Lefitiko 18:1-30

  • Tlhakanelodikobo e e seng ka fa molaong (1-30)

    • Lo se ka lwa etsa Bakanana (3)

    • Go tlhakanela dikobo le ba losika (6-18)

    • Ka nako ya fa mosadi a le mo kgweding (19)

    • Go tlhakanela dikobo ga batho ba bong jo bo tshwanang (22)

    • Go tlhakanela dikobo le phologolo (23)

    • ‘Nnang lo itshekile, go seng jalo lefatshe le tla lo tlhatsa’ (24-30)

18  Jehofa o ne a tswelela a bua le Moshe a re:  “Bua le Baiseraele mme o ba reye o re, ‘Ke nna Jehofa, Modimo wa lona.+  Ga lo a tshwanela go itshwara jaaka batho ba itshwara kwa lefatsheng la Egepeto kwa lo neng lo nna gone e bile ga lo a tshwanela go dira jaaka go dirwa kwa lefatsheng la Kanana kwa ke lo isang gone.+ Gape ga lo a tshwanela go tsamaya mo melaong ya bone.  Lo diragatse ditshwetso tsa me tsa boatlhodi mme lo boloke melao ya me lo bo lo tsamaye mo go yone.+ Ke nna Jehofa, Modimo wa lona.  Lo tshwanetse go boloka melao ya me le ditshwetso tsa me tsa boatlhodi; ope fela yo o dirang jalo o tla tshela ka ntlha ya tsone.+ Ke nna Jehofa.  “‘Go se nne le motho ope yo o tlhakanelang dikobo le mongwe yo o gaufi thata le ene ka losika.*+ Ke nna Jehofa.  Ga o a tshwanela go tlhakanela dikobo le rrago e bile ga o a tshwanela go tlhakanela dikobo le mmago. Ke mmago, mme ga o a tshwanela go tlhakanela dikobo le ene.  “‘Ga o a tshwanela go tlhakanela dikobo le mosadi wa ga rrago.+ Ke go tlhabisa rrago ditlhong.*  “‘Ga o a tshwanela go tlhakanela dikobo le kgaitsadio, e ka tswa e le morwadiarrago kgotsa morwadiammago, le fa a ka tswa a tsholetswe mo ntlong e le nngwe le wena kgotsa a tsholetswe go sele.+ 10  “‘Ga o a tshwanela go tlhakanela dikobo le morwadia morwao kgotsa morwadia morwadio, ka gonne seno se tla dira gore o tlontlologe.* 11  “‘Ga o a tshwanela go tlhakanela dikobo le morwadia mosadi wa ga rrago, e leng ngwana wa ga rrago, ka gonne ke kgaitsadio. 12  “‘Ga o a tshwanela go tlhakanela dikobo le rakgadiago. Ke losika lwa ga rrago lwa madi.+ 13  “‘Ga o a tshwanela go tlhakanela dikobo le mmamogoloago kgotsa mmangwanaago, ka gonne ke losika lwa ga mmago lwa madi. 14  “‘Ga o a tshwanela go tlhabisa rramogoloago kgotsa rangwanaago ditlhong* ka go tlhakanela dikobo le mosadi wa gagwe. Ke mosadi wa ga morwarraagwe rrago.+ 15  “‘Ga o a tshwanela go tlhakanela dikobo le ngwetsi ya gago.+ Ke mosadi wa ga morwao, mme ga o a tshwanela go tlhakanela dikobo le ene. 16  “‘Ga o a tshwanela go tlhakanela dikobo le mosadi wa ga mogoloo kgotsa wa ga monnao+ ka gonne seo ke go tlhabisa mogoloo kgotsa monnao ditlhong.* 17  “‘Ga o a tshwanela go tlhakanela dikobo le morwadia mosadi wa gago.+ Ga o a tshwanela go tsaya morwadia morwawe le morwadia morwadie gore o tlhakanele dikobo le ene. Ke ba losika lwa gagwe lo lo gaufi; ke tiro e e maswe thata.* 18  “‘Ga o a tshwanela go nyala mogolowe kgotsa monnawe mosadi wa gago gore e nne mosadi wa bobedi+ o bo o tlhakanela dikobo le ene fa mosadi wa gago a sa ntse a tshela. 19  “‘Ga o a tshwanela go tlhakanela dikobo le mosadi yo o itshekologileng ka ntlha ya go bo a le mo kgweding.+ 20  “‘Ga o a tshwanela go tlhakanela dikobo le mosadi wa monna yo mongwe* mme wa iitshekolola.+ 21  “‘Ga o a tshwanela go letla ope wa bana ba gago gore a ntshediwe* modingwana o o bidiwang Moleke.+ Ga o a tshwanela go leswafatsa leina la Modimo wa gago ka tsela eo.+ Ke nna Jehofa. 22  “‘Monna ga a tshwanela go tlhakanela dikobo le monna yo mongwe.*+ Ke selo se se makgapha. 23  “‘Monna ga a tshwanela go tlhakanela dikobo le phologolo gore e mo itshekolole; e bile mosadi ga a tshwanela go leka go tlhakanela dikobo le phologolo.+ Ke go tlola taelo ya Modimo. 24  “‘Lo se ka lwa iitshekolola ka sepe sa dilo tseno, ka gonne ditšhaba tse ke di lelekang fa pele ga lona di iitshekolotse ka ntlha ya dilo tseno tsotlhe.+ 25  Ka jalo, lefatshe le itshekologile mme ke tla tlisa kotlhao mo go lone ka ntlha ya phoso ya lone, mme lefatshe le tla tlhatsetsa banni ba lone kwa ntle.+ 26  Mme lona lo tshwanetse go boloka melao ya me le ditshwetso tsa me tsa boatlhodi+ e bile ga lo a tshwanela go dira sepe sa dilo tseno tse di makgapha, e ka tswa e le motho wa mo lefelong la lona kgotsa motswakwa yo o agileng le lona.+ 27  Gonne batho ba ba neng ba nna mo lefatsheng leno pele ga lona ba ne ba dira dilo tseno tse di makgapha,+ mme jaanong lefatshe le itshekologile. 28  Ka jalo, lefatshe ga le kitla le tshwanelwa ke go lo tlhatsetsa kwa ntle ka tsela e le tla tlhatsetsang kwa ntle ditšhaba tse di neng di le teng pele ga lona, ka gonne lo le leswafaditse. 29  Fa mongwe a dira dilo tseno tse di makgapha, o tshwanetse go bolawa. 30  Lo tshwanetse go diragatsa boikarabelo jwa lona mo go nna ka go sa dire mekgwa epe e e makgapha e e neng e dirwa fa pele ga lona,+ gore lo se ka lwa iitshekolola ka yone. Ke nna Jehofa, Modimo wa lona.’”

Dintlha Tse di Kwa Tlase

Seheb., “gore a bipolole bosaikategang,” fano le mo makgetlong a a latelang.
Seheb., “Ke bosaikategang jwa ga rrago.”
Seheb., “ka gonne batho bano ke bosaikategang jwa gago.”
Seheb., “bipolola bosaikategang jwa ga rramogoloago kgotsa rangwanaago.”
Seheb., “ke bosaikategang jwa ga morwarrago.”
Kgotsa “ke boitshwaro jo bo tlhabisang ditlhong; selo se se ferosang sebete.”
Kgotsa “moagelani wa gago; motho yo o tlwaelaneng le ene.”
Kgotsa “neelwe; tlhabelwe.”
Seheb., “Ga o a tshwanela go robala le monna ka tsela e e tshwanang le e o robalang le mosadi ka yone.”