Jeremia 7:1-34

7  Lefoko le le neng la tla kwa go Jeremia le tswa kwa go Jehofa, le re:  “Ema mo kgorong ya ntlo ya ga Jehofa, o bolele lefoko leno teng,+ o re, ‘Utlwang lefoko la ga Jehofa, lona lotlhe ba Juda, ba lo tsenang mo dikgorong tseno go tla go ikobela Jehofa.  Jehofa wa masomosomo, Modimo wa Iseraele, o buile jaana: “Dirang ditsela tsa lona le ditiro tsa lona molemo, mme ke tla lo tlogela lo aga mo lefelong leno.+  Lo se ka lwa ikanya mafoko a tsietso,+ lo re, ‘Tempele ya ga Jehofa, tempele ya ga Jehofa, ke tempele ya ga Jehofa!’  Gonne fa e le gore ruri lo tla dira ditsela tsa lona le ditiro tsa lona molemo, fa e le gore ruri lo tla diragatsa tshiamiso mo gare ga motho le molekane wa gagwe,+  fa e le gore ga lo na go gatelela moagi ope wa moeng, mosimane yo o se nang rre le motlholagadi,+ gape lo se kitla lo tsholola madi a a se nang molato mo lefelong leno,+ e bile lo se kitla lo sala medimo e mengwe morago go itlisetsa masetlapelo,+  le nna ke tla lo tlogela lo aga mo lefelong leno, mo lefatsheng le ke neng ka le naya borraalonamogologolwane, go tswa bosasimologeng le go ya bosakhutleng.”’”+  “Bonang, lo ikanya mafoko a tsietso—ga go na go lo tswela mosola le e seng.+  A go ka utswiwa,+ ga bolawa motho+ le go dira boaka+ le go ikana ka maaka+ le go kuisetsa Baale+ musi wa setlhabelo le go sala medimo e mengwe morago e lo neng lo sa e itse,+ 10  mme lo bo lo tla lo ema fa pele ga me mo ntlong eno e leina la me le bidiwang mo go yone,+ lo re, ‘Ruri re tla gololwa,’ lo ntse lo dira dilo tseno tsotlhe tse di makgapha? 11  A ntlo eno e leina la me le bidiwang mo go yone+ e fetogile logaga fela lwa dinokwane mo matlhong a lona?+ Le nna ke se bone seo,” go bua Jehofa.+ 12  “‘Le fa go ntse jalo, tsamayang, gone jaanong, lo ye kwa lefelong la me le le neng le le kwa Shilo,+ kwa ke dirileng gore leina la me le age gone la ntlha,+ mme lo bone gore ke dirileng kwa go lone ka ntlha ya bosula jwa batho ba me ba Iseraele.+ 13  Mme jaanong ka lebaka la gore lo ne lwa nna lwa dira ditiro tseno tsotlhe,’ go bua Jehofa, ‘mme ka nna ka bua le lona, ke tsoga go sa le phakela ke bua,+ mme lwa se ka lwa reetsa,+ ka nna ka lo bitsa, mme lwa se ka lwa araba,+ 14  ke tla dira fela jalo mo ntlong e leina la me le bidiwang mo go yone,+ e lo e ikanyang,+ le mo lefelong le ke neng ka le naya lona le borraalonamogologolwane, fela jaaka ke dirile kwa Shilo.+ 15  Mme ke tla lo latlhela kwa ntle ke lo tlosa fa pele ga sefatlhego sa me,+ fela jaaka ke ne ka latlhela bomorwarraalona botlhe kwa ntle, bana botlhe ba ga Eferaime.’+ 16  “Mme fa e le wena, o se ka wa rapelela batho bano, le fa e le go ba tsholeletsa selelo sa go kopa ka tlhoafalo kgotsa thapelo le fa e le go nkokotlela,+ gonne ga ke na go go reetsa.+ 17  A ga o bone se ba se dirang mo metseng ya Juda le mo mebileng ya Jerusalema?+ 18  Barwa ba sela dikgong, mme borre ba gotsa molelo, basadi ba duba tlhama ya bupi gore ba dire dikuku tsa setlhabelo tse di yang kwa go ‘kgosigadi ya magodimo’;+ mme go tshelwa ditshupelo tsa senō+ tse di isediwang medimo e sele ka boikaelelo jwa go nkgopisa.+ 19  ‘A ke nna yo ba mo kgopisang?’ go bua Jehofa.+ ‘A ga se bone ba ikgopisang, ka boikaelelo jwa go tlisa ditlhong mo difatlhegong tsa bone?’+ 20  Ka jalo Morena Molaodimogolo Jehofa o buile jaana, ‘Bonang! Bogale jwa me le tšararego ya me di tshololelwa mo lefelong leno,+ mo bathong le mo seruiweng, le mo setlhareng sa tshimo+ le mo maungong a lefatshe; bo tla tuka, mme ga bo na go tingwa.’+ 21  “Jehofa wa masomosomo, Modimo wa Iseraele, o buile jaana, ‘Tsenyang ditshupelo tseo tse di fisiwang di feletse tsa lona mo ditlhabelong tsa lona mme lo je nama.+ 22  Gonne ga ke a bua le borraalonamogologolwane, le fa e le go ba laela mo letsatsing le ke ba ntshitseng ka lone mo lefatsheng la Egepeto mabapi le dikgang tsa tshupelo e e fisiwang e feletse le setlhabelo.+ 23  Mme lefoko leno ke ne ka le bua ke ba laela, ke re: “Utlwang lentswe la me,+ mme ke tla nna Modimo wa lona,+ mme lona lo tla nna batho ba me; mme lo tsamaye mo tseleng yotlhe+ e ke tla e lo laelang, gore dilo di lo tsamaele sentle.”’+ 24  Mme ga ba a ka ba reetsa, le fa e le go sekega tsebe,+ mme ba ne ba tsamaya mo dikgakololong le mo bologwading jwa pelo ya bone e e bosula,+ mo ba neng ba tsamaela kwa morago e seng kwa pele,+ 25  go simolola mo letsatsing le borraalonamogologolwane ba duleng kwa lefatsheng la Egepeto ka lone go fitlha mo letsatsing leno;+ mme ke ne ka nna ka romela batlhanka ba me botlhe ba e leng baporofeti kwa go lona, ke tsoga go sa le phakela letsatsi le letsatsi ke ba roma.+ 26  Mme ga ba a ka ba ntheetsa, e bile ga ba a ka ba sekega tsebe,+ mme ba ne ba nna ba thatafatsa thamo ya bone.+ Ba dirile bosula go feta borraabonemogologolwane!+ 27  “O bue le bone mafoko ano otlhe,+ mme ga ba na go go reetsa; o ba bitse, mme ga ba na go go araba.+ 28  O ba reye o re, ‘Seno ke setšhaba se batho ba sone ba sa utlwang lentswe la ga Jehofa Modimo wa sone,+ e bile ga ba amogela kotlhao.+ Boikanyegi bo nyeletse, bo kgaotswe mo molomong wa bone.’+ 29  “Kgaola moriri wa gago o o sa beolwang mme o o latlhe,+ o tlhabeletse pina ya khutsafalo mo godimo ga dithota tse di se nang sepe,+ gonne Jehofa o ganne+ kokomana e a e shakgaletseng e bile o tla e latlha.+ 30  ‘Gonne bomorwa Juda ba dirile se se bosula mo matlhong a me,’ go bua Jehofa. ‘Ba beile dilo tsa bone tse di ferosang sebete mo ntlong e leina la me le bidiwang mo go yone, gore ba e leswafatse.+ 31  Gape ba agile mafelo a a kwa godimo a Tofethe,+ e e mo mokgatšheng wa morwa Hinoma,+ gore ba tle ba fise bomorwaabone le bomorwadiabone mo molelong,+ selo se ke neng ke sa se laela le se se neng se sa tla mo pelong ya me.’+ 32  “‘Ka jalo, bonang! metlha e etla,’ go bua Jehofa, ‘fa go tla bo go sa tlhole go twe ke Tofethe le mokgatšha wa morwa Hinoma, mme go twe ke mokgatšha wa polao;+ mme ba tla tshwanelwa ke go fitlha mo Tofethe mme go se na lefelo le le lekaneng.+ 33  Mme ditopo tsa batho bano di tla nna dijo tsa dibopiwa tse di fofang tsa magodimo le tsa diphologolo tsa lefatshe, go se na ope yo o di tshosang.+ 34  Ke tla khutlisa lentswe la boitumelo le lentswe la boipelo, lentswe la monyadi le lentswe la monyadiwa+ mo metseng ya Juda le mo mebileng ya Jerusalema; gonne lefatshe ga e kitla e nna sepe fa e se lefelo le le swafetseng.’”+

Dintlha Tse di Kwa Tlase