Dikgosi wa Bobedi 24:1-20

  • Jehoiakime o a tlhanoga a bo a swa (1-7)

  • Jehoiakine, kgosi ya Juda (8, 9)

  • Batho bangwe ba isiwa Babelona (10-17)

  • Sedekia, kgosi ya Juda; o a tlhanoga (18-20)

24  Mo motlheng wa ga Jehoiakime, Kgosi Nebukadenesare+ wa Babelona o ne a tla go tlhabana le ene, mme Jehoiakime o ne a nna motlhanka wa gagwe dingwaga di le tharo. Le fa go ntse jalo, o ne a mo tlhanogela.  Foo Jehofa o ne a simolola go mo romelela ditlhopha tsa dirukutlhi tsa Bakaladia,+ tsa Basiria, tsa Bamoabe le tsa Baamone. O ne a nna a di romela kwa Juda gore a e senye, go ya ka lefoko la ga Jehofa+ le a neng a le buile ka batlhanka ba gagwe e bong baporofeti.  Eleruri seno se ne sa diragalela batho ba Juda ka taelo ya ga Jehofa, gore a ba tlose fa pele ga gagwe+ ka ntlha ya maleo otlhe a Manase a neng a a dirile,+  le ka ntlha ya madi a a se nang molato a a neng a a tsholotse,+ ka gonne o ne a tladitse Jerusalema ka madi a a se nang molato mme Jehofa o ne a sa ikemisetsa go ba itshwarela.+  Fa e le pego yotlhe ya botshelo jwa ga Jehoiakime, sotlhe se a se dirileng, a ga e a kwalwa mo bukeng ya dipego tsa metlha ya dikgosi tsa Juda?+  Go tswa foo, Jehoiakime o ne a swa jaaka borraagwemogolo;+ mme morwawe e bong Jehoiakine o ne a nna kgosi mo boemong jwa gagwe.  Kgosi ya Egepeto ga e a ka ya tlhola e tswa gape kwa lefatsheng la yone, ka gonne kgosi ya Babelona e ne e tsere sotlhe se e neng e le sa kgosi ya Egepeto,+ go simologa kwa Molapong wa Egepeto+ go ya go fitlha kwa Nokeng ya Euferatese.+  Jehoiakine+ o ne a na le dingwaga di le 18 fa a nna kgosi, mme o ne a busa dikgwedi di le tharo mo Jerusalema.+ Leina la ga mmaagwe e ne e le Nehusheta morwadia Elenathane wa mo Jerusalema.  O ne a tswelela a dira se se bosula mo matlhong a ga Jehofa, go ya ka sotlhe se rraagwe a neng a se dirile. 10  Mo nakong eo, batlhanka ba ga Kgosi Nebukadenesare wa Babelona ba ne ba tla go tlhasela Jerusalema, mme ba ne ba kampa go dikologa motse oo.+ 11  Kgosi Nebukadenesare wa Babelona o ne a tla mo motseng oo fa batlhanka ba gagwe ba ne ba kampile go o dikologa. 12  Kgosi Jehoiakine wa Juda o ne a ya kwa kgosing ya Babelona,+ a na le mmaagwe, batlhanka ba gagwe, dikgosana tsa gagwe le badiredibagolo ba gagwe ba ntlo ya kgosi;+ mme kgosi ya Babelona e ne ya mo isa botshwarwa mo ngwageng wa gagwe wa borobedi a ntse a busa.+ 13  Go tswa foo, o ne a ntsha matlotlo otlhe a ntlo ya ga Jehofa le matlotlo a ntlo ya kgosi* koo.+ O ne a thubaganya dilwana tsotlhe tsa gauta tse Solomone kgosi ya Iseraele a neng a di dirile mo tempeleng ya ga Jehofa.+ Seno se ile sa diragala fela jaaka Jehofa a ne a boleletse pele. 14  O ne a isa Jerusalema yotlhe botshwarwa, dikgosana tsotlhe,+ batlhabani botlhe ba ba maatla le badiri ba ba ditswerere le badirakatshipi* botlhe,+ o ne a isa batho ba le 10 000 botshwarwa. Ga go na ope yo o neng a tlogetswe ntle le batho ba ba humanegileng thata ba lefatshe leo.+ 15  Ka jalo, o ne a isa Jehoiakine+ botshwarwa kwa Babelona;+ gape o ne a tsaya mmaagwe kgosi, basadi ba kgosi, badiredibagolo ba gagwe ba ntlo ya kgosi le banna ba ba etelelang pele ba lefatshe leo, a ba tsaya mo Jerusalema a ba isa botshwarwa kwa Babelona. 16  Gape kgosi ya Babelona e ne ya isa botshwarwa batlhabani botlhe ba le 7 000, mmogo le badiri ba ba ditswerere le badirakatshipi* ba le 1 000, botlhe e le banna ba ba maatla e bile ba katiseditswe ntwa. 17  Kgosi ya Babelona e ne ya tlhoma Matania, rangwanaagwe Jehoiakine,+ gore a nne kgosi mo boemong jwa gagwe a bo a fetola leina la gagwe gore e nne Sedekia.+ 18  Sedekia o ne a na le dingwaga di le 21 fa a nna kgosi, mme o ne a busa dingwaga di le 11 mo Jerusalema. Leina la ga mmaagwe e ne e le Hamutale+ morwadia Jeremia yo o tswang kwa Libena. 19  O ne a tswelela a dira se se bosula mo matlhong a ga Jehofa, go ya ka sotlhe se Jehoiakime a neng a se dirile.+ 20  Dilo tseno di ile tsa direga mo Jerusalema le mo Juda ka ntlha ya bogale jwa ga Jehofa, go fitlha a ba tlosa fa pele ga gagwe.+ Mme Sedekia o ne a tlhanogela kgosi ya Babelona.+

Dintlha Tse di Kwa Tlase

Kgotsa “ntlo ya segosi.”
Kgotsa gongwe “baagi ba dithako tsa phemelo.”
Kgotsa gongwe “baagi ba dithako tsa phemelo.”