Dikgosi wa Bobedi 23:1-37

  • Josia o dira diphetogo mo motseng (1-20)

  • Go ketekiwa Tlolaganyo (21-23)

  • Josia o dira diphetogo tse dingwe mo motseng (24-27)

  • Josia o a swa (28-30)

  • Jehoahase, kgosi ya Juda (31-33)

  • Jehoiakime, kgosi ya Juda (34-37)

23  Ka jalo, kgosi e ne ya laela gore go bidiwe bagolwane botlhe ba Juda le Jerusalema.+  Morago ga moo, kgosi e ne ya ya kwa ntlong ya ga Jehofa e na le banna botlhe ba Juda, banni botlhe ba Jerusalema, baperesiti le baporofeti: tota e ne e na le batho botlhe, go simologa ka ba babotlana go fitlha ka ba bagolo. E ne ya bala mafoko otlhe a buka+ ya kgolagano+ e e neng e fitlhetswe mo ntlong ya ga Jehofa ba ntse ba reeditse.+  Kgosi e ne ya ema fa pilareng mme ya dira kgolagano* fa pele ga ga Jehofa,+ kgolagano ya gore e tla sala Jehofa morago le go boloka ditaelo tsa gagwe, dikgakololo tsa gagwe le melawana ya gagwe ka pelo yotlhe le ka moya otlhe ka go diragatsa mafoko a kgolagano eno a a neng a kwadilwe mo bukeng eno. Mme batho botlhe ba ne ba dumalana le kgolagano eo.+  Go tswa foo, kgosi e ne ya laela Hilekia+ moperesiti yo mogolo, baperesiti ba maemo a bobedi le balebedi ba dikgoro gore ba ntshe dilwana tsotlhe mo tempeleng ya ga Jehofa tse di diretsweng Baale, tse di diretsweng kota e e boitshepo*+ le tse di diretsweng lesomo lotlhe la magodimo. Morago ga moo, o ne a di fisetsa kwa ntle ga Jerusalema mo masimong a Kiderone, mme o ne a isa melora ya tsone kwa Bethele.+  Ka jalo, o ne a tlosa baperesiti ba medimo e sele mo tirong ya bone, ba ba neng ba tlhomilwe ke dikgosi tsa Juda gore ba ntshe ditlhabelo mo mafelong a a kwa godimo a a boitshepo mo metseng ya Juda le mo tikologong ya Jerusalema, mmogo le ba ba ntshang ditlhabelo ba di ntshetsa Baale, letsatsi, ngwedi, setlhopha sa dinaledi sa sodiake le lesomo lotlhe la magodimo.+  O ne a ntsha kota e e boitshepo*+ mo ntlong ya ga Jehofa a e isa kwa ntle ga Jerusalema, kwa Mokgatšheng wa Kiderone, mme o ne a e fisetsa+ mo Mokgatšheng wa Kiderone, a e sila gore e bo e nne lorole a bo a latlhela lorole lwa yone mo mabitleng a batho ba ba humanegileng.+  Gape o ne a thuba matlo a bagwebakammele ba banna ba mo tempeleng,+ a a neng a le mo ntlong ya ga Jehofa le kwa basadi ba neng ba logela matsela a a khurumetsang kota e e boitshepo* teng.  Go tswa foo, o ne a ntsha baperesiti botlhe mo metseng ya Juda, mme o ne a dira gore mafelo a a kwa godimo a a boitshepo a baperesiti ba neng ba ntsha ditlhabelo mo go one a se ka a tshwanela kobamelo, go simologa kwa Geba+ go ya kwa Beere-sheba.+ Gape o ne a thuba mafelo a a kwa godimo a a boitshepo a dikgoro a a neng a le kwa kgorong ya ga Joshua molaodi wa motse, a a neng a le ka fa molemeng fa motho a tsena ka kgoro ya motse.  Baperesiti ba mafelo ao a a kwa godimo ba ne ba sa direle kwa sebesong sa ga Jehofa kwa Jerusalema,+ le fa go ntse jalo, ba ne ba ja senkgwe se se se nang sebediso le bomorwarraabone. 10  Gape o ne a dira gore Tofethe,+ e e mo Mokgatšheng wa Bomorwa Hinoma,*+ e se ka ya tshwanela kobamelo, gore motho ope a se ka a fisa morwawe kgotsa morwadie mo molelong* a ntshetsa Moleke setlhabelo.+ 11  O ne a thibela dipitse tse dikgosi tsa Juda di neng di di tlhaoletse kobamelo ya* letsatsi gore di se ka tsa tsena mo ntlong ya ga Jehofa ka phaposi* ya ga Nathane-meleke modiredimogolo wa ntlo ya kgosi, e e neng e le mo ditselaneng tse di ruletsweng; mme o ne a fisa dikara tse di neng di tlhaoletswe kobamelo ya letsatsi.+ 12  Gape kgosi e ne ya senya dibeso tse dikgosi tsa Juda di neng di di dirile mo borulelong+ jwa phaposi e e kwa godimo ya ga Ahase, mmogo le dibeso tse Manase a neng a di dirile mo malwapeng a mabedi a ntlo ya ga Jehofa.+ O ne a di thuba a bo a gasa lorole lwa tsone mo Mokgatšheng wa Kiderone. 13  Mme kgosi e ne ya dira gore mafelo a a kwa godimo a a boitshepo a a neng a le fa pele ga Jerusalema a se ka a tshwanela kobamelo, e leng mafelo a a neng a le ka fa borwa* jwa Thaba ya Tshenyo,* a Solomone kgosi ya Iseraele a neng a a agetse Ashethorethe modimo wa mosadi yo o ferosang sebete wa Basidona; le Kemoshe modimo yo o ferosang sebete wa Moabe; le Milekome+ modimo yo o makgapha wa Baamone.+ 14  O ne a thubaganya dipilara tse di boitshepo a bo a rema dikota tse di boitshepo*+ mme o ne a tlatsa mafelo a tsone ka marapo a batho. 15  Gape o ne a thuba sebeso se se kwa Bethele, lefelo le le kwa godimo le le boitshepo le Jeroboame morwa Nebate a neng a le dirile le le neng la dira gore Baiseraele ba leofe.+ Fa a sena go thuba sebeso seo le lefelo leo le le kwa godimo, o ne a fisa lefelo le le kwa godimo, a le sila gore le nne lorole a bo a fisa kota e e boitshepo.*+ 16  E rile Josia a retologa mme a bona mabitla mo thabeng, o ne a laela gore go tsewe marapo mo mabitleng ao a bo a a fisetsa mo sebesong, a dira gore se se ka sa tshwanela kobamelo, go ya ka lefoko la ga Jehofa le le neng le builwe ke monna wa Modimo wa boammaaruri yo o neng a boleletse pele gore dilo tseno di ne di tla direga.+ 17  Go tswa foo, o ne a re: “Letlapa lele la lebitla le ke le bonang ke la ga mang?” Foo banna ba motse ba ne ba mo raya ba re: “Ke lebitla la monna wa Modimo wa boammaaruri yo o neng a tswa kwa Juda+ yo o neng a bolelela pele dilo tseno tse o di dirileng sebeso sa Bethele.” 18  Ka jalo, o ne a re: “A a ikhutse. Lo se ka lwa letla ope a tshwenya marapo a gagwe.” Ka jalo, ba ne ba se ka ba tshwenya marapo a gagwe, mmogo le marapo a moporofeti yo o neng a tswa kwa Samarea.+ 19  Gape Josia o ne a tlosa matlo otlhe a kobamelo kwa mafelong a a kwa godimo a a boitshepo a a neng a le mo metseng ya Samarea,+ a dikgosi tsa Iseraele di neng di a agile gore di kgopise Modimo, mme o ne a a dira se se tshwanang le se a neng a se dirile kwa Bethele.+ 20  Ka jalo, baperesiti botlhe ba mafelo a a kwa godimo a a boitshepo ba ba neng ba le koo, o ne a ba ntsha setlhabelo mo godimo ga dibeso, mme o ne a fisetsa marapo a batho mo go tsone.+ Morago ga moo, o ne a boela kwa Jerusalema. 21  Jaanong kgosi e ne ya laela batho botlhe ya re: “Direlang Jehofa, Modimo wa lona Tlolaganyo+ fela jaaka go kwadilwe mo bukeng eno ya kgolagano.”+ 22  Go ne go ise go ke go dirwe Tlolaganyo epe e e tshwanang le eno fa e sa le go tloga mo metlheng ya fa baatlhodi ba ne ba atlhola Iseraele kgotsa mo metlheng yotlhe ya dikgosi tsa Iseraele le dikgosi tsa Juda.+ 23  Le fa go ntse jalo, Tlolaganyo eno e e neng ya direlwa Jehofa e ne ya tshwarelwa kwa Jerusalema mo ngwageng wa bo18 wa ga Kgosi Josia. 24  Gape Josia o ne a tlosa batho ba ba dirisanang le badimo, ba ba bolelelang ditiragalo pele,+ difikantswe tsa terafime,*+ medingwana e e ferosang sebete* le dilo tsotlhe tse di ferosang sebete tse di neng di le mo lefatsheng la Juda le mo Jerusalema, gore a diragatse mafoko a Molao+ a a neng a kwadilwe mo bukeng e moperesiti Hilekia a neng a e bona mo ntlong ya ga Jehofa.+ 25  Go ne go se na kgosi epe e e tshwanang le ene pele ga gagwe, e e neng ya boela kwa go Jehofa ka pelo yotlhe le ka moya otlhe+ le ka maatla otlhe, go ya ka Molao otlhe wa ga Moshe; e bile ga go a ka ga nna le ope yo o tshwanang le ene morago ga gagwe. 26  Le fa go ntse jalo, Jehofa o ne a se ka a boa mo bogaleng jwa gagwe jo bo neng bo tuketse Juda ka ntlha ya dilo tsotlhe tse di kgopisang tse Manase a neng a di dirile gore a mo kgopise.+ 27  Jehofa o ne a re: “Juda le yone ke tla e tlosa fa pele ga me,+ fela jaaka ke tlositse Iseraele;+ mme ke tla latlha motse ono o ke o tlhophileng, e leng Jerusalema, le ntlo e ke neng ka bua ka ga yone ka re, ‘Leina la me le tla tswelela le le mo go yone.’”+ 28  Fa e le pego yotlhe ya botshelo jwa ga Josia, sotlhe se a se dirileng, a ga e a kwalwa mo bukeng ya dipego tsa metlha ya dikgosi tsa Juda? 29  Mo motlheng wa gagwe, Faro Neko kgosi ya Egepeto o ne a ya go kopana le kgosi ya Asiria kwa Nokeng ya Euferatese, mme Kgosi Josia o ne a tswa a ya go tlhabana le ene; mme e rile Neko a mmona, o ne a mmolaela kwa Megido.+ 30  Ka jalo, batlhanka ba gagwe ba ne ba tsaya setopo sa gagwe ka kara kwa Megido mme ba se tlisa mo Jerusalema ba bo ba mo fitlha mo lebitleng la gagwe. Go tswa foo, batho ba lefatshe leo ba ne ba tsaya morwa Josia e bong Jehoahase mme ba mo tlotsa ba bo ba mo tlhoma gore a nne kgosi mo boemong jwa ga rraagwe.+ 31  Jehoahase+ o ne a na le dingwaga di le 23 fa a nna kgosi, mme o ne a busa dikgwedi di le tharo mo Jerusalema. Leina la ga mmaagwe e ne e le Hamutale+ morwadia Jeremia yo o tswang kwa Libena. 32  O ne a simolola go dira se se bosula mo matlhong a ga Jehofa, go ya ka sotlhe se borraagwemogolo ba neng ba se dirile.+ 33  Faro Neko+ o ne a mo tsenya mo kgolegelong kwa Ribela+ kwa lefatsheng la Hamathe, gore a se ka a busa mo Jerusalema, go tswa foo a bo a duedisa lefatshe leo ditalenta* tsa selefera di le 100 le talenta ya gauta.+ 34  Mo godimo ga moo, Faro Neko o ne a tlhoma Eliakime morwa Josia gore a nne kgosi mo boemong jwa ga rraagwe a bo a fetola leina la gagwe gore e nne Jehoiakime; mme o ne a tsaya Jehoahase a mo isa kwa Egepeto,+ kwa a neng a swela teng.+ 35  Jehoiakime o ne a naya Faro selefera le gauta, mme o ne a tshwanelwa ke go duedisa batho lekgetho gore a neye Faro selefera e a neng a e batla. O ne a pateletsa motho mongwe le mongwe gore a ntshe selekanyo se se tlhomilweng sa selefera le gauta gore a di neye Faro Neko. 36  Jehoiakime+ o ne a na le dingwaga di le 25 fa a nna kgosi, mme o ne a busa dingwaga di le 11 mo Jerusalema.+ Leina la ga mmaagwe e ne e le Sebida morwadia Pedaia yo o tswang kwa Ruma. 37  O ne a tswelela a dira se se bosula mo matlhong a ga Jehofa,+ go ya ka sotlhe se borraagwemogolo ba neng ba se dirile.+

Dintlha Tse di Kwa Tlase

Kgotsa “ya tsosolosa kgolagano.”
Bona Gehena” mo Ditlhaloso Tsa Mafoko.
Seheb., “a se ka a ralatsa morwawe kgotsa morwadie molelo.”
Seheb., “di di neile.”
Kgotsa “phaposi ya bojelo.”
Seheb., “ka fa mojeng.” Go tewa borwa, fa motho a lebile botlhaba.
Go tewa Thaba ya Metlhware, segolobogolo karolo ya borwa e e kgakala, gape e itsiwe e le Thaba ya Molato.
Bona polelwana “Kota e e Boitshepo” mo Ditlhaloso Tsa Mafoko.
Kgotsa “medimo ya lelapa; medingwana.”
Polelwana eno ka Sehebera e ka tswa e amana le lefoko le le kayang “boloko” mme e dirisitswe e le go bontsha letlhoo.
Talenta e lekana le 34,2 kg. Bona Dintlha B14.