Ditiragalo wa Ntlha 28:1-21

  • Mafoko a ga Dafide a a amanang le go agiwa ga tempele (1-8)

  • Solomone o newa ditaelo le polane (9-21)

28  Go tswa foo, Dafide o ne a phuthela dikgosana tsotlhe tsa Iseraele kwa Jerusalema: dikgosana tsa ditso, baokamedi ba mephato+ e e direlang kgosi, baokamedi ba dikete le baokamedi ba makgolo,+ baokamedi ba dithoto tsotlhe le diruiwa tsa kgosi+ le tsa bomorwawe,+ mmogo le badiredibagolo ba ntlo ya kgosi le monna mongwe le mongwe yo o maatla e bile a na le bokgoni.+  Foo Kgosi Dafide o ne a ema ka dinao mme a re: “Ntheetsang bomorwarre le batho ba me. E ne e le keletso ya pelo ya me go agela letlole la kgolagano ya ga Jehofa ntlo gore e nne lefelo le le tla nnang mo go lone le gore e nne sebeo sa dinao sa Modimo wa rona,+ mme ke ne ke dirile dithulaganyo tsa go aga.+  Le fa go ntse jalo, Modimo wa boammaaruri o ne a nthaya a re, ‘Ga o kitla o agela leina la me ntlo,+ ka gonne o monna wa dintwa e bile o bolaile batho ba le bantsi.’*+  Mme gone, Jehofa, Modimo wa Iseraele o ne a tlhopha nna mo go botlhe ba lelapa la ga rre gore ke nne kgosi ya Iseraele ka bosakhutleng,+ ka gonne o ne a tlhophile Juda go nna moeteledipele,+ mme go tswa mo lotsong lwa ga Juda, a tlhopha lelapa la ga rre,+ mme go tswa mo go bomorwarre, o ne a amogela nna, gore a ntire kgosi mo Iseraele yotlhe.+  Jehofa o ne a ntshegofatsa ka barwa ba le bantsi,+ mme mo go bone botlhe o ne a tlhopha Solomone+ gore a nne mo setulong sa bogosi sa ga Jehofa mo Iseraele.+  “O ne a nthaya a re, ‘Morwao e bong Solomone ke ene yo o tla agang ntlo ya me le malwapa a me, ka gonne ke mo tlhophile gore a nne morwaake, mme ke tla nna rraagwe.+  Ke tla tiisa bogosi jwa gagwe thata gore bo nne ka bosakhutleng+ fa a ka ikemisetsa go boloka ditaelo tsa me le ditshwetso tsa me tsa boatlhodi,+ jaaka a dira gone jaanong.’  Ka jalo, ke bua jaana fa pele ga matlho a Iseraele yotlhe, e leng phuthego ya ga Jehofa, mme Modimo wa rona le ene a reeditse: Batlang ditaelo tsotlhe tsa ga Jehofa, Modimo wa lona ka kelotlhoko mme lo di boloke, gore lo tle lo rue lefatshe le le molemo+ lo bo lo le fetisetse mo go bomorwaalona ba ba tla tlang morago ga lona e le boswa jo bo nnelang ruri.  “Mme wena Solomone morwaaka, itse Modimo wa ga rrago mme o mo direle ka pelo e e feletseng*+ e bile o mo direle ka boitumelo,* ka gonne Jehofa o tlhatlhoba dipelo tsotlhe,+ e bile o lemoga dikakanyo le dikeletso tsotlhe.+ Fa o mmatla, o tla dira gore o mmone,+ mme fa o mo tlogela, o tla go latlha ka bosakhutleng.+ 10  Jaanong o nne kelotlhoko, ka gonne Jehofa o go tlhophile gore o age ntlo e e tla nnang lefelo le le boitshepo. Nna pelokgale mme o ye go dira.” 11  Go tswa foo, Dafide o ne a naya morwawe e bong Solomone polane+ ya mathudi+ le ya matlo a yone, diphaposi tsa yone, mabolokelo a yone, matlwana a yone a a kwa borulelong, diphaposi tsa yone tse di kwa teng le ntlo e Modimo a itshwarelang maleo a batho mo go yone.*+ 12  O ne a mo naya polane ya sengwe le sengwe se a neng a se boleletswe ka tlhotlheletso,* polane eo e le ya malwapa+ a ntlo ya ga Jehofa, diphaposi tsotlhe tsa bojelo tse di dikologileng ntlo, mabolokelamatlotlo a ntlo ya Modimo wa boammaaruri le ya mabolokelamatlotlo a dilo tse di dirilweng boitshepo;*+ 13  gape o ne a mo naya ditaelo ka ga ditlhopha tsa baperesiti+ le tsa Balefi, ditiro tsotlhe tse di dirwang mo ntlong ya ga Jehofa le dilwana tsotlhe tse di dirisiwang mo ntlong ya ga Jehofa; 14  gape o ne a mmolelela bokete jwa gauta, gauta ya dilwana tsotlhe tse di dirisiwang mo ditirong tse di farologaneng, bokete jwa dilwana tsotlhe tsa selefera le dilwana tsotlhe tse di dirisiwang mo ditirong tse di farologaneng; 15  le bokete jwa ditlhomo tsa dipone tsa gauta+ le dipone tsa tsone tsa gauta, bokete jwa ditlhomo tse di farologaneng tsa dipone le dipone tsa tsone, le bokete jwa ditlhomo tsa dipone tsa selefera, setlhomo sengwe le sengwe sa dipone le dipone tsa sone go ya kafa se dirisiwang ka gone; 16  gape o ne a mmolelela bokete jwa gauta ya ditafole tsa senkgwe se se tlhatlagantsweng,*+ ya tafole nngwe le nngwe, mmogo le bokete jwa selefera ya ditafole tsa selefera, 17  bokete jwa diforoko, dikotlele, dinkgo tsa gauta e e sa tswakanngwang le bokete jwa dikotlele tse dinnye tsa gauta,+ jwa sekotlele sengwe le sengwe se sennye, le bokete jwa dikotlele tse dinnye tsa selefera, jwa sekotlele sengwe le sengwe se sennye. 18  gape o ne a mmolelela bokete jwa gauta e e itshekisitsweng ya sebeso sa maswalo+ le ya setshwantsho se se emelang kara,+ e leng ditšheruba+ tsa gauta tse di tsharolotseng diphuka tsa tsone e bile di okame letlole la kgolagano ya ga Jehofa. 19  Dafide o ne a re: “Seatla sa ga Jehofa se ne se le mo go nna e bile o ne a nnaya temogo ya gore ke kwale dintlha tsotlhe tsa polane.”+ 20  Go tswa foo, Dafide o ne a raya morwawe e bong Solomone a re: “O nne pelokgale o bo o nonofe mme o ye go dira. O se ka wa boifa kgotsa wa tshoga, ka gonne Jehofa Modimo, Modimo wa me, o na le wena.+ Ga a kitla a go latlha kgotsa a go tlogela,+ mme o tla nna le wena go fitlha tiro yotlhe e e dirwang mo ntlong ya ga Jehofa e wediwa. 21  Mme tseno ke ditlhopha tsa baperesiti+ le tsa Balefi+ ba tirelo yotlhe ya ntlo ya Modimo wa boammaaruri. Gape o na le badiri ba ba ikemiseditseng le ba ba nang le bokgoni jwa go dira tiro nngwe le nngwe,+ mmogo le dikgosana+ le batho botlhe ba ba tla diragatsang ditaelo tsotlhe tsa gago.”

Dintlha Tse di Kwa Tlase

Seheb., “e bile o tsholotse madi.”
Kgotsa “e e ineetseng ka botlalo.”
Kgotsa “ka go rata.”
Kgotsa “lefelo le ba bayang sekhurumelo sa letlole mo go lone.”
Seheb., “ka moya.”
Kgotsa “dilo tse di neetsweng Modimo.”
Go tewa senkgwe se se bewang fa pele ga Modimo.