Jeremia 9:1-26

  • Jeremia o hutsafetse thata (1-3a)

  • Jehofa o bona batho ba Juda molato (3b-16)

  • Ba hutsafalela Juda (17-22)

  • Ikgantshe ka go itse Jehofa (23-26)

9  E kete tlhogo ya me e ka bo e le mogobe wa metsi,Matlho a me e le motswedi wa dikeledi!+ Foo ke ne ke tla lela bosigo le motshegare,Ke lelela batho ba gaetsho ba ba bolailweng setlhogo.   E kete nkabo ke na le lefelo le batsamai ba lalang mo go lone kwa nageng! Foo ke ne ke tla tlogela batho ba gaetsho ke bo ke ya go nna kgakala le bone,Gonne botlhe fela ke batho ba ba dirang boaka,+Setlhopha sa batho ba ba boferefere.   Ba koba loleme lwa bone jaaka bora;Go tletse maaka mo lefatsheng, e seng boikanyegi.+ “Ba tswelela ba dira bosula le go feta,E bile ga ba ntseye tsia,”+ go bua Jehofa.   “A mongwe le mongwe a ikele tlhoko mo moagelaning wa gagwe,Tota e bile a se ka a ikanya morwarraagwe. Gonne bomorwarramotho botlhe ke batsietsi,+E bile baagelani botlhe ba senya batho maina.+   Mongwe le mongwe o tsietsa moagelani wa gagwe,E bile ga go ope yo o buang boammaaruri. Ba rutile maleme a bone go bua maaka.+ Ba itsenya letsapa ka go dira dilo tse di sa siamang.   Wena o tshela mo bathong ba ba tsietsang. Ka ntlha ya tsietso ya bone ba ganne go nkitse,” go bua Jehofa.   Ka jalo, seno ke se Jehofa wa masomosomo a se buang: “Ke tla ba nyerolosa gore ke ba phepafatse,+Gonne ke eng se sengwe se nka se dirang ka morwadia batho ba me?   Loleme lwa bone lo lo buang tsietso ke motswi o o bolayang setlhogo. Motho o bua mafoko a kagiso le moagelani wa gagwe,Mme mo pelong ya gagwe o mo logela leano.”*   Jehofa a re, “A ga ke a tshwanela go ba bona molato ka ntlha ya dilo tseno? A ga ke a tshwanela go ipusolosetsa mo setšhabeng se se ntseng jaana?+ 10  Ke tla lelela dithaba ke bo ke di hutsafalelaE bile ke tla opelela mafulo a a kwa nageng pina ya khutsafalo,Gonne a fisitswe gore go se ka ga nna le motho ope yo o a ralalang,Le modumo wa diruiwa ga o utlwale. Dinonyane tsa legodimo le dibatana di tshabile; di ile.+ 11  Ke tla dira Jerusalema mekoa ya maje,+ mongobo wa bophokoje,+E bile ke tla dira gore metse ya Juda e kgakgabale, e sale e se na monni.+ 12  Ke mang yo o botlhale yo o ka tlhaloganyang gore ke ka ntlha yang fa dilo tseno di direga? Jehofa o boleletse mang dilo tseno, gore a di bolelele ba bangwe? Ke ka ntlha yang fa lefatshe le nyeletse? Ke ka ntlha yang fa le fisitswe jaaka naga,Mo e leng gore ga go na ope yo o le ralalang?” 13  Jehofa o ne a araba jaana: “Ke ka ntlha ya gore ba ganne molao* wa me o ke ba o neileng, le ka ntlha ya gore ga ba a ka ba o ikobela e bile ga ba a ka ba utlwa lentswe la me. 14  Go na le moo, ba ne ba sala dipelo tsa bone morago ka botlhogoethata,+ e bile ba ne ba sala ditshwantsho tsa ga Baale morago, fela jaaka borraabone ba ne ba ba rutile.+ 15  Ka jalo, Jehofa wa masomosomo, Modimo wa Iseraele, a re, ‘Jaanong ke dira gore batho bano ba je longana, e bile ke tla dira gore ba nwe metsi a a nang le botlhole.+ 16  Ke tla ba gasamisetsa kwa ditšhabeng tse bone le borraabone ba iseng ba ke ba di itse,+ e bile ke tla romela tšhaka kwa morago ga bone go fitlha ke ba fedisa.’+ 17  Jehofa wa masomosomo a re,‘Elang tlhoko se se diregang. Bitsang basadi ba ba opelang dipina tsa khutsafalo,+Mme lo romeng batho gore ba bitse basadi ba ba ditswerere, 18  Gore ba itlhaganele mme ba tle ba re opelele pina ya khutsafalo,Gore matlho a rona a tle a elele dikelediLe dintshi tsa rona di rothe metsi.+ 19  Gonne go utlwilwe modumo ono wa pina ya khutsafalo go tswa kwa Siona:+ “Ruri re gateletswe! Ruri re tlhabilwe ke ditlhong thata! Gonne re ntshitswe mo nageng ya rona, e bile ba thubile magae a rona.”+ 20  Lona basadi, utlwang lentswe la ga Jehofa. E kete tsebe ya lona e ka amogela lefoko la gagwe. Rutang bomorwadialona pina eno ya khutsafalo,Lo bo lo rutane pina eno ya khutsafalo.+ 21  Gonne loso lo tsene ka difensetere tsa rona;Lo tsene mo ditoreng tsa rona tse di sireletsegilengGore lo tseye bana kwa mebilengLe makawana kwa dipatlelong.’+ 22  Ba reye o re, ‘Seno ke se Jehofa a se buang: “Ditopo tsa batho di tla wela mo nageng di bo di nna jaaka motshotelo,Di tla nna jaaka mola wa mabele a a sa tswang go rojwa a a oleng kwa morago ga morobi,Go se na ope yo o a phuthang.”’”+ 23  Seno ke se Jehofa a se buang: “A motho yo o botlhale a se ka a ikgantsha ka botlhale jwa gagwe;+A motho yo o maatla a se ka a ikgantsha ka maatla a gagwe;E bile a motho yo o humileng a se ka a ikgantsha ka dikhumo tsa gagwe.”+ 24  “Mme a yo o ikgantshang a ikgantshe ka dilo tseno: Gore o a ntlhaloganya e bile o a nkitse,+Gore ke nna Jehofa, Ene yo o bontshang lorato lo lo sa kgaotseng, tshiamiso le tshiamo mo lefatsheng,+Gonne ke itumedisiwa ke dilo tseno,”+ go bua Jehofa. 25  “Metlha e etla,” go bua Jehofa, “mme ke tla otlhaya mongwe le mongwe yo o rupileng mme tota a ise a rupe,+ 26  e leng Egepeto+ le Juda+ le Edoma+ le Baamone+ le Moabe+ le batho botlhe ba moriri wa bone o kgaotsweng mo matlhakoreng a tlhogo ba ba nnang kwa nageng;+ gonne ditšhaba tsotlhe ga di a rupa, mme Baiseraele botlhe ga ba a rupa mo pelong.”+

Dintlha Tse di Kwa Tlase

Seheb., “o a mo lalela.”
Kgotsa “taelo.”