Fetela kwa tshedimosetsong

Fetela go diteng

 THUTO 8

Ke Eng fa Modimo a Letleletse Boikepo le Pogo?

Ke Eng fa Modimo a Letleletse Boikepo le Pogo?

1. Boikepo bo simologile jang?

Modimo o letlile batho go busa ka lobaka lo lo rileng e le go bontsha gore ga ba ka ke ba rarabolola mathata a batho

Boikepo bo ne jwa simologa mo lefatsheng fa Satane a ne a bua maaka a ntlha. Kwa tshimologong Satane e ne e le moengele yo o itekanetseng, mme “o ne a se ka a itsetsepela mo boammaaruring.” (Johane 8:44) O ne a simolola go nna le keletso ya go batla go obamelwa, e tota e tshwanetseng go newa Modimo a le nosi fela. Satane o ne a bolelela mosadi wa ntlha e bong Efa maaka, mme a mo tlhotlheletsa go mo ikobela go na le go ikobela Modimo. Adame o ne a kopanela le Efa mo go se utlweng Modimo. Tshwetso e Adame a ileng a e dira e ne ya felela ka pogo le loso.—Bala Genesise 3:1-6, 19.

Fa Satane a ne a tlhotlheletsa Efa gore a se ka a ikobela Modimo, o ne a simolola go tsuologela bolaodi jwa Modimo, kgotsa boemo jwa Modimo jwa go nna Mogodimodimo. Batho ba le bantsi ba setse Satane morago mme ga ba batle gore Modimo a nne Mmusi wa bone. Ka jalo, Satane ke ene “mmusi wa lefatshe.”—Bala Johane 14:30; 1 Johane 5:19.

2. A go ne go na le sengwe se se phoso ka popo ya Modimo?

Ditiro tsotlhe tsa Modimo di itekanetse. Batho le baengele ba Modimo a ba bopileng ba ne ba kgona go ikobela Modimo ka botlalo. (Duteronome 32:4, 5) Modimo o re bopile re na le kgololesego ya go itlhophela gore a re tla dira tshiamo kgotsa bosula. Kgololesego eo e re naya tshono ya go bontsha gore re rata Modimo.—Bala Jakobe 1:13-15; 1 Johane 5:3.

3. Ke eng fa Modimo a letleletse pogo go tla go fitlha jaanong?

Fa e sa le ka nako ya botsuolodi jwa kwa Edene, Jehofa o ntse a letlile bolaodi jwa gagwe bo tsuologelwa. Goreng? Go bontsha gore ga go na maiteko ape a go busa a a dirwang kwantle ga gagwe a a ka solegelang  batho molemo. (Moreri 7:29; 8:9) Morago ga dingwaga di le 6 000 motho a ntse a tshela, go a bonala gore motho ga a ka ke a kgona go ipusa. Dipuso tsa batho di paletswe ke go fedisa ntwa, bokebekwa, tshiamololo kgotsa bolwetse.—Bala Jeremia 10:23; Baroma 9:17.

Go farologana le dipuso tsa batho, puso ya Modimo e solegela batho ba ba e tlhophang molemo. (Isaia 48:17, 18) Go ise go ye kae, Jehofa o tla fedisa dipuso tsotlhe tsa batho. Batho ba ba tlhophang go busiwa ke Modimo ke bone fela ba ba tla nnang mo lefatsheng.—Isaia 11:9; Bala Daniele 2:44.

Leba bidio ya Goreng Modimo a sa Fedise Dilo Tse di Bosula?

4. Bopelotelele jwa Modimo bo re naya tshono ya go dira eng?

Satane o ile a re batho ba direla Jehofa ka mabaka a bopelotshetlha. A o ka kgona go bontsha gore seo ke maaka? Ee! Bopelotelele jwa Modimo bo re naya tshono ya go bontsha gore a re batla go busiwa ke puso ya Modimo kgotsa ya motho. Re bontsha seo ka tsela e re tshelang ka yone.—Bala Jobe 1:8-12; Diane 27:11.

5. Re ka bontsha jang gore re tlhopha Modimo go nna Mmusi wa rona?

Dilo tse re di tlhophang di bontsha gore a re batla Modimo a nna Mmusi wa rona

Re ka tlhopha Modimo gore a nne Mmusi wa rona ka go ithuta ka kobamelo ya boammaaruri le go nna le seabe mo kobamelong e e theilweng mo Lefokong la Modimo, Baebele. (Johane 4:23) Fela jaaka Jesu, re ka gana gore Satane a nne mmusi wa rona ka go se tsenelele mo dipolotiking le mo dintweng.—Bala Johane 17:14.

Satane o dirisa maatla a gagwe go dira gore boitsholo jo bo maswe le ditiro tse di utlwisang botlhoko di lebege di siame. Fa re gana go dira ditiro tse di ntseng jalo, ditsala dingwe le ba losika ba ka nna ba re sotla kgotsa ba re ganetsa. (1 Petere 4:3, 4) Ka jalo, re tshwanetse go itlhophela. A re tla tsalana le batho ba ba ratang Modimo? A re tla ikobela melao ya gagwe e e botlhale le e e lorato? Fa re dira jalo, re bontsha gore Satane ke moaki fa a re batho ga ba ka ke ba ikobela Modimo fa ba lebane le maemo a a thata.—Bala 1 Bakorintha 6:9, 10; 15:33.

Lorato lo Modimo a ratang batho ka lone lo bontsha gore pogo le boikepo di tla fela. Batho ba ba bontshang gore ba dumela seno ba tla itumelela botshelo mo lefatsheng ka bo sa khutleng.—Bala Johane 3:16.