Dikgosi wa Bobedi 25:1-30

  • Nebukadenesare o kampa go dikologa Jerusalema (1-7)

  • Jerusalema le tempele di a senngwa; batho ba ba setseng ba isiwa Babelona (8-21)

  • Gedalia o tlhomiwa gore a okamele batho (22-24)

  • Gedalia o a bolawa; batho ba siela kwa Egepeto (25, 26)

  • Jehoiakine o a gololwa kwa Babelona (27-30)

25  Mo ngwageng wa borobongwe Sedekia a ntse a busa, mo kgweding ya bolesome, mo letsatsing la bolesome la kgwedi eo, Kgosi Nebukadenesare+ wa Babelona o ne a tla go tlhasela Jerusalema a na le mophato otlhe wa masole a gagwe.+ O ne a kampa go e dikologa a bo a aga lobota go e dikologa,+  mme o ne a kampa go dikologa motse oo go fitlha ka ngwaga wa bo11 wa ga Kgosi Sedekia.  Mo letsatsing la borobongwe la kgwedi ya bonê, tlala e ne ya nna kgolo+ mo motseng mme batho ba lefatshe leo ba ne ba se na dijo.+  Lobota lwa motse lo ne lwa thubiwa,+ mme masole otlhe a ne a tshaba go le bosigo ka kgoro e e fa gare ga dipota tse pedi gaufi le tshingwana ya kgosi, fa Bakaladia bone ba ne ba kampile go dikologa motse; mme kgosi e ne ya tsamaya ka tsela e e yang kwa Araba.+  Le fa go ntse jalo, mophato wa masole a Bakaladia o ne wa lelekisa kgosi, mme o ne wa e fitlhela fa sekakeng sa Jeriko, mme mephato yotlhe ya gagwe e ne ya gasama ya mo tlogela.  Go tswa foo, ba ne ba tshwara kgosi eo+ ba bo ba e tlisa kwa kgosing ya Babelona kwa Ribela, mme ba ne ba e atlhola.  Ba ne ba bolaya bomorwa Sedekia a ntse a lebile; go tswa foo Nebukadenesare o ne a gonya Sedekia matlho, a mmofa ka dikeetane tsa kopore a bo a mo isa kwa Babelona.+  Mo kgweding ya botlhano, mo letsatsing la bosupa la kgwedi eo, e leng mo ngwageng wa bo19 wa ga Kgosi Nebukadenesare kgosi ya Babelona, Nebusaradane+ molaodi wa bafemedi, motlhanka wa kgosi ya Babelona, o ne a tla mo Jerusalema.+  O ne a fisa ntlo ya ga Jehofa,+ ntlo ya kgosi*+ le matlo otlhe a Jerusalema;+ gape o ne a fisa ntlo ya motho mongwe le mongwe wa maemo a a kwa godimo.+ 10  Mme mophato otlhe wa masole a Bakaladia o o neng o na le molaodi wa bafemedi o ne wa thuba dipota tse di dikologileng Jerusalema.+ 11  Nebusaradane molaodi wa bafemedi o ne a tsaya batho botlhe ba ba neng ba setse mo motseng, batho ba ba neng ba ngwegetse kwa kgosing ya Babelona le batho ba bangwe botlhe a ba isa botshwarwa.+ 12  Le fa go ntse jalo, molaodi wa bafemedi o ne a tlogela bangwe ba batho ba ba humanegileng thata ba lefatshe leo gore ba bereke mo masimong a morara* le gore ba dire tiro e e boima e e patelediwang.+ 13  Mme Bakaladia ba ne ba thubaganya dipilara tsa kopore+ tse di neng di le mo ntlong ya ga Jehofa le dikolotsana+ le Lewatle la kopore+ tse di neng di le mo ntlong ya ga Jehofa, mme ba ne ba isa kopore eo kwa Babelona.+ 14  Gape ba ne ba tsaya dikane, digarawe, ditimamolelo, dikopi le dilwana tsotlhe tsa kopore tse di neng di dirisiwa mo tempeleng. 15  Molaodi wa bafemedi o ne a tsaya ditsholamolelo le dikotlele tse dinnye tse di neng di dirilwe ka gauta+ le selefera+ e e sa tswakanngwang. 16  Go ne go sa kgonege gore go lekanngwe bokete jwa kopore e e neng e dirisitswe go dira dipilara tse pedi, Lewatle le dikolotsana tse Solomone a neng a di diretse ntlo ya ga Jehofa.+ 17  Pilara nngwe le nngwe e ne e le bogodimo jwa dimetara di le 8,*+ mme tlhogo ya pilara e e mo go yone e ne e le ya kopore; mme bogodimo jwa tlhogo ya pilara e ne e le disentimetara di le 134,* mme sêfê e e kgabisang le digaranata tse di dikologileng tlhogo ya pilara, tsotlhe di ne di dirilwe ka kopore.+ Pilara ya bobedi le sêfê ya yone e e kgabisang e ne e tshwana le ya ntlha. 18  Gape molaodi wa bafemedi o ne a tsaya Seraia+ moperesiti yo mogolo, le Sefania+ e leng moperesiti yo o thusang moperesiti yo mogolo le balebedi ba dikgoro ba le bararo.+ 19  Mme mo motseng o ne a tsaya modiredimogolo wa ntlo ya kgosi a le mongwe yo o neng a okametse masole, ditsala tse dikgolo tsa kgosi di le tlhano tse di neng di le mo motseng, mmogo le mokwaledi wa molaodi wa masole, yo o neng a phuthela batho ba lefatshe leo mo tirelong ya sesole, le banna ba le 60 mo bathong fela ba lefatshe leo ba ba neng ba sa ntse ba le mo motseng. 20  Nebusaradane+ molaodi wa bafemedi o ne a ba tsaya a bo a ba isa kwa kgosing ya Babelona kwa Ribela.+ 21  Kgosi ya Babelona e ne ya ba kgemetha mme ya ba bolaela kwa Ribela kwa lefatsheng la Hamathe.+ Ka jalo, Bajuda ba ne ba tswa mo lefatsheng la bone ba ya botshwarwa.+ 22  Kgosi Nebukadenesare wa Babelona o ne a tlhoma Gedalia+ morwa Ahikame+ morwa Shafane+ gore a okamele batho ba a neng a ba tlogetse mo lefatsheng la Juda.+ 23  E rile balaodi botlhe ba mephato ya masole le mephato ya bone ba utlwa gore kgosi ya Babelona e ne e tlhomile Gedalia, ka yone nako eo ba ne ba ya kwa go Gedalia kwa Misepa. E ne e le Ishemaele morwa Nethania, Johanane morwa Karea, Seraia morwa Tanehumethe wa Monetofa le Jaasania morwa wa Momaakathe, ba na le mephato ya bone.+ 24  Gedalia o ne a ikanela balaodi bao le masole a bone mme a ba raya a re: “Lo se ka lwa boifa go nna batlhanka ba Bakaladia. Nnang mo lefatsheng leno mme lo direle kgosi ya Babelona, mme dilo di tla lo tsamaela sentle.”+ 25  Mo kgweding ya bosupa, Ishemaele+ morwa Nethania morwa Elishama, yo e neng e le wa losika lwa segosi, o ne a tla le banna ba bangwe ba le lesome ba bo ba kgemetha Gedalia mme o ne a swa, mmogo le Bajuda le Bakaladia ba ba neng ba na le ene kwa Misepa.+ 26  Morago ga moo batho botlhe, go simologa ka yo mmotlana go fitlha ka yo mogolo, go akaretsa le balaodi ba mephato ya masole, ba ne ba tshabela kwa Egepeto,+ ka gonne ba ne ba boifa Bakaladia.+ 27  Mme mo ngwageng wa bo37 wa fa Kgosi Jehoiakine+ wa Juda a le kwa botshwarwa, mo kgweding ya bo12, mo letsatsing la bo27 la kgwedi eo, Kgosi Efile-merodake wa Babelona, ka ngwaga o a neng a nna kgosi ka one, o ne a golola* Kgosi Jehoiakine wa Juda mo kgolegelong.+ 28  O ne a bua le ene ka bonolo a bo a baya setulo sa gagwe sa bogosi kwa godimo ga ditulo tsa bogosi tsa dikgosi tse dingwe tse di neng di na le ene kwa Babelona. 29  Ka jalo, Jehoiakine o ne a apola diaparo tsa gagwe tsa kgolegelo, mme o ne a ja ka metlha fa pele ga gagwe malatsi otlhe a botshelo jwa gagwe. 30  O ne a abelwa dijo ka metlha go tswa kwa kgosing, letsatsi le letsatsi, malatsi otlhe a botshelo jwa gagwe.

Dintlha Tse di Kwa Tlase

Kgotsa “ntlo ya segosi.”
Kgotsa “diterebe; moretlwa.”
Seheb., “dikubita di le 18.” Bona Dintlha B14.
Seheb., “dikubita di le tharo.”
Seheb., “o ne a tsholetsa tlhogo ya ga.”