Dikgosi wa Bobedi 2:1-25
2 Fa Jehofa a ne a tloga a tseela Elija+ kwa magodimong* ka sefefo,+ Elija le Elisha+ ba ne ba tswa mo Gilegala.+
2 Elija o ne a raya Elisha a re: “Tsweetswee nna fano, ka gonne Jehofa o nthomile kwa Bethele.” Le fa go ntse jalo, Elisha o ne a re: “Ke ikana ka Jehofa Modimo yo o tshelang le ka wena, ga nkitla ke go tlogela.” Ka jalo, ba ne ba ya kwa Bethele.+
3 Foo bomorwa baporofeti* kwa Bethele ba ne ba tla kwa go Elisha ba bo ba mo raya ba re: “A o a itse gore gompieno Jehofa o tsaya mong wa gago gore a se ka a tlhola a nna moeteledipele wa gago?”+ Foo o ne a re: “Ke setse ke itse. Didimalang.”
4 Jaanong Elija o ne a mo raya a re: “Elisha, tsweetswee nna fano, ka gonne Jehofa o nthomile kwa Jeriko.”+ Le fa go ntse jalo, o ne a re: “Ke ikana ka Jehofa Modimo yo o tshelang le ka wena, ga nkitla ke go tlogela.” Ka jalo, ba ne ba ya kwa Jeriko.
5 Foo bomorwa baporofeti ba ba neng ba le kwa Jeriko ba ne ba tla kwa go Elisha mme ba mo raya ba re: “A o a itse gore gompieno Jehofa o tsaya mong wa gago gore a se ka a tlhola a nna moeteledipele wa gago?” Foo o ne a re: “Ke setse ke itse. Didimalang.”
6 Jaanong Elija o ne a mo raya a re: “Tsweetswee nna fano, ka gonne Jehofa o nthomile kwa Joredane.” Le fa go ntse jalo, o ne a re: “Ke ikana ka Jehofa Modimo yo o tshelang le ka wena, ga nkitla ke go tlogela.” Ka jalo, boobabedi ba ne ba tsamaya mmogo.
7 Mme bomorwa baporofeti ba le 50 le bone ba ne ba tsamaya mme ba ema kgakajana ba ba leba fa boobabedi ba ne ba eme fa Joredane.
8 Go tswa foo, Elija o ne a tsaya seaparo sa gagwe se se mo tlhaolang+ a bo a se potoka a itaya metsi ka sone, mme a ne a kgaogana a ya kwa molemeng le kwa mojeng, mme boobabedi ba ne ba kgabaganya mo mmung o o omileng.+
9 Fela fa ba sena go kgabaganya, Elija o ne a raya Elisha a re: “Kopa se o batlang gore ke se go direle pele ga ke tlosiwa fa go wena.” Ka jalo, Elisha o ne a re: “Tsweetswee, a nka amogela karolo e e menaganeng sebedi*+ ya moya wa gago?”+
10 O ne a araba jaana: “O kopile selo se se thata. Fa o ka mpona fa ke tlosiwa mo go wena, go tla direga jaaka o kopile; mme fa o ka se mpone, ga go kitla go direga.”
11 Fa ba tsamaya mo tseleng ba ntse ba bua, ka tshoganyetso kara e e tukang molelo le dipitse tse di tukang molelo+ di ne tsa ba kgaoganya, mme Elija o ne a tlhatlogela kwa magodimong* mo sefefong.+
12 Fa Elisha a ntse a lebile, o ne a goa a re: “Rra, rra! Kara ya Iseraele le masole a yone a a tsamayang ka dipitse!”+ E rile a sa tlhole a kgona go mmona, o ne a tshwara diaparo tsa gagwe mme a di gagoganya sebedi.+
13 Morago ga moo, o ne a sela seaparo sa ga Elija se se mo tlhaolang+ se se neng se ole mo go ene mme a boela morago a ya go ema fa losing lwa Joredane.
14 Go tswa foo, o ne a tsaya seaparo sa ga Elija se se mo tlhaolang se se neng se ole mo go ene a bo a itaya metsi ka sone mme a re: “Jehofa, Modimo wa ga Elija o kae?” E rile Elisha a itaya metsi, a ne a kgaogana a ya kwa molemeng le kwa mojeng, mme o ne a kgabaganya.+
15 E rile bomorwa baporofeti kwa Jeriko ba mmona a le kgakajana, ba ne ba re: “Moya wa ga Elija o ntse mo go Elisha.”+ Ka jalo, ba ne ba ya go mo kgatlhantsha mme ba ikobela fa fatshe fa pele ga gagwe.
16 Ba ne ba mo raya ba re: “Rona batlhanka ba gago re na le banna ba le 50 ba ba nonofileng. Tsweetswee, a ba tsamaye ba ye go batla mong wa gago. Gongwe moya* wa ga Jehofa o mo tsholeditse mme wa mo latlhela mo godimo ga thaba nngwe kgotsa mo mokgatšheng mongwe.”+ Le fa go ntse jalo, o ne a re: “Lo se ka lwa ba romela.”
17 Mme gone, ba ne ba nna ba mo emelela go fitlha a tlhabiwa ke ditlhong, ka jalo o ne a re: “Ba romeleng.” Ba ne ba romela banna bao ba ba 50, mme ba ne ba nna ba mmatla malatsi a le mararo mme ba se ka ba mmona.
18 Fa ba boela kwa go ene, o ne a sa ntse a le kwa Jeriko.+ Foo o ne a ba raya a re: “A ga ke a lo bolelela gore lo se ka lwa tsamaya?”
19 Fa nako e ntse e tsamaya, banna ba motse ba ne ba raya Elisha ba re: “Mong wa me o a bona gore motse ono o mo lefelong le le siameng;+ le fa go ntse jalo, metsi a teng ga a a siama e bile lefatshe ga le tlhogise sepe.”*
20 Foo o ne a re: “Ntlisetseng sekotlele se sennye se sesha mme lo tsenye letswai mo go sone.” Ka jalo, ba ne ba se tlisa kwa go ene.
21 Go tswa foo, o ne a ya kwa motsweding wa metsi mme a tshela letswai mo go sone+ a bo a re: “Seno ke se Jehofa a se buang, ‘Ke alafile metsi ano. Ga a kitla a tlhola a baka loso kgotsa a dira gore lefatshe le se ka la tlhogisa sepe.’”*
22 Mme metsi a ne a alafega go tla go fitlha mo letsatsing leno, go ya ka lefoko le Elisha a neng a le bua.
23 O ne a tswa koo a ya kwa Bethele. Fa a ntse a tsamaya mo tseleng, basimanyana bangwe ba ne ba tswa mo motseng mme ba simolola go mo sotla,+ ba ne ba nna ba mo raya ba re: “Tlhatloga, wena yo o lefatla! Tlhatloga, wena yo o lefatla!”
24 La bofelo o ne a retologa mme a ba leba a bo a ba hutsa mo leineng la ga Jehofa. Foo dibera tse pedi tse dinamagadi+ di ne tsa tswa mo sekgweng mme tsa gagolaka bana ba le 42 mo go bone.+
25 O ne a tswa koo, a nna a tsamaya a ya kwa Thabeng ya Karemele,+ mme fa a tswa koo o ne a boela kwa Samarea.
Dintlha Tse di Kwa Tlase
^ Kgotsa “kwa loaping.”
^ Polelwana “bomorwa baporofeti,” e ka tswa e kaya setlhopha sa baporofeti ba ba tseneng sekolo sa boporofeti mmogo kgotsa ba ba neng ba bereka mmogo.
^ Kgotsa “dikarolo tse pedi.”
^ Kgotsa “kwa loaping.”
^ Kgotsa “phefo.”
^ Kgotsa gongwe “lefatshe le dira gore basadi ba senyegelwe.”
^ Kgotsa gongwe “kgotsa a dira gore basadi ba senyegelwe.”
