Dikgosi wa Bobedi 17:1-41

  • Hoshea, kgosi ya Iseraele (1-4)

  • Iseraele e a fenngwa (5, 6)

  • Iseraele e isiwa botshwarwa ka ntlha ya botlhanogi (7-23)

  • Batswakwa ba isiwa kwa metseng ya Samarea (24-26)

  • Madumedi a a farologaneng a Basamarea (27-41)

17  Mo ngwageng wa bo12 wa ga Kgosi Ahase wa Juda, Hoshea+ morwa Ela o ne a nna kgosi ya Iseraele mo Samarea; o ne a busa dingwaga di le robongwe.  O ne a tswelela a dira se se bosula mo matlhong a ga Jehofa, mme gone e seng ka selekanyo sa dikgosi tsa Iseraele tse di nnileng teng pele ga gagwe.  Kgosi Shalemanesere wa Asiria o ne a tla go tlhabana le ene,+ mme Hoshea o ne a nna motlhanka wa gagwe a bo a simolola go mo duela sehuba.*+  Le fa go ntse jalo, kgosi ya Asiria e ne ya utlwa gore Hoshea o ne a na le seabe mo leanong la boferefere, ka gonne o ne a rometse barongwa kwa go Kgosi So wa Egepeto+ mme o ne a se ka a tlisa sehuba kwa kgosing ya Asiria jaaka mo dingwageng tsa pele. Ka jalo, kgosi ya Asiria e ne ya mo tswalela mo kgolegelong a bofilwe.  Kgosi ya Asiria e ne ya tlhasela lefatshe leo lotlhe, mme e ne ya ya kwa Samarea e bo e kampa go e dikologa dingwaga di le tharo.  Mo ngwageng wa borobongwe wa ga Hoshea, kgosi ya Asiria e ne ya gapa Samarea.+ Go tswa foo, e ne ya isa batho ba Iseraele botshwarwa+ kwa Asiria mme ya dira gore ba nne kwa Hala le kwa Habore kwa nokeng ya Gosane+ le mo metseng ya Bameda.+  Seno se ne sa direga ka gonne batho ba Iseraele ba ne ba leofetse Jehofa, Modimo wa bone, yo o neng a ba ntshitse kwa lefatsheng la Egepeto mo taolong ya ga Faro kgosi ya Egepeto.+ Ba ne ba obamela* medimo e mengwe,+  ba ne ba latela mekgwa ya ditšhaba tse Jehofa a neng a di lelekile fa pele ga Baiseraele, e bile ba ne ba latela mekgwa e dikgosi tsa Iseraele di neng di e tlhomile.  Baiseraele ba ne ba dira dilo tse di neng di sa siama mo matlhong a ga Jehofa, Modimo wa bone. Ba ne ba nna ba aga mafelo a a kwa godimo a a boitshepo mo metseng yotlhe ya bone,+ go simologa kwa toreng ya go lebelela go fitlha kwa motseng o o sireletsegileng.* 10  Ba ne ba nna ba itlhomela dipilara tse di boitshepo le dikota tse di boitshepo*+ mo thoteng nngwe le nngwe e e kwa godimo le ka fa tlase ga setlhare sengwe le sengwe se segolo;+ 11  mme ba ne ba tle ba kuise mosi wa ditlhabelo mo mafelong otlhe a a kwa godimo a a boitshepo fela jaaka go ne go dira ditšhaba tse Jehofa a neng a di isitse botshwarwa a di ntsha fa pele ga bone.+ Ba ne ba nna ba dira dilo tse di bosula gore ba kgopise Jehofa. 12  Ba ne ba tswelela ba direla medingwana e e ferosang sebete,*+ e Jehofa a neng a ba boleletse jaana ka yone: “Ga lo a tshwanela go dira seno!”+ 13  Jehofa o ne a nna a tlhagisa Iseraele le Juda a dirisa baporofeti botlhe ba gagwe le mmoni mongwe le mongwe wa diponatshegelo,+ a re: “Boang mo ditseleng tsa lona tse di bosula!+ Bolokang ditaelo tsa me le melao ya me go ya ka molao otlhe o ke o laetseng borraalonamogolo le o ke o lo romeletseng ka batlhanka ba me e bong baporofeti.” 14  Le fa go ntse jalo, ba ne ba se ka ba reetsa, mme ba ne ba tswelela ba le tlhogoethata jaaka* borraabonemogolo ba ba neng ba se ka ba bontsha tumelo mo go Jehofa, Modimo wa bone.+ 15  Ba ne ba tswelela ba gana melao ya gagwe le kgolagano ya gagwe+ e a neng a e dirile le borraabonemogolo le dikgakololo tsa gagwe tse a neng a di ba neile gore a ba tlhagise,+ mme ba ne ba nna ba latelela medingwana e e se nang mosola+ mme le bone ba ne ba nna ba ba se nang mosola,+ ba etsa ditšhaba tse di neng di ba dikologile tse Jehofa a neng a ba laetse gore ba se ka ba di etsa.+ 16  Ba ne ba nna ba tlogela ditaelo tsotlhe tsa ga Jehofa, Modimo wa bone, mme ba dira difikantswe tse di bopilweng tsa dinamane tse pedi+ le kota e e boitshepo,*+ mme ba ne ba ikobela masomosomo otlhe a magodimo+ e bile ba ne ba direla Baale.+ 17  Gape ba ne ba fisa bomorwaabone le bomorwadiabone mo molelong,*+ ba ne ba dira boitseanape+ e bile ba batla ditshupo, mme ba ne ba nna ba ineelela* go dira se se bosula mo matlhong a ga Jehofa, gore ba mo kgopise. 18  Ka jalo, Jehofa o ne a galefela Baiseraele fela thata, mo a neng a ba tlosa fa pele ga gagwe.+ O ne a se ka a letla ope gore a sale fa e se lotso lwa ga Juda fela. 19  Tota le Juda ga e a ka ya boloka ditaelo tsa ga Jehofa, Modimo wa bone;+ le bone ba ne ba tsamaya mo mekgweng e Iseraele e neng e e latetse.+ 20  Jehofa o ne a latlha ditlogolwana tsotlhe tsa Iseraele mme o ne a ba kokobetsa a bo a ba tsenya mo seatleng sa baba ba bone, go fitlha a ba ntshitse fa pele ga gagwe. 21  O ne a tsaya* Iseraele a e ntsha mo lelapeng la ga Dafide, mme ba ne ba dira Jeroboame morwa Nebate kgosi.+ Le fa go ntse jalo, Jeroboame o ne a faposa Iseraele gore e se ka ya sala Jehofa morago, mme o ne a dira gore ba dire boleo jo bogolo. 22  Mme batho ba Iseraele ba ne ba nna ba tsamaya mo maleong otlhe a Jeroboame a neng a a dirile.+ Ba ne ba se ka ba fapoga mo go one 23  go fitlha Jehofa a tlosa Iseraele fa pele ga gagwe, fela jaaka a ne a buile ka batlhanka ba gagwe botlhe e bong baporofeti.+ Ka jalo, Iseraele e ne ya tsewa mo lefatsheng la yone ya isiwa botshwarwa kwa Asiria,+ kwa ba neng ba nna gone go fitlha mo letsatsing leno. 24  Go tswa foo, kgosi ya Asiria e ne ya tlisa batho go tswa kwa Babelona, Kutha, Afa, Hamathe le Sefarefaime+ mme ya ba baya mo metseng ya Samarea mo boemong jwa Baiseraele; mme ba ne ba rua Samarea ba bo ba nna mo metseng ya yone. 25  Fa ba ne ba simolola go nna koo, ba ne ba sa boife* Jehofa. Ka jalo, Jehofa o ne a ba romelela ditau,+ mme di ne tsa bolaya bangwe ba bone. 26  Kgosi ya Asiria e ne ya begelwa jaana: “Ditšhaba tse o di dirileng batshwarwa mme wa di baya mo metseng ya Samarea ga di itse bodumedi* jwa Modimo wa lefatshe leo. Ka jalo, o nna a ba romelela ditau mme di a ba bolaya, ka gonne ga go na ope wa bone yo o itseng bodumedi jwa Modimo wa lefatshe leo.” 27  Foo kgosi ya Asiria e ne ya laela jaana: “Tsayang mongwe wa baperesiti yo lo mo dirileng motshwarwa yo o tswang teng, gore a boe a ye go nna teng mme a ba rute bodumedi jwa Modimo wa lefatshe leo.” 28  Ka jalo, mongwe wa baperesiti yo ba neng ba mo dirile motshwarwa go tswa kwa Samarea o ne a boa a ya go nna kwa Bethele,+ mme o ne a simolola go ba ruta gore ba tshwanetse go boifa* Jehofa jang.+ 29  Le fa go ntse jalo, setšhaba sengwe le sengwe se ne sa itirela modimo* wa sone, o se neng sa o baya mo matlong a kobamelo a a mo mafelong a a kwa godimo a a boitshepo a Basamarea ba neng ba a dirile; setšhaba sengwe le sengwe se ne sa dira jalo mo metseng ya sone. 30  Ka jalo, banna ba Babelona ba ne ba dira modimo Sukotha-benothe, banna ba Kuthe ba ne ba dira modimo Neregale, banna ba Hamathe+ ba ne ba dira modimo Ashima, 31  mme Baafa ba ne ba dira modimo Nibehase le modimo Taratake. Basefarefaime ba ne ba tle ba fise bomorwaabone mo molelong, ba ba fisetsa Aderameleke le Anameleke, e leng medimo ya kwa Sefarefaime.+ 32  Le fa gone ba ne ba boifa Jehofa, ba ne ba tlhoma baperesiti ba mafelo a a kwa godimo a a boitshepo go tswa mo bathong ba bone, mme bano ba ne ba ba direla mo matlong a kobamelo mo mafelong ao a a kwa godimo.+ 33  Ka jalo, ba ne ba boifa Jehofa, mme gone ba ne ba obamela medimo ya bone go ya ka bodumedi* jwa ditšhaba tse ba neng ba tswa kwa go tsone.+ 34  Go tla go fitlha mo letsatsing leno, ba ntse ba latela madumedi* a bone a pele. Ga go ope wa bone yo o obamelang* Jehofa, e bile ga go ope yo o ikobelang melao ya gagwe, dikatlholo tsa gagwe, Molao, le ditaelo tse Jehofa a neng a di neile bomorwa Jakobe, yo leina la gagwe le neng la fetolwa gore e nne Iseraele.+ 35  Fa Jehofa a ne a dira kgolagano le Baiseraele,+ o ne a ba laela a re: “Ga lo a tshwanela go boifa medimo e mengwe e bile ga lo a tshwanela go e ikobela kgotsa go e direla kgotsa go e ntshetsa ditlhabelo.+ 36  Mme Jehofa, yo o lo ntshitseng kwa lefatsheng la Egepeto ka maatla a magolo le ka lebogo le le otlolotsweng,+ ke Ene yo lo tshwanetseng go mmoifa,+ mme lo tshwanetse go mo ikobela, e bile lo tshwanetse go mo ntshetsa ditlhabelo. 37  Mme ka metlha lo latele ka kelotlhoko melawana, dikatlholo, Molao, le ditaelo tse a di lo kwaletseng,+ e bile ga lo a tshwanela go boifa medimo e mengwe. 38  Ga lo a tshwanela go lebala kgolagano e ke e dirileng le lona,+ e bile ga lo a tshwanela go boifa medimo e mengwe. 39  Jehofa, Modimo wa lona ke ene yo lo tshwanetseng go mmoifa, ka gonne ke ene yo o tla lo gololang mo seatleng sa baba botlhe ba lona.” 40  Le fa go ntse jalo, batho ba ditšhaba tseno ga ba a ka ba reetsa, mme ba ne ba latela bodumedi* jwa bone jwa pele.+ 41  Ka jalo, ba ne ba boifa Jehofa,+ mme gape ba ne ba direla ditshwantsho tsa bone tse di betlilweng. Bomorwaabone le ditlogolwana tsa bone tsa basimane, ba ne ba dira fela jaaka borraabonemogolo ba dirile go tla go fitlha mo letsatsing leno.

Dintlha Tse di Kwa Tlase

Seheb., “boifa.”
Go tewa mo lefelong lengwe le lengwe, le ka tswa le na le batho ba le mmalwa kgotsa ba le bantsi.
Bona polelwana “Kota e e boitshepo” mo Ditlhaloso Tsa Mafoko.
Polelwana eno ka Sehebera e ka tswa e amana le lefoko le le kayang “boloko” mme e dirisitswe e le go bontsha letlhoo.
Seheb., “ba ne ba kgwaralatsa melala ya bone jaaka melala ya.”
Seheb., “ba ne ba ralatsa bomorwaabone le bomorwadiabone molelo.”
Seheb., “ithekisetsa.”
Seheb., “gagola.”
Kgotsa “obamele.”
Kgotsa “mekgwa ya bodumedi.”
Kgotsa “obamela.”
Kgotsa “medimo.”
Kgotsa “mekgwa ya bodumedi.”
Kgotsa “mekgwa ya bodumedi.”
Seheb., “boifang.”
Kgotsa “mekgwa ya bodumedi.”