Ditiragalo wa Bobedi 7:1-22

  • Tempele e tlala kgalalelo ya ga Jehofa (1-3)

  • Moletlo wa go kgakola tempele (4-10)

  • Jehofa o iponatsa mo go Solomone (11-22)

7  Jaanong fela fa Solomone a fetsa go rapela,+ molelo o ne wa fologa kwa magodimong+ wa laila setlhabelo se se fisiwang le ditlhabelo tse dingwe, mme kgalalelo ya ga Jehofa e ne ya tlala mo ntlong.+  Baperesiti ba ne ba sa kgone go tsena mo ntlong ya ga Jehofa ka gonne kgalalelo ya ga Jehofa e ne e tletse mo ntlong ya ga Jehofa.+  Mme batho botlhe ba Iseraele ba ne ba ntse ba lebile fa molelo o fologa kwa magodimong le fa kgalalelo ya ga Jehofa e ne e le mo godimo ga ntlo eo, mme ba ne ba ikoba difatlhego tsa bone di lebile fa fatshe mo boalong jwa maje, ba bo ba obama ba leboga Jehofa, “ka gonne o molemo; lorato lwa gagwe lo lo sa kgaotseng lo nnela ruri.”  Jaanong kgosi le batho botlhe ba ne ba ntsha ditlhabelo fa pele ga ga Jehofa.+  Kgosi Solomone o ne a ntsha setlhabelo sa dikgomo di le 22 000 le dinku di le 120 000. Ka jalo, kgosi le batho botlhe ba ne ba kgakola ntlo ya Modimo wa boammaaruri.+  Baperesiti ba ne ba eme mo maemong a ba direlang mo go one, fela jaaka Balefi ba ba neng ba tshotse diletswa tse di neng di lediwa fa go opelelwa Jehofa.+ (Kgosi Dafide o ne a dirile diletswa tseno gore di dirisediwe go ntshetsa Jehofa ditebogo go twe: “Gonne lorato lwa gagwe lo lo sa kgaotseng lo nnela ruri,” fa Dafide a baka Modimo a na le bone.*) Mme baperesiti ba ne ba leletsa diterompeta+ kwa godimo ba lebagane le Balefi, fa Baiseraele botlhe bone ba ne ba eme ka dinao.  Foo Solomone o ne a dira gore karolo e e fa gare ya lolwapa lo lo fa pele ga ntlo ya ga Jehofa e nne boitshepo, ka gonne ke gone kwa a neng a tshwanetse go ntshetsa ditlhabelo tse di fisiwang+ le mafura a ditlhabelo tsa go abelana gone, ka ntlha ya gore sebeso sa kopore+ se Solomone a neng a se dirile se ne se sa kgone go tshola ditlhabelo tse di fisiwang, ditlhabelo tsa dijo tsa ditlhaka+ le mafura.+  Ka nako eo, Solomone o ne a dira moletlo wa malatsi a le supa+ a na le Baiseraele botlhe, e ne e le phuthego e kgolo e simologa kwa Lebo-hamathe* go ya go fitlha kwa Molapong wa Egepeto.+  Mme mo letsatsing la borobedi* ba ne ba nna le kopano e e kgethegileng,+ ka gonne ba ne ba kgakotse sebeso malatsi a le supa e bile ba dirile moletlo malatsi a le supa. 10  Mo letsatsing la bo23 la kgwedi ya bosupa, o ne a naya batho tsela gore ba ye magaeng a bone, ba ne ba itumetse+ e bile dipelo tsa bone di phophoma ka boitumelo ka ntlha ya molemo o Jehofa a neng a o bontshitse Dafide le Solomone le batho ba gagwe ba Iseraele.+ 11  Ka jalo, Solomone o ne a fetsa ntlo ya ga Jehofa le ntlo ya kgosi;*+ mme sengwe le sengwe se Solomone a neng a eleditse go se dira se se amanang le ntlo ya ga Jehofa le ntlo ya gagwe o ne a atlega go se dira.+ 12  Go tswa foo, Jehofa o ne a iponatsa mo go Solomone+ bosigo mme a mo raya a re: “Ke utlwile thapelo ya gago, mme ke itlhophetse lefelo leno gore e nne ntlo e go ntshediwang ditlhabelo+ mo go yone. 13  Fa ke tswala magodimo mme pula e sa ne le fa ke laela ditsiakgope gore di senye lefatshe le fa ke romela bolwetse jwa leroborobo mo bathong ba me, 14  fa batho ba me, ba leina la me le bidiwang mo go bone+ ba ikokobetsa,+ ba rapela, ba senka sefatlhego sa me ba bo ba tlogela ditsela tsa bone tse di bosula,+ foo ke tla ba utlwa ke le kwa magodimong ke bo ke ba itshwarela boleo jwa bone mme ke tla fodisa lefatshe+ la bone. 15  Jaanong matlho a me a tla bulega le ditsebe tsa me di tla reetsa thapelo epe fela e e dirwang mo lefelong leno.+ 16  Mme jaanong ke tlhophile ntlo eno e bile ke e dirile boitshepo, gore leina la me le nnele ruri mo go yone,+ mme matlho a me le pelo ya me di tla nna di le mo go yone ka metlha.+ 17  “Mme wena, fa o ka tsamaya mo ditseleng tsa me fela jaaka Dafide rrago a ne a tsamaya, wa dira sengwe le sengwe se ke se go laetseng, wa bo wa ikobela melao ya me le dikatlholo tsa me,+ 18  foo ke tla tiisa setulo sa gago sa bogosi,+ fela jaaka ke dirile kgolagano le Dafide rrago,+ ke re, ‘Ka metlha go tla nna go na le monna wa losika lwa gago gore a buse mo Iseraele.’+ 19  Mme fa lo fapoga lo bo lo tlogela melao ya me le ditaelo tsa me tse ke di lo neileng, mme lo tsamaya lo ya go direla medimo e mengwe le go e ikobela,+ 20  ke tla kumola Baiseraele mo lefatsheng la me le ke le ba neileng,+ mme ntlo e ke e dirileng boitshepo ka ntlha ya leina la me, ke tla e ntsha fa pele ga me e bile ke tla e dira selo sa go kgobiwa* le sengwe sa go sotliwa mo ditšhabeng tsotlhe.+ 21  Mme ntlo eno e tla nna mekoa ya marope. Mongwe le mongwe yo o fetang fa go yone o tla e rotolela matlho a gakgametse+ mme o tla re, ‘Ke ka ntlha yang fa Jehofa a dirile lefatshe leno le ntlo eno jaana?’+ 22  Foo ba tla re, ‘Ke ka gonne ba ne ba tlogela Jehofa,+ Modimo wa borraabonemogolo, yo o ba ntshitseng kwa lefatsheng la Egepeto,+ mme ba ne ba amogela medimo e mengwe ba bo ba e ikobela le go e direla.+ Ke gone ka moo Modimo a ba tliseditseng masetlapelo ano otlhe.’”+

Dintlha Tse di Kwa Tlase

Gongwe go tewa Balefi.
Kgotsa “kwa kgorong ya Hamathe.”
Letsatsi morago ga moletlo, kgotsa letsatsi la bo15.
Kgotsa “ntlo ya segosi.”
Seheb., “ke tla e dira seane.”