Joshua 4:1-24

4  Mme ga diragala gore fela fa setšhaba sotlhe se feditse go kgabaganya Joredane,+ Jehofa a raya Joshua a re:  “Itseele banna ba le lesome le bobedi mo bathong, monna a le mongwe go tswa mo lotsong longwe le longwe,  o ba laele, o re, ‘Itseeleng maje a le lesome le bobedi+ mo garegare ga Joredane, mo lefelong le dinao tsa baperesiti di neng di eme mo go lone di sa tshikhinyege, mme lo a tseye lo kgabaganye ka one mme lo a beye kwa lefelong la bonno le lo tla nnang kwa go lone bosigong jono.’”  Ka jalo Joshua a bitsa banna ba le lesome le bobedi ba a neng a ba tlhomile mo go bomorwa Iseraele, monna a le mongwe go tswa mo lotsong longwe le longwe;  mme Joshua a ba raya a re: “Fetelang kwa pele ga letlole la ga Jehofa Modimo wa lona lo ye kwa gare ga Joredane, mme mongwe le mongwe wa lona a tsholetse leje a le beye mo legetleng la gagwe, kafa palong ya ditso tsa bomorwa Iseraele,  gore seno e tle e nne sesupo mo gare ga lona.+ Fa go direga gore bomorwaalona ba botse mo nakong e e tlang ba re, ‘Ke ka ntlha yang fa lo na le maje ano?’+  Lo ba reye lo re, ‘Ka gonne metsi a Joredane a ne a emisiwa fa pele ga letlole la kgolagano ya ga Jehofa. Fa le ne le kgabaganya Joredane metsi a Joredane a ne a emisiwa, mme maje ano a tshwanetse go nna segopotso mo go bomorwa Iseraele ka bosakhutleng.’”+  Ka jalo bomorwa Iseraele ba dira jalo, fela jaaka Joshua a ne a laetse, ba tsaya maje a le lesome le bobedi mo gare ga Joredane, fela jaaka Jehofa a ne a boleletse Joshua, gore a tsamaisane le palo ya ditso tsa bomorwa Iseraele;+ mme ba kgabaganyetsa ka one kwa lefelong la bonno+ mme ba a baya koo.  Gape go ne go na le maje a le lesome le bobedi a Joshua a neng a a tlhoma mo gare ga Joredane mo lefelong le dinao tsa baperesiti ba ba sikereng letlole la kgolagano di neng di eme mo go lone, mme a ntse foo go fitlha mo letsatsing leno. 10  Mme baperesiti ba ba sikereng Letlole ba ne ba eme mo gare ga Joredane go fitlha kgang yotlhe e wediwa e Jehofa a neng a laetse Joshua gore a e bue le batho, kafa go sotlhe se Moshe a neng a se laetse Joshua.+ Mo nakong eno yotlhe batho ba ne ba itlhaganela+ ba kgabaganya. 11  Mme ga diragala gore fela fa batho botlhe ba weditse go kgabaganya, foo letlole la ga Jehofa la kgabaganya, le baperesiti, fa pele ga batho. 12  Mme bomorwa Rubene le bomorwa Gada le sephatlo sa lotso lwa ga Manase ba kgabaganya ba tlhomagane kafa thulaganyong ya tlhabano+ mo ponong ya bomorwa Iseraele, fela jaaka Moshe a ne a ba boleletse.+ 13  Go ne ga kgabaganya mo e ka nnang dikete di le masome a manè fa pele ga ga Jehofa di tlhomeletse bosole di ya ntweng kwa mabaleng a a sekaka a Jeriko. 14  Mo letsatsing leo Jehofa a dira Joshua mogolo mo matlhong a Iseraele yotlhe,+ mme ba simolola go mmoifa fela jaaka ba ne ba boifa Moshe malatsi otlhe a botshelo jwa gagwe.+ 15  Foo Jehofa a raya Joshua a re: 16  “Laela baperesiti ba ba sikereng letlole la tshupo+ gore ba tlhatloge ba tswe mo Joredane.” 17  Ka jalo Joshua a laela baperesiti, a re: “Tlhatlogang lo tswe mo Joredane.” 18  Mme ga diragala gore fa baperesiti ba ba sikereng letlole+ la kgolagano ya ga Jehofa ba tlhatloga ba tswa mo gare ga Joredane mme dipato tsa dinao tsa baperesiti di ntshediwa mo mmung o o omileng, foo metsi a Joredane a simolola go boela kwa lefelong la one mme a penologela dintshi tsotlhe tsa one jaaka pele. 19  Mme batho ba tlhatloga ba tswa mo Joredane mo letsatsing la bolesome la kgwedi ya ntlha mme ba thibelela kwa Gilegala+ mo molelwaneng o o kafa botlhaba wa Jeriko. 20  Mme maje a a lesome le bobedi a ba neng ba a ntshitse mo Joredane, Joshua a a tlhoma kwa Gilegala.+ 21  Mme a raya bomorwa Iseraele a re: “Fa bomorwaalona ba botsa borraabone mo nakong e e tlang, ba re: ‘Maje ano a kayang?’+ 22  Foo lo itsise bomorwaalona, lo re, ‘Iseraele e ne ya kgabaganya Joredane+ eno mo lefatsheng le le omileng, 23  fa Jehofa Modimo wa lona a ne a kgadisa metsi a Joredane fa pele ga bone go fitlha ba kgabagantse, fela jaaka Jehofa Modimo wa lona a ne a dirile ka Lewatle le Lehibidu fa a ne a le kgadisa fa pele ga rona go fitlha re kgabagantse;+ 24  gore ditšhaba tsotlhe tsa lefatshe di tle di itse seatla sa ga Jehofa,+ gore se nonofile;+ gore ruri lo boife Jehofa Modimo wa lona ka metlha.’”+

Dintlha Tse di Kwa Tlase