Fetela kwa tshedimosetsong

Fetela go diteng

 DOMINICAN REPUBLIC

Ba Tlile go Nnela Ruri

Ba Tlile go Nnela Ruri

Ba Bone Boammaaruri

Juana Ventura o ne a simolola go ithuta Baebele fa tiro ya go rera e ne e thibetswe mme o ne a kolobediwa ka 1960 kwa Ozama River. Nako nngwe moruti wa kereke nngwe kwa Santo Domingo o ne a batla go bona Juana a tshwerwe, a mo latofatsa ka go re “o mo tseela maloko a kereke.” Moruti o ne a leka go bontsha batho gore Basupi ba ga Jehofa ba ruta maaka e bile a batla go senya Juana leina, ka jalo a mo laletsa kwa kerekeng go tla go mmotsolotsa ka se a se dumelang.

Juana a re: “O ne a mpotsa dipotso tse tharo, ‘Goreng lo sa tlhophe? Goreng lo sa ye ntweng? Goreng lo ipitsa Basupi ba ga Jehofa?’ Fa ke ntse ke araba potso nngwe le nngwe go tswa mo Baebeleng, batho mo kerekeng ba ne ba bala ditemana tseno mme ba gakgamadiwa ke se ba neng ba se bala. Ba le bantsi ba ne ba lemoga gore seno ke boammaaruri.  Botlhe ba ne ba simolola go ithuta Baebele e bile batho ba le 25 ba ne ba felela ba ineetse mo go Jehofa.” Tiragalo eno e e jesang kgakge e ne ya dira gore tiro ya go rera e gatele pele kwa Santo Domingo.

Basupi ba ga Jehofa ba Tlile go Nnela Ruri

Go ne ga tsoga dikhuduego tse dintsi fa Trujillo a sena go bolawa. Buka ya Ngwaga ya 1963 e ne ya bega jaana: ‘Go ne go tletse masole mo mebileng e bile ka malatsi a mantsi go na le ditshupetso le thubakanyo.’ Le fa maemo a sepolotiki a ne a le jalo, tiro ya go rera le go dira barutwa e ne e gatetse pele mme kwa bowelong jwa ngwaga wa tirelo wa 1963, go ne go na le baboledi ba le 1 155.

Ka 1962, fa Nathan Knorr a tla mo Dominican Republic go tswa kwa ntlokgolo ya lefatshe lotlhe, o ne a dira dithulaganyo tsa gore go rekwe setsha gore go agiwe kago e kgolo e e tla thusang gore tiro ya go rera e tswelele pele. Go ne ga agiwa kago ya matlhatlaganyane a le mabedi le Holo ya Bogosi mo setsheng seo. Ka Matlhatso, October 12, 1963, Frederick Franz, moeng yo mongwe go tswa kwa ntlokgolo ya lefatshe lotlhe, o ne a neela puo ya go kgakola lekala. Go ne go bonala sentle gore Basupi ba ga Jehofa ba ne ba tlile go nnela ruri mo Dominican Republic. Fela fa lekala le sena go kgakolwa, Harry le Paquita Duffield, barongwa ba bofelo go lelekiwa kwa Cuba, ba ne ba goroga mo Dominican Republic.

Go Nna le Koketsego le fa Puso e Menotswe

Ka April 24, 1965, puso ya naga e ne ya menolwa. Mo malatsing a a boima a a latelang, batho ba ga Jehofa ba ne ba tshwaregile mo tirong ya Modimo. Ka 1970, go ne go na le baboledi ba le 3 378 mo diphuthegong di le 63. Mo dingwageng tse tlhano tse di fetileng, go ne ga tla batho ba feta halofo ya palo eo mo phuthegong. Buka ya Ngwaga ya 1972 e ne ya bega jaana: “Go ne ga tla batho ba ba  farologaneng: Bathudi ba dikoloi, balemirui, bakgweetsi ba dipalangwa, diakhaontente, baagi, babetli, babueledi, dingaka tsa meno, tota le ba e kileng ya bo e le borradipolotiki; botlhe ba kopantswe ke go rata boammaaruri le go rata Jehofa.”