Jeremia 29:1-32
29 Ano ke mafoko a lekwalo le moporofeti Jeremia a neng a le romela go tswa kwa Jerusalema le ya kwa bagolwaneng botlhe ba ba nang le batho ba ba isitsweng botshwarwa, kwa baperesiting, kwa baporofeting le kwa bathong botlhe, ba Nebukadenesare a neng a ba tsere kwa Jerusalema a bo a ba isa botshwarwa kwa Babelona,
2 fa Kgosi Jekonia,+ mohumagadi,+ badiredibagolo ba ntlo ya kgosi, dikgosana tsa Juda le Jerusalema, le badiri ba ba ditswerere le badirakatshipi* ba sena go tswa mo Jerusalema.+
3 Lekwalo leo o ne a le naya Elasa morwa Shafane+ le Gemaria morwa Hilekia, ba Kgosi Sedekia+ wa Juda a neng a ba romile kwa Babelona kwa go Kgosi Nebukadenesare wa Babelona. Le ne le re:
4 “Jehofa wa masomosomo, Modimo wa Iseraele o raya batho botlhe ba ba isitsweng botshwarwa, ba ke dirileng gore ba ye botshwarwa kwa Babelona ba tswa kwa Jerusalema, a re
5 ‘Agang matlo mme lo nne mo go one. Jalang ditshingwana mme lo je maungo a tsone.
6 Nyalang mme lo nne le bana ba basimane le ba basetsana; nyadisang bomorwaalona le bomorwadialona, gore le bone ba tle ba nne le bana ba basimane le ba basetsana. Nnang bantsi koo, mme lo se ka lwa fokotsega.
7 Lekang go tshela ka kagiso mo motseng o ke dirileng gore lo ye botshwarwa kwa go one, e bile lo o rapelele kwa go Jehofa, ka gonne fa motse oo o le mo kagisong le lona lo tla nna le kagiso.+
8 Gonne seno ke se Jehofa wa masomosomo, Modimo wa Iseraele, a se buang: “Lo se ka lwa letla baporofeti ba lona le baitseanape ba lona ba lo tsietsa,+ e bile lo se ka lwa reetsa ditoro tse ba di lorang.
9 Gonne ‘ba lo porofetela maaka ka leina la me. Ga ke a ba roma,’+ go bua Jehofa.”’”
10 “Gonne Jehofa a re, ‘Fa dingwaga tse 70 di sena go wela lo le kwa Babelona, ke tla lo gopola,+ mme ke tla diragatsa tsholofetso ya me ka go lo busetsa mo lefelong leno.’+
11 “‘Ke itse sentle se ke lo se batlelang, ke batla go lo naya kagiso e seng masetlapelo,+ e bile ke batla go lo naya bokamoso le tsholofelo,’ go bua Jehofa.+
12 ‘Mme lo tla mpitsa lo bo lo tla go nthapela, mme ke tla lo reetsa.’+
13 “‘Lo tla mpatla lo bo lo mpona,+ ka gonne lo tla bo lo mpatla ka pelo yotlhe.+
14 Mme ke tla dira gore lo mpone,’+ go bua Jehofa. ‘E bile ke tla phutha batshwarwa ba lona ke bo ke lo phutha mmogo go tswa kwa ditšhabeng tsotlhe le kwa mafelong otlhe a ke neng ke lo phatlalaleditse kwa go one,’+ go bua Jehofa. ‘Mme ke tla lo busetsa mo lefelong le ke neng ke dirile gore lo tswe mo go lone lo ye botshwarwa.’+
15 “Le fa go ntse jalo, lo rile, ‘Jehofa o dirile gore re nne le baporofeti mo Babelona.’
16 “Gonne Jehofa o raya kgosi e e ntseng mo setulong sa bogosi sa ga Dafide+ le batho botlhe ba ba nnang mo motseng ono, bomorwarraalona ba ba sa yang botshwarwa le lona a re,
17 ‘Seno ke se Jehofa wa masomosomo a se buang: “Jaanong ke ba romelela tšhaka, leuba le bolwetse jwa leroborobo,+ mme ke tla ba dira gore ba tshwane le difeige tse di bodileng,* tse di sa siamang gotlhelele mo di ka se kang tsa jewa.”’+
18 “‘Ke tla ba latelela ka tšhaka,+ ka leuba le ka bolwetse jwa leroborobo, mme ke tla dira gore magosi otlhe a lefatshe a tshoge fa a bona se se ba diragaletseng,+ e bile ke tla dira gore ba hutsiwe, ba gakgamalelwe le go lelediwa molodi,+ le go kgobiwa mo ditšhabeng tsotlhe tse ke ba phatlalaletsang kwa go tsone,+
19 ka gonne ga ba a reetsa mafoko a me a ke neng ka a ba bolelela ke dirisa batlhanka ba me e bong baporofeti, ke ba roma gangwe le gape,’* go bua Jehofa.+
“‘Mme ga lo a reetsa,’+ go bua Jehofa.
20 “Ka jalo, utlwang se Jehofa a se buang, lona lotlhe ba lo isitsweng botshwarwa, ba ke lo ntshitseng kwa Jerusalema mme ka lo isa kwa Babelona.
21 Seno ke se Jehofa wa masomosomo, Modimo wa Iseraele, a buang gore se tla diragalela Ahabe morwa Kolaia le Sedekia morwa Maaseia, ba ba lo porofetelang maaka ka leina la me,+ ‘Jaanong ke ba tsenya mo seatleng sa ga Kgosi Nebukadenesare* wa Babelona, mme o tla ba bolaya fa pele ga matlho a lona.
22 Mme se se ba diragalelang se tla fetoga phutso e e buiwang ke batshwarwa ba Juda ba ba kwa Babelona, ba re: “E kete Jehofa a ka go dira fela jaaka Sedekia le Ahabe, ba kgosi ya Babelona e neng ya ba besa mo molelong!”
23 ka gonne ba dirile matlhabisaditlhong mo Iseraele,+ ba dira boaka le basadi ba baagelani ba bone e bile ba bua mafoko a maaka a ke sa ba a laelang ba dirisa leina la me.+
“‘“Ke Nna ke itseng e bile ke mosupi,”+ go bua Jehofa.’”
24 “Mme o reye Shemaia+ wa kwa Nehelame o re,
25 ‘Seno ke se Jehofa wa masomosomo, Modimo wa Iseraele, a se buang: “E re ka o rometse makwalo ka leina la gago kwa bathong botlhe ba ba mo Jerusalema, kwa go moperesiti Sefania+ morwa Maaseia, le kwa baperesiting botlhe, o re,
26 ‘Jehofa o go dirile moperesiti mo boemong jwa ga moperesiti Jehoiada gore o nne molebedi mo ntlong ya ga Jehofa, gore o tshware motho ope fela yo o tsenwang yo o itirang moporofeti o bo o mo tsenya mo dikoteng tsa go golega le mo segolegong sa thamo le mabogo;*+
27 jaanong, ke ka ntlha yang fa o sa kgalemela Jeremia wa kwa Anathothe,+ yo o itirang moporofeti wa lona?+
28 Gonne o ile a romela molaetsa kwa go rona kwa Babelona, a re: “Lo tla nna kwa botshwarwa lobaka lo loleele! Agang matlo mme lo nne mo go one. Jalang ditshingwana mme lo je maungo a tsone,+ . . .”’”’”
29 Fa moperesiti Sefania+ a ntse a balela moporofeti Jeremia lekwalo leno,
30 Jehofa o ne a raya Jeremia a re:
31 “Romela molaetsa kwa bathong botlhe ba ba isitsweng botshwarwa, o re, ‘Seno ke se Jehofa a se buang ka ga Shemaia wa kwa Nehelame: “E re ka Shemaia a lo porofetetse, mme gone ke sa mo roma, e bile a lekile go dira gore lo ikanye maaka,+
32 ke gone ka moo Jehofa a reng, ‘Jaanong ke otlhaya Shemaia wa kwa Nehelame le ditlogolwana tsa gagwe. Ga go na motho ope wa lelapa la gagwe yo o tla falolang mo bathong bano, e bile ga a kitla a bona dilo tse di molemo tse ke tla di direlang batho ba me,’ go bua Jehofa, ‘ka gonne o tlhotlheleditse batho gore ba tlhanogele Jehofa.’”’”
Dintlha Tse di Kwa Tlase
^ Kgotsa gongwe “baagi ba dithako tsa phemelo.”
^ Kgotsa gongwe “phatlogileng.”
^ Seheb., “ke tsoga go sa le phakela ke bo ke roma.”
^ Seheb., “Nebukaderesare,” tsela e nngwe ya go le kwala.
^ Kgotsa “mo ditshiping tse di tsenyang molala.”
