Lefitiko 24:1-23

  • Leokwane la dipone tsa motlaagana (1-4)

  • Dinkgwe tse di bewang fa pele ga Modimo (5-9)

  • Motho yo o dirisang leina la Modimo ka tsela e e sa tshwanelang a kgobotlediwe ka maje (10-23)

24  Jehofa o ne a tswelela a bua le Moshe a re:  “Laela Baiseraele gore ba tlise kwa go wena leokwane le le sa tswakanngwang la motlhware o o kgobilweng le le dirisediwang go tshuba dipone, gore dipone di nne di tshubilwe ka metlha.+  Arone a rulaganye gore dipone di nne di tshubilwe ka metlha fa pele ga ga Jehofa gaufi le sesiro se se bapileng le letlole la kgolagano mo tenteng ya bokopanelo, go tloga maitseboa go fitlha mo mosong. Ke molao o o tla nnelang ruri mo dikokomaneng tsotlhe tsa lona.  Ka metlha a beye dipone fa pele ga ga Jehofa ka thulaganyo mo setlhomong sa dipone+ sa gauta e e sa tswakanngwang.  “O tseye bupi jo bo boleta o bo o dira dinkgwe di le 12 tse di bopegileng jaaka maseka. Senkgwe sengwe le sengwe se dirwe ka bupi jo bo boleta jwa dikilogerama di ka nna pedi.*  O di beye fa pele ga ga Jehofa di tlhatlagane ka ditlhopha tse pedi, o tlhatlaganye di le thataro mo setlhopheng sengwe le sengwe+ mo tafoleng ya gauta e e sa tswakanngwang.+  O beye borekhu jo bo nkgang monate* jo bo sa tswakanngwang mo setlhopheng sengwe le sengwe, mme e tla nna senkgwe se se ntshiwang e le karolo e e emelang setlhabelo sotlhe*+ se se dirwang ka molelo se se yang kwa go Jehofa.  Mo letsatsing lengwe le lengwe la Sabata, a se beye ka thulaganyo fa pele ga ga Jehofa ka metlha.+ Ke kgolagano e e dirwang le Baiseraele e e tla nnelang ruri.  E tla nna sa ga Arone le bomorwawe,+ mme ba tla se jela mo lefelong le le boitshepo+ ka gonne ke selo se se boitshepotshepo se a se newang go tswa mo ditlhabelong tsa ga Jehofa tse di dirwang ka molelo, e le molao o o tla nnelang ruri.” 10  Jaanong mo Baiseraeleng go ne go na le morwa mongwe yo mmaagwe e neng e le Moiseraele mme rraagwe e le Moegepeto,+ mme ene le monna mongwe wa Moiseraele ba ne ba lwela mo teng ga kampa. 11  Morwa yono yo mmaagwe e neng e le Moiseraele o ne a simolola go dirisa Leina* ka tsela e e sa tshwanelang le go le tlhapatsa.*+ Ka jalo, ba ne ba mo tlisa kwa go Moshe.+ Mme leina la ga mmaagwe e ne e le Shelomithe, morwadia Diberi wa lotso lwa ga Dana. 12  Ba ne ba mo tsenya mo kgolegelong go fitlha ba tlhalosediwa sentle tshwetso ya ga Jehofa.+ 13  Go tswa foo, Jehofa o ne a raya Moshe a re: 14  “Ntshetsa motho yo o tlhapaditseng leina la me kwa ntle ga kampa, mme botlhe ba ba mo utlwileng ba tshwanetse go baya diatla tsa bone mo tlhogong ya gagwe, go tswa foo phuthego yotlhe e tshwanetse go mo kgobotletsa ka maje.+ 15  Mme o reye Baiseraele o re, ‘Fa motho ope a tlhapatsa Modimo wa gagwe, o tla otlhaelwa boleo jwa gagwe. 16  Ka jalo, motho yo o dirisang leina la ga Jehofa ka tsela e e sa tshwanelang o tshwanetse go bolawa.+ Phuthego yotlhe e tshwanetse go mo kgobotletsa ka maje. Motswakwa le ene a bolawe fela jaaka motho wa mo lefelong la lona ka ntlha ya go dirisa Leina leo ka tsela e e sa tshwanelang. 17  “‘Fa motho a bolaya motho yo mongwe, o tshwanetse go bolawa.+ 18  Ope fela yo o itayang seruiwa a bo a se bolaya a se duelele, a duelele botshelo ka botshelo.* 19  Fa motho a gobatsa yo mongwe, le ene a a dirwe se a se mo dirileng.+ 20  A duelele go robega ka go robiwa, leitlho ka leitlho, leino ka leino, mofuta wa kgobalo e a e baketseng motho yoo le ene a gobadiwe ka yone.+ 21  Motho yo o itayang phologolo gore e bo e swe, a e duelele+ mme yo o itayang motho a bo a mmolaya, a bolawe.+ 22  “‘Lo tla kaelwa ke tshwetso e le nngwe fela ya boatlhodi, e ka tswa e le motswakwa kgotsa motho wa mo lefelong la lona+ ka gonne ke nna Jehofa, Modimo wa lona.’” 23  Morago ga moo, Moshe o ne a bua le Baiseraele, mme ba ne ba ntshetsa motho yo o tlhapaditseng leina la Modimo kwa ntle ga kampa ba bo ba mo kgobotletsa ka maje.+ Ka jalo, Baiseraele ba ne ba dira fela jaaka Jehofa a ne a laetse Moshe.

Dintlha Tse di Kwa Tlase

Seheb., “pedisomeng (2/10) ya ifa.” Bona Dintlha B14.
Seheb., “lebano.” Bona Ditlhaloso Tsa Mafoko.
Kgotsa “e le karolo ya segopotso sa yone.”
Go tewa leina Jehofa, jaaka temana 15 le 16 di bontsha.
Kgotsa “hutsa.”
Seheb., “ne′phesh.Bona Ditlhaloso Tsa Mafoko.