Sefela sa Difela 2:1-17
2 “Ke saferone* fela ya lebala le le fa losing lwa lewatle,Lelômô* la lesoma la mekgatšha.”+
2 “Fela jaaka lelômô la lesoma mo mmitlweng,Moratiwa wa me o ntse jalo fa gare ga basetsana.”
3 “Fela jaaka setlhare sa diapole fa gare ga ditlhare tsa sekgwa,Moratiwa wa me o ntse jalo fa gare ga bana ba basimane.
Ke eletsa thata go nna mo moriting wa gagwe,E bile leungo la gagwe le botshe fa ke le ja.
4 O ne a ntlisa mo ntlong ya mokete,*E bile mongwe le mongwe o ne a bona gore o a nthata.
5 Ntapoloseng ka dikuku tsa morara* o o swabisitsweng;+Mpheng diapole,Ka gonne ke lwadiwa ke lorato.
6 Seatla sa gagwe sa molema se ka fa tlase ga tlhogo ya me,E bile seatla sa gagwe sa moja se a ntlamparela.+
7 Ke a lo ikanisa, lona bomorwadia Jerusalema,Ka ditshephe+ le dikgama tse dinamagadi ka re:
Lo se ka lwa leka go tsosa kgotsa go kurusa lorato mo go nna go fitlha lone lo tsoga.+
8 Ke utlwa moratiwa wa me a tla!
Bonang! Ke yole o etla,O palama dithaba, o tlola dithota.
9 Moratiwa wa me o tshwana le tshephe, o tshwana le kgama e tonanyana e nnye.+
Ke yole, o eme ka fa morago ga lobota lwa rona,O tlhodumetse ka difensetere,O okometse ka matlhabaphefo.
10 Moratiwa wa me o a bua, o nthaya a re:
‘Ema moratiwa wa me,Montlenyane wa me, tla, a re tsamaye.
11 Mariga* a fetile.
Dipula di kgaoditse, di tsamaile.
12 Malômô* a tlhogile mo nageng,+Nako ya go poma dikala e gorogile,+E bile go utlwala modumo wa leeba mo nageng ya rona.+
13 Maungo a ntlha a setlhare sa mofeige a a butswa;+Ditlhare tsa morara di thuntse e bile di ntsha lonko lwa tsone lo lo monate.
Ema moratiwa wa me mme o tle.
Montlenyane wa me, tla, a re tsamaye.
14 Ao tlhe leeba la me, mo lefelong le le sireletsegileng mo lefikeng,+Mo lefelong la go itshuba mo thabeng e e kwa godimo,Mma ke go bone ke bo ke utlwe lentswe la gago,+Gonne lentswe la gago le monate e bile o montle.’”+
15 “Re tshwareleng bophokoje,Bophokoje ba bannye ba ba senyang masimo a morara,Gonne masimo a rona a morara a thuntse.”
16 “Moratiwa wa me ke wa me, mme nna ke wa gagwe.+
O disitse letsomane+ fa go nang le malômô a masoma gone.+
17 Go fitlha phefonyana ya letsatsi e foka* le meriti e tshaba,Boa ka bonako, wena moratiwa wa me,Jaaka tshephe+ kgotsa kgama e tonanyana e nnye+ e e mo dithabeng tse di mo gare ga rona.*
Dintlha Tse di Kwa Tlase
^ Kgotsa “monyelenyele.”
^ Kgotsa “Sethunya.”
^ Seheb., “mo ntlong ya beine.”
^ Kgotsa “diterebe; moretlwa.”
^ Kgotsa “Paka ya pula.”
^ Kgotsa “Dithunya.”
^ Seheb., “Go fitlha letsatsi le hema.”
^ Kgotsa gongwe “mo dithabeng tse di nang le mapharo.” Kgotsa “mo dithabeng tsa Bethere.”
