Joshua 18:1-28

18  Foo phuthego yotlhe ya bomorwa Iseraele e ne e phuthegile kwa Shilo,+ mme ba tlhoma mogope wa bokopanelo koo,+ e re ka jaanong lefatshe le ne le fentswe fa pele ga bone.+  Mme mo go bomorwa Iseraele go ne go sa ntse go setse ba ba neng ba ise ba kgaoganye boswa jwa bone, e leng, ditso tse supa.  Ka jalo Joshua a raya bomorwa Iseraele a re: “Lo tlile go gana go utlwa ka lobaka lo lo kae kaga go tsena lo ya go rua lefatshe+ le Jehofa Modimo wa borraalonamogologolwane a le lo neileng?+  Ipatleleng banna ba le bararo ba lotso longwe le longwe mme mma ke ba rome, gore ba nanoge ba tsamayetsamaye mo lefatsheng ba le thale mmapa tumalanong le boswa jwa bone, lo bo lo dire gore ba tle kwa go nna.+  Mme ba le ikgaoganyetse ka dikabelo di le supa.+ Juda o tla nna a eme mo karolong ya gagwe ya naga kafa borwa, mme ntlo ya ga Josefa e tla nna e eme mo karolong ya yone ya naga kafa bokone.  Mme lona, lo thale lefatshe mmapa ka dikabelo di le supa, mme lo di tlise fano kwa go nna, mme ke tla latlha bola+ fano ka ga lona fa pele ga ga Jehofa Modimo wa rona.  Gonne Balefi ga ba na kabelo epe mo gare ga lona,+ ka gonne boperesiti jwa ga Jehofa ke boswa jwa bone;+ mme Gada le Rubene+ le sephatlo sa lotso lwa ga Manase+ ba tsere boswa jwa bone kafa letlhakoreng le lengwe la Joredane go ela kwa botlhaba, jo Moshe motlhanka wa ga Jehofa a bo ba neileng.”+  Ka jalo banna ba nanoga gore ba tsamaye, mme Joshua a laela+ ba ba neng ba ya go thala lefatshe mmapa a re: “Yang lo tsamayetsamaye mo lefatsheng lo le thale mmapa mme lo boele kwano go nna, mme fano ke fa ke tla tshelang bola gone ka ga lona fa pele ga ga Jehofa mo Shilo.”+  Foo banna ba tsamaya mme ba ralala lefatshe ba le thala mmapa ka metse ba le dira dikabelo di le supa, mo bukeng. Morago ga moo ba tla kwa go Joshua kwa bothibelelong kwa Shilo, 10  mme Joshua a tshela bola ka ga bone kwa Shilo fa pele ga ga Jehofa.+ Ka jalo Joshua a kgaoganyetsa bomorwa Iseraele lefatshe koo ka dikabelo tsa bone.+ 11  Foo ga tswa karolo e e abilweng ka bola+ ya lotso lwa bomorwa Benjamine+ ka malapa a bone, mme karolo ya naga ya kabelo ya bone ya tswa fa gare ga bomorwa Juda le bomorwa Josefa. 12  Molelwane wa bone wa nna kwa sekhutlong se se kwa bokone go tswa Joredane, mme molelwane ono wa tlhatlogela kwa mokgokoloseng wa Jeriko kwa bokone mme wa tlhatloga thaba go ya ntlheng ya bophirima, wa felela kwa nageng ya Bathe-afene. 13  Molelwane wa kgabaganya go tswa koo go ya Luse, kwa mokgokoloseng o o kwa borwa wa Luse, ke go re, Bethele;+ mme molelwane wa fologela kwa Atarothe-adare mo thabeng e e mo borwa jwa Bethe-horone o o Kwa tlase. 14  Mme molelwane wa tshwaiwa mme wa dikologa kwa letlhakoreng le le kwa bophirima o ya borwa go tswa mo thabeng e e lebileng Bethe-horona go ya kwa borwa; mme wa felela kwa Kiriathe-baale, ke go re, Kiriathe-jearime,+ motse wa bomorwa Juda. Leno ke letlhakore la bophirima. 15  Mme letlhakore le le kafa borwa le ne le simolola kwa ntlheng ya Kiriathe-jearime, mme molelwane wa tswela kwa bophirima mme wa tswela kwa motsweding wa metsi a Nefetoa. 16  Molelwane wa fologela kwa ntlheng ya thaba e e lebileng mokgatšha wa ga morwa Hinoma,+ o o mo lebaleng le le kwa tlase la Refaime+ go ela kwa bokone, wa fologela kwa mokgatšheng wa Hinoma, kwa mokgokoloseng wa Bajebuse+ kwa borwa, o bo o fologela kwa Ene-rogele.+ 17  O ne wa tshwaiwa go ela kwa bokone mme wa tswela kwa Ene-shemeshe o bo o tswela kwa Gelilothe, o o fa pele ga botlhatlogo jwa Adumime; mme wa fologela kwa lejeng+ la ga Bohane morwa Rubene. 18  Wa kgabaganyetsa kwa mokgokoloseng wa bokone fa pele ga Areba o bo o fologela kwa Areba. 19  Mme molelwane wa kgabaganyetsa kwa mokgokoloseng wa bokone wa Bethe-hogola, mme (molelwane) wa felela kwa kgogometsong ya bokone ya Lewatle la Letswai+ kwa ntlheng e e kwa borwa ya Joredane. Ono e ne e le molelwane wa borwa. 20  Mme Joredane ya nna molelwane wa one kafa letlhakoreng la botlhaba. Jono e ne e le boswa jwa bomorwa Benjamine ka malapa a bone, ka melelwane ya jone mo tikologong yotlhe. 21  Mme metse ya lotso lwa bomorwa Benjamine ka malapa a bone ya nna Jeriko le Bethe-hogola le Emeke-kesise, 22  le Bethe-araba le Semaraime le Bethele,+ 23  le Afime le Para le Ofera,+ 24  le Kefera-moni le Ofeni le Geba;+ metse e le lesome le bobedi le metsana ya teng. 25  Gibeone+ le Rama le Beerothe, 26  le Misepa+ le Kefira+ le Mosaha, 27  le Rekeme le Irepeele le Tarala, 28  le Sela,+ Ha-elefe le Jebuse, ke go re, Jerusalema,+ Gibea+ le Kiriathe; metse e le lesome le bonè le metsana ya teng. Jono e ne e le boswa jwa bomorwa Benjamine ka malapa a bone.+

Dintlha Tse di Kwa Tlase