Jeremia 25:1-38

25  Lefoko le le neng la tla mo go Jeremia ka ga batho botlhe ba Juda mo ngwageng wa bonè wa ga Jehoiakime+ morwa Josia, kgosi ya Juda, ke gore, ngwaga wa ntlha wa ga Nebukaderesare kgosi ya Babelona;  le moporofeti Jeremia a le buileng ka ga batho botlhe ba Juda le ka ga banni botlhe ba Jerusalema, a re:  “Go simolola ka ngwaga wa bolesome le boraro wa ga Josia+ morwa Amone, kgosi ya Juda, le go tla go fitlha gompieno, dingwaga tseno tse di masome a mabedi le boraro lefoko la ga Jehofa le ne la tla mo go nna, mme ke ne ka nna ka bua le lona, ke tsoga go sa le phakela ke bua, mme ga lo a ka lwa reetsa.+  Mme Jehofa o ne a roma batlhanka botlhe ba gagwe e leng baporofeti kwa go lona, a tsoga go sa le phakela mme a ba roma, mme ga lo a ka lwa reetsa,+ le fa e le go sekega tsebe ya lona go reetsa,+  fa ba ne ba re, ‘Boang, tsweetswee, mongwe le mongwe mo tseleng ya gagwe e e bosula le mo bosuleng jwa ditiro tsa lona,+ mme lo tswelele lo nna mo lefatsheng le Jehofa a le lo neileng le borraalonamogologolwane go tswa bogologolong le go ya nakong e telele e e tlang.+  Mme lo se ka lwa sala medimo e sele morago gore lo e direle le go e ikobela, gore lo se ka lwa nkgopisa ka tiro ya diatla tsa lona, le gore ke se ka ka lo bakela masetlapelo.’+  “‘Mme ga lo a ka lwa ntheetsa,’ go bua Jehofa, ‘ka boikaelelo jwa gore lo nkgopise ka tiro ya diatla tsa lona, go ipakela masetlapelo.’+  “Ka jalo Jehofa wa masomosomo o buile jaana, ‘“Ka lebaka la gore ga lo a ka lwa utlwa mafoko a me,  bonang, ke a roma mme ke tla tsaya malapa otlhe a bokone,”+ go bua Jehofa, “le e leng go roma kwa go Nebukaderesare kgosi ya Babelona, e bong motlhanka wa me,+ mme ke tla dira gore ba tsogologele lefatshe leno+ ba bo ba tsogologele banni ba lone le ditšhaba tseno tsotlhe tse di mo tikologong;+ mme ke tla ba senya le go ba dira selo sa go akabalelwa le sengwe sa go lelediwa molodi+ le mafelo a a swafetseng ka bosakhutleng.+ 10  Mme mo go bone ke tla senya modumo wa boitumelo le modumo wa boipelo,+ lentswe la monyadi le lentswe la monyadiwa,+ modumo wa lelwala+ le lesedi la lobone.+ 11  Mme lefatshe leno lotlhe e tla nna lefelo le le swafetseng, selo sa go akabalelwa, mme ditšhaba tseno di tla tshwanelwa ke go direla kgosi ya Babelona dingwaga di le masome a supa.”’+ 12  “‘Mme go tla diragala gore fa dingwaga di le masome a supa di sena go wela+ ke tla sekisa kgosi ya Babelona le setšhaba seo,’+ go bua Jehofa, ‘tlolo ya bone, le eleng lefatshe la Bakaladia,+ ke tla le dira kgakgabalo ka bosakhutleng.+ 13  Ke tla tlisa mo lefatsheng leo mafoko a me otlhe a ke a buileng kgatlhanong le lone, le sotlhe se se kwadilweng mo bukeng eno se Jeremia a se porofetileng kgatlhanong le ditšhaba tsotlhe.+ 14  Gonne le bone, ditšhaba tse dintsi le dikgosi tse dikgolo,+ e ba dirisitse ka bopelotshetlha jaaka batlhanka;+ mme ke tla ba duela go ya ka tiro ya bone le go ya ka tiro ya diatla tsa bone.’”+ 15  Gonne Jehofa Modimo wa Iseraele o ntheile a re: “Tsaya senwelo seno sa beine ya bogale jwa me mo seatleng sa me, mme o dire gore ditšhaba tsotlhe tse ke go romang kwa go tsone di se nwe.+ 16  Mme ba nwe ba bo ba thetheekelele kwa pele le kwa morago mme ba itshware jaaka batho ba ba tsenwang ka ntlha ya tšhaka e ke e romelang mo go bone.”+ 17  Mme ke ne ka tsaya senwelo mo seatleng sa ga Jehofa le go dira gore ditšhaba tsotlhe tse Jehofa a neng a nthomile kwa go tsone di nwe:+ 18  e leng, Jerusalema le metse ya Juda le dikgosi tsa yone, dikgosana tsa yone, go di dira lefelo le le swafetseng, selo sa go akabalelwa,+ selo sa go lelediwa molodi le phutso, fela jaaka mo letsatsing leno;+ 19  Faro kgosi ya Egepeto le batlhanka ba gagwe le dikgosana tsa gagwe le batho botlhe ba gagwe;+ 20  le batho botlhe ba ba kopakopaneng, le dikgosi tsotlhe tsa lefatshe la Use,+ le dikgosi tsotlhe tsa lefatshe la Bafilisitia+ le Ashekelona+ le Gasa le Ekerone+ le masalela a Ashedoda;+ 21  Edoma+ le Moabe+ le bomorwa Amona;+ 22  le dikgosi tsotlhe tsa Ture+ le dikgosi tsotlhe tsa Sidona+ le dikgosi tsa setlhaketlhake se se mo kgaolong ya lewatle; 23  le Dedane+ le Tema+ le Buse le botlhe ba meriri ya bone e kgaotsweng mo ditlhakoreng tsa tlhogo;+ 24  le dikgosi tsotlhe tsa Baaraba+ le dikgosi tsotlhe tsa batho ba ba kopakopaneng ba ba agileng mo nageng; 25  le dikgosi tsotlhe tsa Simeri le dikgosi tsotlhe tsa Elama+ le dikgosi tsotlhe tsa Bameda;+ 26  le dikgosi tsotlhe tsa bokone tse di gaufi le tse di kgakala, ka go latelana, le magosi otlhe a mangwe a lefatshe a a mo godimo ga lefatshe; mme kgosi ya Sheshake+ e tla nwa morago ga bone. 27  “Mme o ba reye o re, ‘Jehofa wa masomosomo, Modimo wa Iseraele, o buile jaana: “Nwang lo tagwe mme lo kgwe lo bo lo we mo lo ka se kang lwa kgona go tsoga+ ka ntlha ya tšhaka e ke e romelang mo go lona.”’+ 28  Mme go tla diragala gore fa ba gana go tsaya senwelo mo seatleng sa gago go se nwa, o ba reye gape o re, ‘Jehofa wa masomosomo o buile jaana: “Eleruri lo tla nwa.+ 29  Gonne, bonang! ke simolola go tlisa masetlapelo mo motseng o leina la me le bidiwang mo go one,+ a mme lona lo tshwanetse go gololesega mo kotlhaong ka tsela epe fela?”’+ “‘Ga lo na go gololesega mo kwatlhaong, gonne go na le tšhaka e ke e biletsang banni botlhe ba lefatshe,’ go bua Jehofa wa masomosomo. 30  “Mme fa e le wena, o ba porofetele mafoko ano otlhe, mme o ba reye o re, ‘Jehofa o tla kurutla go tswa kwa godimo,+ o tla ntsha lentswe la gagwe a le kwa bonnong jwa gagwe jo bo boitshepo.+ Ruri o tla kurutla mo lefelong la gagwe la bonno. O tla opela kgatlhanong le banni botlhe ba lefatshe a goa jaaka ba ba gatang segatisetso sa beine.’+ 31  “‘Modumo o tla goroga kwa karolong e e kgakala thata ya lefatshe, gonne Jehofa o na le kganetsano le ditšhaba.+ O tshwanetse go atlhola nama yotlhe ka boene.+ Fa e le ba ba bosula, o tshwanetse go ba neelela tšhaka,’+ go bua Jehofa. 32  “Jehofa wa masomosomo o buile jaana, ‘Bonang! Masetlapelo a tswa mo setšhabeng go ya setšhabeng se sengwe,+ mme setsuatsue se segolo se tla kurusiwa go tswa dikarolong tse di kgakala thata tsa lefatshe.+ 33  Mme mo letsatsing leo ba Jehofa a ba bolaileng ba tla bo ba le go tloga kwa ntlheng e nngwe ya lefatshe go fitlha ntlheng e nngwe ya lefatshe.+ Ga ba na go hutsafalelwa, le fa e le go phuthwa kgotsa go fitlhwa.+ Ba tla nna jaaka motshotelo mo godimo ga mmu.’+ 34  “Bokolelang, lona badisa, lo bo lo goe!+ Mme lo bidikame,+ lona ba lo tlotlometseng ba letsomane,+ ka gonne malatsi a lona a go bolawa le a go gasamisiwa a wetse,+ mme lo tla wa jaaka sejana se se rategang!+ 35  Lefelo la botshabelo le nyeletse mo badiseng, le tsela ya go falola mo go ba ba tlotlometseng ba letsomane.+ 36  Reetsang! Selelo sa badisa, le go bokolela ga ba ba tlotlometseng ba letsomane, gonne Jehofa o thopa mafulo a bone. 37  Mafelo a bonno a kagiso a dirilwe a a se nang botshelo ka ntlha ya bogale jo bo tukang jwa ga Jehofa.+ 38  O tlogetse setswatswa sa gagwe fela jaaka tawana e e seriri,+ gonne lefatshe la bone le fetogile selo sa go akabalelwa ka ntlha ya tšhaka e e tshwarang setlhogo le ka ntlha ya bogale jwa gagwe jo bo tukang.”+

Dintlha Tse di Kwa Tlase