Bathesalonika wa Ntlha 1:1-10

  • Ditumediso (1)

  • Paulo o leboga go bo Bathesalonika ba na le tumelo (2-10)

1  Nna Paulo, Silefano*+ le Timotheo,+ re kwalela phuthego e e kwa Thesalonika e e seoposengwe le Modimo Rara le Morena Jesu Keresete: E kete lo ka nna le bopelonomi jo bogolo* le kagiso.  Re leboga Modimo ka metlha fa re lo umaka lotlhe mo dithapelong tsa rona,+  gonne ga re lebale tiro e lo neng lwa e dira ka boikanyegi le ka lorato, le kafa lo neng lwa itshokela mathata ka gone ka ntlha ya tsholofelo+ e lo nang le yone mo Moreneng wa rona Jesu Keresete fa pele ga Modimo Rara wa rona.  Gonne lona bakaulengwe ba ba ratiwang ke Modimo, re a itse gore Modimo o lo tlhophile,  ka gonne ga lo a utlwa dikgang tse di molemo ka mafoko fela mme lo di utlwile lo thusiwa ke moya o o boitshepo. Re ne re tlhatswegile pelo gore se re neng re lo bolelela sone se ne se le boammaaruri, e bile molaetsa wa rona o lo thusitse fela thata.  Le fa lo ne lo bogisiwa mo go botlhoko, lo ne lwa amogela lefoko+ ka boitumelo jo bo nnang gone ka ntlha ya moya o o boitshepo, mme ka tsela eo lo ne lo etsa Morena+ le rona,+  mo lo neng lwa nna sekao mo badumeding botlhe kwa Makedonia le mo Akaia.  Boammaaruri ke gore, ga lo a itsise lefoko la ga Jehofa* kwa Makedonia le mo Akaia fela, mme tsela e lo dumelang ka yone mo Modimong, e anametse kgakala kwa lefelong lengwe le lengwe,+ mo e leng gore ga re tlhoke go bua sepe.  Gonne batho ba ba nnang mo mafelong ano ba nna ba bua ka tsela e re neng ra kopana le lona lekgetlo la ntlha ka yone, le kafa lo neng lwa tlogela medingwana+ ya lona ka gone mme lwa simolola go direla Modimo yo o tshelang le wa boammaaruri. 10  Gape ba nna ba tlhalosa gore lo letetse Morwawe go tswa kwa magodimong,+ yo a neng a mo tsosa mo baswing, e bong Jesu, ene yo o re gololang mo bogaleng jo bo tlang.+

Dintlha Tse di Kwa Tlase

Gape o bidiwa Silase.