Dikgosi wa Bobedi 3:1-27

  • Jehorame, kgosi ya Iseraele (1-3)

  • Moabe o tlhanogela Iseraele (4-25)

  • Moabe o a fenngwa (26, 27)

3  Jehorame+ morwa Ahabe o ne a nna kgosi ya Iseraele mo Samarea mo ngwageng wa bo18 wa ga Kgosi Jehoshafate wa Juda, mme o ne a busa dingwaga di le 12.  O ne a nna a dira se se bosula mo matlhong a ga Jehofa, mme e seng ka selekanyo sa ga rraagwe kgotsa mmaagwe, ka gonne o ne a tlosa pilara e e boitshepo ya ga Baale e rraagwe a neng a e dirile.+  Le fa go ntse jalo, o ne a dira maleo a a tshwanang le a Jeroboame morwa Nebate a neng a dirile gore Baiseraele ba a dire.+ Ga a ka a a tlogela.  Jaanong Mesha kgosi ya Moabe o ne a ruile dinku, mme o ne a tle a ntshe dikwanyana di le 100 000 le dinku tse di sa beolwang tse ditonanyana di le 100 000 gore a duele kgosi ya Iseraele sehuba.*  Fela fa Ahabe a sena go swa,+ kgosi ya Moabe e ne ya tlhanogela kgosi ya Iseraele.+  Ka jalo, Kgosi Jehorame o ne a tswa mo Samarea mo letsatsing leo mme a phutha Iseraele yotlhe.  Gape o ne a romela molaetsa kwa go Kgosi Jehoshafate wa Juda a re: “Kgosi ya Moabe e ntlhanogetse. A o tla tsamaya le nna re ya go tlhabana le Moabe?” Foo o ne a re: “Ke tla tsamaya.+ Nna le wena re seoposengwe. Batho ba me le batho ba gago ba seoposengwe, go akaretsa le dipitse tsa me le dipitse tsa gago.”+  Go tswa foo, o ne a botsa jaana: “Re tla tsamaya ka tsela efe?” Jehorame o ne a araba jaana: “Ka tsela ya naga ya Edoma.”  Ka jalo, kgosi ya Iseraele e ne ya tsamaya le kgosi ya Juda le kgosi ya Edoma.+ Fa ba sena go tsamaya malatsi a le supa, go ne go se na metsi a a ka nowang ke masole le diruiwa tse di neng di tsamaya kwa morago ga bone. 10  Kgosi ya Iseraele e ne ya re: “Ruri re mo mathateng! Jehofa o biditse dikgosi tseno tse tharo gore a di tsenye mo seatleng sa Moabe!” 11  Foo Jehoshafate o ne a re: “A ga go na moporofeti wa ga Jehofa fano yo re ka botsang ka ene mo go Jehofa?”+ Ka jalo, mongwe wa batlhanka ba kgosi ya Iseraele o ne a araba a re: “Go na le Elisha+ morwa Shafate, yo o neng a tle a tshele metsi mo diatleng tsa ga Elija.”*+ 12  Go tswa foo, Jehoshafate o ne a re: “Lefoko la ga Jehofa le mo go ene.” Ka jalo, kgosi ya Iseraele le Jehoshafate le kgosi ya Edoma ba ne ba ya kwa go ene. 13  Elisha o ne a raya kgosi ya Iseraele a re: “O tlile go batla eng mo go nna?*+ Tsamaya o ye kwa baporofeting ba ga rrago le kwa baporofeting ba ga mmago.”+ Le fa go ntse jalo, kgosi ya Iseraele e ne ya mo raya ya re: “Nnyaa tlhe, Jehofa ke ene a biditseng dikgosi tseno tse tharo gore a di tsenye mo seatleng sa Moabe.” 14  Elisha o ne a araba a re: “Ke ikana ka Jehofa wa masomosomo, Modimo yo o tshelang, yo ke mo direlang,* fa nkabo ke sa tlotle Kgosi Jehoshafate+ wa Juda, ke ne nka se go lebe e bile ke ne nka se go tseye tsia.+ 15  Jaanong ntlisetseng moletsi wa harepa.”*+ Fela fa moletsi wa harepa a simolola go letsa, seatla sa ga Jehofa se ne sa tla mo go Elisha.+ 16  O ne a re: “Seno ke se Jehofa a se buang: ‘Epang mesele mo mokgatšheng* ono, 17  ka gonne seno ke se Jehofa a se buang: “Ga lo kitla lo bona phefo e bile ga lo kitla lo bona pula; le fa go ntse jalo, mokgatšha* ono o tla tlala metsi,+ mme lo tla nwa mo go one, lona, leruo la lona le diphologolo tse dingwe tsa lona.”’ 18  Mme seno ke selo se sennye mo matlhong a ga Jehofa,+ ka gonne gape o tla tsenya Moabe mo seatleng sa lona.+ 19  Lo kgemethe motse mongwe le mongwe o o sireletsegileng+ le motse mongwe le mongwe o o e gaisang yotlhe, lo reme setlhare sengwe le sengwe se se molemo, lo katele metswedi yotlhe ya metsi e bile lo latlhele maje mo karolong nngwe le nngwe e e molemo ya naga.”+ 20  Mme mo mosong, ka nako ya fa go isiwa setlhabelo sa dijo tsa ditlhaka sa mo mosong,+ ka tshoganyetso metsi a ne a tla a tswa ntlheng ya Edoma, mme lefatshe le ne la tlala metsi. 21  Bamoabe botlhe ba ne ba utlwa gore dikgosi dingwe di ne di tlile go tlhabana le bone, ka jalo ba ne ba phutha banna botlhe ba ba neng ba tshola dibetsa,* mme ba ne ba ema fa molelwaneng. 22  E rile ba tsoga go sa le phakela, letsatsi le ne le phatsima mo metsing, mme ka fa letlhakoreng le Bamoabe ba neng ba le ka fa go lone, metsi a ne a lebega a le mahibidu jaaka madi. 23  Ba ne ba re: “Selo seno ke madi! Ruri dikgosi di bolaane ka tšhaka. Ka jalo, Bamoabe, a re yeng go itseela dithoto tsa bone!”+ 24  E rile ba goroga mo kampeng ya Baiseraele, Baiseraele ba ne ba simolola go kgemetha Bamoabe mo ba neng ba tshaba fa pele ga bone.+ Ba ne ba ya go fitlha kwa Moabe, ba tsamaya ba ntse ba kgemetha Bamoabe. 25  Ba ne ba diga metse, monna mongwe le mongwe o ne a latlhela leje mo karolong nngwe le nngwe e e molemo ya naga, ba e tlatsa ka maje; ba ne ba katela motswedi mongwe le mongwe wa metsi+ e bile ba ne ba rema setlhare sengwe le sengwe se se molemo.+ Kwa bofelong, dipota tsa maje tsa Kire-haresethe+ ke tsone fela tse di neng di setse di sa digiwa, mme masole a a neng a dikologile motse a ne a konopa maje ka motsekedi gore a o tlhasele a bo a o senye. 26  E rile kgosi ya Moabe e bona gore ba ne ba fentswe, e ne ya tsaya banna ba le 700 ba ba tshotseng ditšhaka gore ba ye kwa kgosing ya Edoma;+ le fa go ntse jalo, ga ba a ka ba kgona go dira jalo. 27  Ka jalo, o ne a tsaya morwawe wa leitibolo yo o neng a tlile go busa mo boemong jwa gagwe a bo a mo ntsha setlhabelo se se fisiwang+ mo loboteng. Mme bogale jo bogolo bo ne jwa tlela Baiseraele, ka jalo ba ne ba mo tlogela mme ba boela kwa lefatsheng la bone.

Dintlha Tse di Kwa Tlase

Kgotsa “yo e neng e le motlhanka wa ga Elija.”
Kgotsa “Ke dire eng ka wena?”
Seheb., “yo ke emang fa pele ga gagwe.”
Kgotsa “motshameki wa mmino.”
Kgotsa “molapong.”
Kgotsa “molapo.”
Kgotsa “botlhe ba ba neng ba ipofa ka lebanta.”