Joshua 7:1-26

7  Mme bomorwa Iseraele ba dira tiro ya go sa ikanyege ka ga selo se se neeletsweng tshenyego ka ntlha ya gore Akane+ morwa Karami, morwa Sabedi, morwa Sera, wa lotso lwa Juda, o ne a tsaya sengwe sa selo se se neeletsweng tshenyego.+ Foo bogale jwa ga Jehofa jwa tukela bomorwa Iseraele.  Foo Joshua a romela banna go tswa Jeriko go ya Ai,+ o o gaufi le Bethe-afene, kwa botlhaba jwa Bethele,+ a ba raya a re: “Tlhatlogang lo ye go tlhola lefatshe.” Ka jalo banna bano ba tlhatloga ba ya go tlhola Ai.  Morago ga moo ba boela kwa go Joshua mme ba mo raya ba re: “A go se ka ga tlhatloga batho botlhe. A go tlhatloge banna ba ka nna dikete di le pedi kgotsa ba ka nna dikete di le tharo go ya go kgemetha Ai. O se ka wa lapisa batho botlhe ka go ya koo, gonne ba mmalwanyana.”  Ka jalo banna ba batho ba ka nna dikete di le tharo ba tlhatlogela gone, mme ba tshaba fa pele ga banna ba Ai.+  Mme banna ba Ai ba kgemetha banna ba ka nna masome a mararo le borataro ba bone, ba ba latelela+ go tswa fa pele ga kgoro go ya go fitlha kwa Shebarime mme ba tswelela ba ba kgemetha mo mokgokoloseng. Ka gone dipelo tsa batho tsa simolola go nyera mme tsa nna jaaka metsi.+  Foo Joshua a gagoganya diaparo tsa gagwe a wela fa fatshe ka sefatlhego+ fa pele ga letlole la ga Jehofa go fitlha maitseboa, ene le banna ba bagolwane ba Iseraele, mme ba nna ba itshela lorole mo ditlhogong.+  Mme Joshua a re: “Ijoo, Morena Molaodimogolo Jehofa, ke ka ntlha yang fa o ne o tlisa batho bano tsela yotlhe o ba kgabagantsha Joredane, fela gore o re tsenye mo seatleng sa Baamore gore ba re senye? Bogolo re ka bo re ile ra tswelela re nna ka kwa letlhakoreng le lengwe la Joredane!  Intshwarele, tlhe Jehofa, mme ke tla reng morago ga Iseraele a sena go naya baba ba gagwe mokwatla?  Bakanana le banni botlhe ba lefatshe leno ba tla utlwa ka gone, mme ruri ba tla re dikanyetsa ba bo ba fedisa leina la rona mo lefatsheng;+ mme ke eng se o tla se direlang leina la gago le legolo?”+ 10  Foo Jehofa a raya Joshua a re: “Nanoga wena! Ke ka ntlha yang fa o ole ka sefatlhego? 11  Iseraele o leofile, ba tlodile le kgolagano+ ya me e ke ba e laoletseng; gape ba tsere sengwe sa selo se se neeletsweng tshenyego e bile ba utswile+ mme gape ba go boloka e le sephiri+ le gone ba go tsentse mo dilwaneng tsa bone. 12  Mme bomorwa Iseraele ga ba kitla ba kgona go tsogologela baba+ ba bone. Ba tla naya baba ba bone mokwatla fa pele ga bone, ka gonne ba fetogile selo se se neeletsweng tshenyego. Ga nkitla ke nna le lona gape fa lo sa nyeletse selo se se neeletsweng tshenyego lwa se ntsha mo gare ga lona.+ 13  Nanoga! Itshepise batho,+ mme o re, ‘Lo iitshepiseng ka moso, gonne Jehofa Modimo wa Iseraele o buile jaana: “Go na le selo se se neeletsweng tshenyego mo gare ga gago, wena Iseraele. Ga o kitla o kgona go tsogologela baba ba gago go fitlha lo ntshitse selo se se neeletsweng tshenyego mo gare ga lona. 14  Mme lo itlhagise mo mosong, lotso ka lotso, mme go tla diragala gore lotso lo Jehofa a lo tlhophang+ lo atamele, lelapa ka lelapa, mme lelapa le Jehofa a le tlhophang le atamele, ntlo ka ntlo, mme ntlo e Jehofa a e tlhophang e atamele, banna ba ba nonofileng ka go latelana ga bone. 15  Mme go tla diragala gore yo o tlhophiwang a na le selo se se neeletsweng tshenyego o tla fisiwa ka molelo, ene le tsotlhe tsa gagwe, ka gonne a tlodile kgolagano+ ya ga Jehofa le ka gonne a dirile bosula jwa matlhabisa ditlhong mo Iseraele.”’”+ 16  Foo Joshua a tsoga go sa le phakela mme a dira gore Iseraele e atamele, lotso ka lotso, mme ga tlhophiwa lotso lwa Juda. 17  Morago ga moo a dira gore go atamediwe malapa a Juda mme a tlhopha lelapa la Basera,+ morago ga moo a dira gore go atamediwe lelapa la Basera, banna ba ba nonofileng ka go latelana ga bone, mme ga tlhophiwa Sabedi. 18  La bofelo a dira gore go atamediwa lelapa la gagwe, banna ba ba nonofileng ka go latelana ga bone, le Akane morwa Karami, morwa Sabedi, morwa Sera, wa lotso lwa Juda, a tlhophiwa.+ 19  Foo Joshua a raya Akane a re: “Morwaaka, tsweetswee, naya Jehofa Modimo wa Iseraele kgalalelo+ o bo o ipolele mo go ene,+ mme o mpolelele+ tsweetswee, O dirileng? O se ka wa se mphitlhela.”+ 20  Foo Akane a araba Joshua a re: “Ruri ke leofetse Jehofa Modimo wa Iseraele,+ mme ke dirile jaana le jaana. 21  E rile ke bona seaparo se se kgethegileng se sentle mo thopong sa kwa Shinare,+ le dishekele di le makgolo a mabedi tsa selefera le setena se le sengwe sa gouta, bokete jwa sone e le dishekele di le masome a matlhano, foo ka di eletsa,+ mme ka di tsaya;+ bonang! di fitlhilwe fa fatshe fa gare ga mogope wa me le madi kafa tlase ga yone.”+ 22  Joshua a akofa a roma barongwa, mme ba sianela kwa mogopeng, mme bona! e ne e fitlhilwe mo mogopeng wa gagwe le madi kafa tlase ga yone. 23  Ka jalo ba di ntsha fa gare ga mogope ba di tlisa kwa go Joshua le bomorwa Iseraele botlhe mme ba di tshololela fa pele ga ga Jehofa. 24  Joshua, mmogo le Iseraele, jaanong ba tsaya Akane morwa Sera le selefera le seaparo se se kgethegileng le setena sa gouta le bomorwawe le bomorwadie le poo ya gagwe le esele ya gagwe le letsomane la gagwe le mogope wa gagwe le sengwe le sengwe se e neng e le sa gagwe mme ba ba tlisa kwa lebaleng le le kwa tlase la Akore.+ 25  Foo Joshua a re: “Ke ka ntlha yang fa o re tliseditse matlhabisa ditlhong?+ Jehofa o tla go tlisetsa matlhabisa ditlhong mo letsatsing leno.” Foo Iseraele yotlhe ya mo kgobotletsa ka maje,+ morago ga moo ba ba fisa ka molelo.+ Ba ba kgobotletsa jalo ka maje. 26  Mme ba koelela mokoa o mogolo wa maje mo godimo ga gagwe, go fitlha mo letsatsing leno.+ Foo Jehofa a boa mo bogaleng jwa gagwe jo bo tukang.+ Ke gone ka moo leina la lefelo leo le bidiwang Lebala le le Kwa Tlase la Akore,+ go fitlha mo letsatsing leno.

Dintlha Tse di Kwa Tlase