ka ipotsa gore, ‘Nka simolola jang porojeke eno e kgolo?’ Mo thutong eno, re tlile go tlotla ka dilo tse o ka di dirang tse di ka go thusang gore o itumelele go ithuta Baebele.

1. Goreng re tshwanetse go bala Baebele ka metlha?

Motho yo o balang Baebele kgotsa “molao wa ga Jehofa” ka metlha, o tla itumela e bile o tla atlega. (Bala Pesalema 1:​1-3.) O ka simolola ka go bala Baebele metsotso e se kae letsatsi le letsatsi. Fa o ntse o tlwaelana le go bala Lefoko la Modimo, o tla itumelela go le bala.

2. Ke eng se se tla re thusang gore re solegelwe molemo fa re bala Baebele?

Fa re batla gore Baebele e re solegele molemo, re tshwanetse go ema go se kae le go akanya ka se re se balang. Re tshwanetse go e bala re bo re “akanyetsa kwa teng ka yone.” (Joshua 1:​8, ntlha e e kwa tlase.) Fa o ntse o bala, ipotse dipotso tseno: ‘Seno se mpolelela eng ka Jehofa Modimo? Nka se dirisa jang mo botshelong jwa me? Nka dirisa ditemana tseno jang go thusa ba bangwe?’

3. O ka ipha leng nako ya go bala Baebele?

A o bona go le thata gore o iphe nako ya go bala Baebele? Bontsi jwa rona re bona go le thata. Leka go ‘dirisa nako ya gago sentle.’ (Baefeso 5:​16) O ka dira seno ka go beela nako kwa thoko letsatsi le letsatsi gore o kgone go bala Baebele. Batho ba bangwe ba bala Baebele mo mosong. Ba bangwe ba e bala motshegare, gongwe ka nako ya bone ya go ja dijo tsa motshegare. Mme ba bangwe bone ba e bala maitseboa pele ba robala. Wena o ka rata go e bala leng?

 ITHUTE MO GO OKETSEGILENG

Ithute gore o ka dira eng gore o itumelele go bala Baebele. Gape ithute gore o ka baakanyetsa jang gore thuto eno ya Baebele e go solegele molemo.

Fela jaaka re ka simolola go itumelela go ja dijo tse re sa di tlwaelang morago ga go di ja makgetlo a se kae, re ka ithuta go itumelela go bala Baebele

4. Ithute go itumelela go bala Baebele

Go ka tswa go se motlhofo go simolola go bala Baebele. Le fa go ntse jalo, o ka ithuta go itumelela go bala Baebele fela jaaka o ka simolola go itumelela go ja dijo tse o sa di tlwaelang morago ga go di ja makgetlo a se kae. Bala 1 Petere 2:​2, lo bo lo tlotla ka potso eno:

  • A o akanya gore fa o bala Baebele letsatsi le letsatsi, o ka feleletsa o itumelela go e bala le go batla go e bala mo go oketsegileng?

Tshameka BIDIO eno, mme o bone gore batho ba bangwe ba ile ba dira eng gore ba itumelele go bala Baebele. Go tswa foo, lo bo lo tlotla ka dipotso tse di latelang.

  • Mo bidiong eno, ke dikgwetlho dife tse basha ba ileng ba di fenya?

  • Ke eng se se ba thusitseng gore ba bale Baebele ka metlha?

  • Ba dirile eng gore ba kgone go itumelela go bala Baebele?

Dikakantsho tse di ka go thusang:

  • Tlhopha thanolo e e ikanngwang ya bosheng. Leka go bala Baebele ya Thanolo ya Lefatshe le Lesha fa e le gore e gone ka puo ya gago.

  • Simolola ka go bala dikarolo tse di go kgatlhang thata. Bona dikakantsho mo tšhateng e e reng “Simolola go Bala Baebele.”

  • Kwala se o setseng o se badile. Dirisa tšhate e e reng “Tshwaya fa o Badileng Gone” e e mo kgatisong eno.

  • Dirisa app ya JW Library®. Fa o na le yone, o ka kgona go bala kgotsa go reetsa Baebele o dirisa smart- phone kgotsa sedirisiwa se sengwe sa ileketeroniki.

  • Dirisa dintlha tse di oketsegileng tse di mo Baebeleng ya Thanolo ya Lefatshe le Lesha. Di na le dimmapa, ditšhate le Ditlhaloso Tsa Mafoko tse di ka go thusang go itumelela go bala Baebele le go feta.

 5. Baakanyetsa thuto ya gago ya Baebele

Bala Pesalema 119:​34, lo bo lo tlotla ka potso eno:

  • Goreng go le botlhokwa gore o rapele pele ga o bala Baebele kgotsa o baakanyetsa thuto ya Baebele?

O ka solegelwa molemo jang ke thuto nngwe le nngwe? Fa o ntse o baakanyetsa, leka go dira dintlha tseno:

  1. Bala dirapa tsa ntlha tse di simololang thuto.

  2. Bala ditemana mme o leke go tlhaloganya gore di amana jang le se o se balang.

  3. Tshwaya karabo ya potso nngwe le nngwe; seno se tla go thusa fa o tlotla le motho yo o go rutang.

A o ne o itse?

Basupi ba ga Jehofa ba dirisitse dithanolo tse di farologaneng tsa Baebele. Le fa go ntse jalo, re rata Baebele ya Thanolo ya Lefatshe le Lesha ka gonne e boammaaruri, e a utlwala, e bile e dirisa leina la Modimo.​—Bona setlhogo se se mo website se se reng A Basupi ba ga Jehofa Ba na Le Baebele ya Bone?

BATHO BANGWE BA RE: “Go bala Baebele go a lapisa. Ga ke na nako kgotsa maatla a go e bala.”

  • Wena o akanya eng?

 O ITHUTILE ENG?

Fa o batla gore Baebele e go solegele molemo, iphe nako ya go e bala, rapelela gore o kgone go e tlhaloganya e bile o baakanyetse thuto ya gago ya Baebele.

Poeletso

  • Ke eng se se tla go thusang gore o solegelwe molemo ke go bala Baebele?

  • Ke nako efe e e go siametseng gore o bale Baebele?

  • Goreng go le botlhokwa gore o baakanyetse thuto ya gago ya Baebele?

Leka go Dira Seno

DINTLHA TSE DINGWE

Bona dikakantsho tse dingwe tse di ka go thusang gore o solegelwe molemo ke go bala Baebele.

“Ditsela Tsa go Itumelela go Bala Baebele” (Tora ya Tebelo No. 1 2017)

Kopa dikakantsho mo bathong ba ba sa bolong go bala Baebele.

Go Ithuta Baebele o le Esi 2:​06