Jeremia 41:1-18

41  Mme ga diragala ya re ka kgwedi ya bosupa Ishemaele+ morwa Nethania morwa Elishama+ wa losika lwa segosi+ le wa banna ba bagolo ba kgosi le banna ba bangwe ba le lesome ba na le ene+ ba tla kwa go Gedalia morwa Ahikame kwa Misepa.+ Mme ba simolola go ja senkgwe mmogo gone kwa Misepa.+  Go tswa foo Ishemaele morwa Nethania le banna ba le lesome ba ba neng ba na le ene ba nanoga mme ba kgemetha Gedalia morwa Ahikame morwa Shafane ka tšhaka.+ Ka jalo a bolaya yo kgosi ya Babelona e neng e mo tlhomile go okamela lefatshe leo.+  Mme Bajuda botlhe ba ba neng ba na le ene, ke gore, le Gedalia, kwa Misepa le Bakaladia ba ba neng ba fitlhelwa gone, ke gore, banna ba ntwa, Ishemaele o ne a ba kgemetha.  Ga diragala ka letsatsi la bobedi la go bolawa ga ga Gedalia, fa go ne go se na ope gotlhelele yo o neng a itse ka gone,+  gore foo go tle banna go tswa Shekema,+ go tswa Shilo+ le go tswa Samarea,+ banna ba le masome a le robedi ba ba beotsweng ditedu+ ba diaparo tsa bone di gagogantsweng ba itshegakile,+ mme go ne go na le tshupelo ya bupi le lebano+ mo seatleng sa bone go di tlisa mo ntlong ya ga Jehofa.  Jalo Ishemaele morwa Nethania a tswa mo Misepa a ya go ba kgatlhantsha, a tsamaya a ntse a lela.+ Mme ga diragala gore fela fa a kopana le bone a ba raya a re: “Tlayang kwa go Gedalia morwa Ahikame.”  Mme ga diragala ya re fela fa ba sena go goroga mo gare ga motse, Ishemaele morwa Nethania a ba bolaya mme a ba latlhela mo gare ga mogobe, ene le banna ba ba neng ba na le ene.+  Mme go ne go na le banna ba le lesome ba ba neng ba fitlhelwa mo gare ga bone ba ka bonako ba neng ba raya Ishemaele ba re: “O se ka wa re bolaya, gonne mo thuong ya rona go na le matlotlo a a fitlhilweng mo tshimong, korong le barele le leokwane le tswina ya dinotshe.”+ Ka jalo a ithiba, mme a se ka a ba bolaya mo gare ga bomorwarraabone.  Jaanong mogobe o Ishemaele+ a neng a latlhetse mo go one ditopo tsotlhe tsa batho ba a neng a ba kgemethile e ne e le mogobe o mogolo, o Kgosi Asa a neng a o dirile ka ntlha ya ga Baasha kgosi ya Iseraele.+ Ke one o Ishemaele morwa Nethania a neng a o tlatsa ka ba ba bolailweng. 10  Go tswa foo Ishemaele a isa masalela otlhe a batho ba ba neng ba le kwa Misepa+ botshwarwa, bomorwadia kgosi+ le batho botlhe ba ba neng ba setse kwa Misepa,+ ba Nebusaradane molaodi wa bafemedi a neng a ba neile Gedalia morwa Ahikame+ gore a ba tlhokomele. Jalo Ishemaele morwa Nethania a ba isa botshwarwa mme a tswa a tsamaya a ya go kgabaganyetsa kwa go bomorwa Amona.+ 11  Fa nako e ntse e tsamaya Johanane+ morwa Karea le balaodi botlhe ba mephato ya sesole+ ba ba neng ba na le ene ba utlwa bosula jotlhe jo Ishemaele morwa Nethania a neng a bo dirile. 12  Ka gone ba tsaya banna botlhe mme ba ya go tlhabana le Ishemaele morwa Nethania mme ba mo fitlhela fa metsing a mantsi a a neng a le mo Gibeone.+ 13  Ga diragala ya re fela fa batho botlhe ba ba neng ba na le Ishemaele ba bona Johanane morwa Karea le balaodi botlhe ba mephato ya sesole ba ba neng ba na le ene, ba simolola go ipela. 14  Mme batho botlhe ba Ishemaele a neng a ba isitse botshwarwa go tswa kwa Misepa+ ba retologa ba boela kwa go Johanane morwa Karea. 15  Mme fa e le Ishemaele morwa Nethania ene, a tshaba+ le banna ba le robedi ba tswa fa pele ga ga Johanane, gore a tle a ye kwa go bomorwa Amona. 16  Johanane+ morwa Karea le balaodi botlhe ba mephato ya sesole ba ba neng ba na le ene jaanong ba tsaya masalela otlhe a batho bao ba ba busitseng kwa go Ishemaele morwa Nethania, kwa Misepa, morago ga gore a bolaye Gedalia+ morwa Ahikame, banna ba ba nonofileng, banna ba ntwa, le basadi le bana ba bannye le badiredi ba ntlo ya kgosi, ba a ba busitseng kwa Gibeone. 17  Jalo ba tsamaya mme ba ya go nna mo lefelong la bonno la Kimahame le le neng le le fa thoko ga Bethelehema,+ gore ba tle ba tswelele mme ba tsene mo Egepeto,+ 18  ka ntlha ya Bakaladia;+ ka gonne ba ne ba boifa ka ntlha ya bone,+ e re ka Ishemaele morwa Nethania a ne a bolaile Gedalia morwa Ahikame,+ yo kgosi ya Babelona e neng e mo tlhomile gore a okamele lefatshe leo.+

Dintlha Tse di Kwa Tlase