Dikgosi wa Ntlha 4:1-34

  • Puso ya ga Solomone (1-19)

  • Botshelo jo bo itumedisang mo pusong ya ga Solomone (20-28)

    • Polokesego ka fa tlase ga setlhare sa morara le setlhare sa mofeige (25)

  • Botlhale jwa ga Solomone le diane tsa gagwe (29-34)

4  Kgosi Solomone o ne a busa Iseraele yotlhe.+  Bano e ne e le badiredibagolo ba gagwe:* Asaria morwa Sadoke+ e ne e le moperesiti;  Elihorefe le Ahija, bomorwa Shisha e ne e le bakwaledi;+ Jehoshafate+ morwa Ahilude e ne e le mokwadi wa ditiragalo;  Benaia+ morwa Jehoiada o ne a okametse masole; Sadoke le Abiathare+ e ne e le baperesiti;  Asaria morwa Nathane+ o ne a okametse baokamedi; Sabude morwa Nathane e ne e le moperesiti e bile e le tsala ya kgosi;+  Ahishare o ne a okametse ba ntlo ya segosi; mme Adonirame+ morwa Abada o ne a okametse ba ba neng ba tlhophilwe gore ba berekele kgosi.+  Solomone o ne a na le baokamedi ba le 12 mo Iseraele yotlhe ba ba neng ba tlamela kgosi le botlhe ba ba nnang mo ntlong ya gagwe ka dijo. Mongwe le mongwe wa bone o ne a na le boikarabelo jwa go ntsha dijo kgwedi e le nngwe mo ngwageng.+  Ano e ne e le maina a bone: Morwa Hure, kwa kgaolong e e dithaba ya Eferaime;  morwa Dekere, kwa Makasa, Shaalabime,+ Bethe-shemeshe le Elone-bethe-hanane; 10  morwa Hesede, kwa Arubothe (o ne a okametse Sokho le naga yotlhe ya Hefere); 11  morwa Abinadabe, kwa mekgokoloseng yotlhe ya Dora (o ne a nyala morwadia Solomone e bong Tafathe); 12  Baana morwa Ahilude, kwa Taanake, Megido+ le Bethe-sheane+ yotlhe, e e fa thoko ga Sarethane kwa tlase ga Jesereele, go simologa kwa Bethe-sheane go ya kwa Abele-mehola go ya go fitlha kwa kgaolong ya Jokemeame;+ 13  morwa Gebere, kwa Ramothe-gileade+ (o ne a okametse metse ya ditente ya ga Jaire+ morwa Manase, e e mo Gileade;+ gape o ne a okametse kgaolo ya Aregobe,+ e e kwa Bashana:+ metse e megolo e le 60 e e nang le dipota le mephakalego ya kopore); 14  Ahinadabe morwa Ido, kwa Mahanaime;+ 15  Ahimaase, kwa Nafetali (o ne a nyala Basemathe, mongwe wa bomorwadia Solomone); 16  Baana morwa Hushai, kwa Ashera le Bealothe; 17  Jehoshafate morwa Parua, kwa Isakare; 18  Shimei+ morwa Ela, kwa Benjamine;+ 19  Gebere morwa Uri, kwa nageng ya Gileade,+ kwa nageng ya ga Sihone+ kgosi ya Baamore le kwa nageng ya ga Oge+ kgosi ya Bashana. Gape go ne go na le mookamedi a le mongwe yo o okametseng baokamedi bano botlhe mo nageng. 20  Batho ba Juda le ba Iseraele ba ne ba le bantsi jaaka motlhaba* o o fa lewatleng;+ ba ne ba ja, ba nwa e bile ba itumetse.+ 21  Solomone o ne a busa magosi otlhe go simologa kwa Nokeng*+ go ya kwa lefatsheng la Bafilisitia le go ya kwa molelwaneng wa Egepeto. Ba ne ba tlisetsa Solomone sehuba* e bile ba ne ba mo direla malatsi otlhe a botshelo jwa gagwe.+ 22  Dijo tsa ga Solomone tsa letsatsi le letsatsi e ne e le bupi jo bo boleta jwa dikilogerama di le 3 300* le bupi jwa dikilogerama di le 6 600,* 23  dikgomo tse di fepelwang mo masakeng di le 10, dikgomo tse di fudisiwang di le 20 le dinku di le 100, kwantle ga dikgama tse ditonanyana, ditshephe, dikgama le dinonyane tsa digootsane tse di fepilweng sentle. 24  Gonne o ne a laola sengwe le sengwe se se ka kwano ga Noka,*+ go simologa kwa Tifesa go ya kwa Gasa,+ go akaretsa le dikgosi tsotlhe tse di ka kwano ga Noka; mme o ne a itumelela kagiso mo kgaolong nngwe le nngwe, gotlhe fela go mo dikologa.+ 25  Batho ba Juda le ba Iseraele ba ne ba nna ka polokesego, mongwe le mongwe ka fa tlase ga setlhare sa gagwe sa morara* le ka fa tlase ga setlhare sa gagwe sa mofeige, go simologa kwa Dana go ya kwa Beere-sheba, malatsi otlhe a ga Solomone. 26  Mme Solomone o ne a na le masakana a dipitse a le 4 000* a dikara tsa gagwe le dipitse* di le 12 000.+ 27  Baokamedi bano ba ne ba tlamela Kgosi Solomone ka dijo le mongwe le mongwe yo o neng a ja mo tafoleng ya ga Kgosi Solomone. Mongwe le mongwe wa bone o ne a dira maikarabelo a gagwe mo kgweding ya gagwe e bile a tlhomamisa gore ga go na sepe se se tlhaelang.+ 28  Gape ba ne ba tlisa barele* le lotlhaka fa lo ne lo tlhokega gore go fepiwe dipitse le ditlhopha tsa dipitse, mongwe le mongwe go ya ka kabelo ya gagwe. 29  Mme Modimo o ne a naya Solomone botlhale le temogo ka selekanyo se segolo thata le pelo e e tlhaloganyang* jaaka motlhaba o o fa losing lwa lewatle.+ 30  Botlhale jwa ga Solomone bo ne bo feta botlhale jwa batho botlhe ba Botlhaba le botlhale jotlhe jwa Egepeto.+ 31  O ne a le botlhale go feta motho ope fela, a le botlhale go feta Ethane+ wa Moesera le Hemane,+ Kalekole+ le Dareda, bomorwa Mahole; go tuma ga gagwe go ne ga anamela mo ditšhabeng tsotlhe tse di ba dikologileng.+ 32  O ne a tlhama* diane+ di le 3 000, mme dipina+ tsa gagwe di ne di le 1 005. 33  O ne a tle a bue ka ditlhare, go simologa ka mosedara o o kwa Lebanona go fitlha ka mosiama+ o o tlhogang mo loboteng; o ne a tle a bue ka diphologolo,+ dinonyane,*+ dilo tse di gopang*+ le ditlhapi. 34  Batho ba ba tswang mo ditšhabeng tsotlhe ba ne ba tla go utlwa botlhale jwa ga Solomone, go akaretsa dikgosi tse di tswang mo lefatsheng lotlhe tse di neng di utlwile ka botlhale jwa gagwe.+

Dintlha Tse di Kwa Tlase

Kgotsa “dikgosana tsa gagwe.”
Kgotsa “moshawa.”
Go tewa Euferatese.
Seheb., “dilekanyo tsa koro di le 30.” Bona Dintlha B14.
Seheb., “dilekanyo tsa koro di le 60.”
Go tewa ka fa bophirima jwa Euferatese.
Kgotsa “diterebe; moretlwa.”
Palo eno e fitlhelwa mo mekwalong mengwe ya seatla le mo pegong e e tsamaisanang le temana eno. Mekwalo e mengwe ya seatla ya re 40 000.
Kgotsa “bapalami ba dipitse.”
Semela se se tshwanang le korong.
Seheb., “pelo e e atlhameng.”
Kgotsa “bua.”
Kgotsa “ditshedi tse di fofang.”
Gongwe go akaretsa digagabi le ditshenekegi.