Lefitiko 3:1-17

  • Setlhabelo sa go abelana (1-17)

    • Lo se ka lwa ja mafura kgotsa madi (17)

3  “‘Fa mpho ya gagwe e le setlhabelo sa go abelana*+ e bile a se ntsha go tswa mo motlhapeng, e ka tswa e le phologolo e tonanyana kgotsa e namagadi, a a ise e e itekanetseng sentle fa pele ga ga Jehofa.  A a beye seatla sa gagwe mo tlhogong ya phologolo e a e ntshang, mme e tla tlhabelwa fa kgorong ya tente ya bokopanelo; mme bomorwa Arone, e leng baperesiti, ba tla kgatšha madi a yone mo matlhakoreng otlhe a sebeso.  O tla isa karolo ya setlhabelo sa go abelana e le setlhabelo se se dirwang ka molelo se se yang kwa go Jehofa:+ mafura+ a a khurumeditseng mala, mafura otlhe a a dikologileng mala  le diphilo tse pedi di na le mafura a tsone a a gaufi le dinôka. Gape o tla ntsha mafura a sebete mmogo le diphilo.+  Bomorwa Arone ba tla di fisa gore di kuise mosi mo sebesong mo godimo ga setlhabelo se se fisiwang se se beilweng mo dikgonnyeng mo molelong;+ ke setlhabelo se se dirwang ka molelo sa lonko lo lo itumedisang* lo lo yang kwa go Jehofa.+  “‘Fa mpho ya gagwe ya setlhabelo sa go abelana se se yang kwa go Jehofa e tswa mo letsomaneng, o tla ntsha phologolo e tonanyana kgotsa e namagadi e e itekanetseng sentle.+  Fa a ntsha phelefu e potlana, foo o tla e isa fa pele ga ga Jehofa.  O tla baya seatla sa gagwe mo tlhogong ya phologolo e a e ntshang, mme e tla tlhabelwa fa pele ga tente ya bokopanelo. Bomorwa Arone ba tla kgatšha madi a yone mo matlhakoreng otlhe a sebeso.  O tla isa mafura a a tswang mo setlhabelong sa go abelana e le setlhabelo se se dirwang ka molelo se se yang kwa go Jehofa.+ O tla ntsha mogatla otlhe o o mafura gaufi le lerapo la mokwatla, mafura a a khurumeditseng mala, mafura otlhe a a dikologileng mala 10  le diphilo tse pedi di na le mafura a tsone a a gaufi le dinôka. Gape o tla ntsha mafura a sebete mmogo le diphilo.+ 11  Mme moperesiti o tla di fisa gore di kuise mosi mo sebesong e le dijo,* setlhabelo se se dirwang ka molelo se se yang kwa go Jehofa.+ 12  “‘Fa e le gore o ntsha podi, foo o tla e isa fa pele ga ga Jehofa. 13  O tla baya seatla sa gagwe mo tlhogong ya phologolo eo, mme e tla tlhabelwa fa pele ga tente ya bokopanelo. Bomorwa Arone ba tla kgatšha madi a yone mo matlhakoreng otlhe a sebeso. 14  Karolo e a tla e isang e le setlhabelo sa gagwe se se dirwang ka molelo se se yang kwa go Jehofa ke mafura a a khurumeditseng mala, mafura otlhe a a dikologileng mala+ 15  le diphilo tse pedi di na le mafura a tsone a a gaufi le dinôka. Gape o tla ntsha mafura a sebete mmogo le diphilo. 16  Moperesiti o tla di fisa gore di kuise mosi mo sebesong e le dijo,* setlhabelo se se dirwang ka molelo gore e nne lonko lo lo itumedisang.* Mafura otlhe ke a ga Jehofa.+ 17  “‘Ke molao o o tla nnelang ruri mo dikokomaneng tsa lona, mo mafelong otlhe a lo nnang mo go one: Ga lo a tshwanela go ja mafura ape kgotsa madi ape+ gotlhelele.’”

Dintlha Tse di Kwa Tlase

Kgotsa “setlhabelo sa kagiso.”
Kgotsa “monate; ritibatsang.” Seheb., “lapolosang.”
Seheb., “senkgwe,” go tewa e le karolo ya setlhabelo sa go abelana e e newang Modimo.
Seheb., “senkgwe,” go tewa e le karolo ya setlhabelo sa go abelana e e newang Modimo.
Kgotsa “monate; ritibatsang.” Seheb., “lapolosang.”