Ditiragalo wa Bobedi 25:1-28

  • Amasia, kgosi ya Juda (1-4)

  • Ntwa kgatlhanong le Edoma (5-13)

  • Amasia o obamela medingwana (14-16)

  • Ntwa kgatlhanong le Kgosi Jehoashe wa Iseraele (17-24)

  • Loso lwa ga Amasia (25-28)

25  Amasia o ne a na le dingwaga di le 25 fa a nna kgosi, mme o ne a busa dingwaga di le 29 mo Jerusalema. Leina la ga mmaagwe e ne e le Jehoadane wa kwa Jerusalema.+  O ne a tswelela a dira se se siameng mo matlhong a ga Jehofa, mme gone e seng ka pelo e e feletseng.  Fela fa a sena go dira gore bogosi bo nne mo taolong ya gagwe, o ne a bolaya batlhanka ba gagwe ba ba neng ba bolaile rraagwe yo e neng e le kgosi.+  Mme gone, o ne a se ka a bolaya barwa ba bone, ka gonne o ne a dira go dumalana le se se kwadilweng mo Molaong mo bukeng ya ga Moshe, mo Jehofa a neng a laela jaana: “Borre ga ba a tshwanela go bolawa ka ntlha ya barwa ba bone, le barwa ga ba a tshwanela go bolawa ka ntlha ya borraabone; mme mongwe le mongwe o tshwanetse go bolaelwa boleo jwa gagwe.”+  Amasia o ne a phutha batho ba Juda mme a ba laela gore ba eme go ya ka dikgotla tsa bone, ba okametswe ke baokamedi ba dikete le baokamedi ba makgolo ba Juda yotlhe le Benjamine.+ O ne a ba kwadisa go simolola ka ba ba nang le dingwaga di le 20 go ya kwa godimo,+ mme o ne a fitlhela e le batlhabani ba ba katiseditsweng* go direla mo sesoleng ba le 300 000, ba ba kgonang go tshola lerumo le thebe e kgolo.  Mo godimo ga moo, o ne a thapa batlhabani ba ba maatla ba ba tswang kwa Iseraele ba le 100 000 ka ditalenta* tsa selefera di le 100.  Le fa go ntse jalo, monna mongwe wa Modimo wa boammaaruri o ne a tla kwa go ene, a re: “Ao tlhe kgosi, o se ka wa letla mophato wa masole a Iseraele gore o tsamaye le wena, ka gonne Jehofa ga a na le Iseraele,+ e bile ga a na le ope wa Baeferaime.  Go na le moo, tsamaya o le nosi, mme o nne le bopelokgale jwa go lwa. Go seng jalo, Modimo wa boammaaruri a ka nna a dira gore mmaba wa gago a go fenye, ka gonne Modimo o na le maatla a go go thusa+ le a go dira gore o kgopiwe.”  Foo Amasia o ne a raya monna wa Modimo wa boammaaruri a re: “Mme go tweng ka ditalenta di le 100 tse ke di neileng masole a Iseraele?” Monna wa Modimo wa boammaaruri o ne a mo araba a re: “Jehofa o na le bokgoni jwa go go naya mo gontsi thata go feta seo.”+ 10  Ka jalo, Amasia o ne a laela masole a a neng a tlile kwa go ene a tswa kwa Eferaime gore a boele kwa lefelong la one. Le fa go ntse jalo, a ne a galefela Juda fela thata, mme a ne a boela kwa lefelong la one a tuka bogale. 11  Go tswa foo, Amasia o ne a nna pelokgale mme a etelela masole a gagwe pele go ya kwa Mokgatšheng wa Letswai,+ mme o ne a kgemetha banna ba kwa Seire ba le 10 000.+ 12  Mme banna ba Juda ba ne ba tshwara ba le 10 000 ba ntse ba tshela. Ka jalo, ba ne ba ba isa kwa godimo ga lefika ba bo ba ba latlhela kwa tlase go tswa kwa godimo ga lefika, mme botlhe ba ne ba thubagana. 13  Mme bangwe mo masoleng a Amasia a neng a a busitse gore ba se ka ba tsamaya le ene kwa ntweng,+ ba ne ba tlhasela metse ya Juda, go simologa kwa Samarea+ go fitlha kwa Bethe-horona;+ ba ne ba kgemetha batho ba le 3 000 ba bo ba gapa dithoto tse dintsi. 14  Mme fa Amasia a sena go boa a tswa go kgemetha Baedoma, o ne a tla le medimo ya batho ba kwa Seire mme a e itlhomela gore e nne medimo ya gagwe+ a bo a simolola go ikoba fa pele ga yone le go e ntshetsa ditlhabelo. 15  Ka jalo, Jehofa o ne a galefela Amasia fela thata, mme o ne a romela moporofeti kwa go ene mme a mo raya a re: “Ke ka ntlha yang fa o obamela medimo ya batho ba bangwe e e neng ya se ka ya golola batho ba yone mo seatleng sa gago?”+ 16  Fa a ntse a bua le kgosi, kgosi e ne ya mo raya ya re: “A re go tlhomile go nna mogakolodi wa kgosi?+ Didimala!+ Ke ka ntlha yang fa ba tshwanetse go go bolaya?” Foo moporofeti o ne a didimala, le fa go ntse jalo o ne a oketsa jaana: “Ke a itse gore Modimo o dirile tshwetso ya gore a go fedise, ka gonne o dirile selo seno e bile ga o a reetsa kgakololo ya me.”+ 17  Fa Kgosi Amasia wa Juda a sena go buisana le bagakolodi ba gagwe, o ne a romela molaetsa kwa go Jehoashe morwa Jehoahase morwa Jehu kgosi ya Iseraele, a re: “Tla kwano, re tle go tlhabana.”*+ 18  Kgosi Jehoashe wa Iseraele o ne a romela molaetsa ono kwa go Kgosi Amasia wa Juda: “Mofero o o mmitlwa o o kwa Lebanona o ne wa romela molaetsa kwa mosedareng o o kwa Lebanona wa re, ‘Naya morwaake morwadio gore a mo nyale.’ Le fa go ntse jalo, sebatana sa kwa Lebanona se ne sa feta mme sa gataka mofero o o mmitlwa. 19  O rile, ‘Ke* kgemethile Edoma.’+ Ka jalo, pelo ya gago e ikgodisitse e batla go galalediwa. Mme jaanong nna mo ntlong ya gago.* Ke ka ntlha yang fa o tshwanetse go ipiletsa masetlapelo gore o we, mme wa dira gore Juda e we le wena?” 20  Le fa go ntse jalo, Amasia o ne a se ka a reetsa,+ ka gonne seno se ne se tswa kwa Modimong wa boammaaruri gore a ba tsenye mo seatleng sa mmaba,+ ka gonne ba ne ba obamela medimo ya Edoma.+ 21  Ka jalo, Kgosi Jehoashe wa Iseraele o ne a tsamaya, mme ene le Kgosi Amasia wa Juda ba ne ba kopana kwa Bethe-shemeshe+ wa Juda mme ba tlhabana. 22  Batho ba Juda ba ne ba fenngwa ke Baiseraele, ka jalo mongwe le mongwe o ne a tshabela kwa legaeng* la gagwe. 23  Kgosi Jehoashe wa Iseraele o ne a tshwara Kgosi Amasia wa Juda, morwa Jehoashe morwa Jehoahase* kwa Bethe-shemeshe. Go tswa foo, o ne a mo tlisa mo Jerusalema mme a thuba lobota lwa Jerusalema go simologa mo Kgorong ya Eferaime+ go ya go fitlha kwa Kgorong ya Sekhutlo,+ sekgala sa dimetara di ka nna 178.* 24  O ne a tsaya gauta le selefera yotlhe le dilwana tsotlhe tse di neng di le mo ntlong ya Modimo wa boammaaruri tse di neng di tlhokometswe ke* Obede-edoma le tse di neng di le mo mabolokelamatlotlong a ntlo ya kgosi,*+ e bile o ne a gapa bangwe ka boikaelelo jwa gore ba tle ba rekololwe. Go tswa foo, o ne a boela kwa Samarea. 25  Amasia+ morwa Jehoashe kgosi ya Juda, o ne a tshela dingwaga di le 15 morago ga loso lwa ga Jehoashe+ morwa Jehoahase kgosi ya Iseraele.+ 26  Fa e le pego yotlhe ya botshelo jwa ga Amasia, go tswa kwa tshimologong go ya kwa bokhutlong, a ga e a kwalwa mo Bukeng ya Dikgosi Tsa Juda le Tsa Iseraele? 27  Go simologa ka nako ya fa Amasia a ne a tlogela go sala Jehofa morago, ba ne ba mo logela leano la boferefere+ kwa Jerusalema, mme o ne a tshabela kwa Lakishe, le fa go ntse jalo, ba ne ba romela banna gore ba mo latelele kwa Lakishe mme ba ne ba mmolaela teng. 28  Ka jalo, ba ne ba tla le ene ka dipitse ba bo ba mo fitlha le borraagwemogolo mo motseng wa Juda.

Dintlha Tse di Kwa Tlase

Seheb., “ba ba tlhophetsweng.”
Talenta e lekana le 34,2 kg. Bona Dintlha B14.
Kgotsa “re kopane mme re lebanye difatlhego.”
Seheb., “O.”
Kgotsa “mo ntlong ya gago ya segosi.”
Seheb., “kwa ditenteng.”
Gape o bidiwa Ahasia.
Seheb., “dikubita di le 400.” Bona Dintlha B14.
Kgotsa gongwe “di na le.”
Kgotsa “ntlo ya segosi.”