Jeremia 17:1-27

17  “Boleo jwa Juda bo kwadilwe ka pene e e setang ya tshipi.+ Bo gabilwe ka ntlha ya teemane mo sekwalelong sa pelo ya bone,+ le mo dinakeng tsa dibeso tsa bone,+  fa bomorwaabone ba gakologelwa dibeso tsa bone le dikota tsa bone tse di boitshepo go bapa le setlhare se se golang thata, mo dithoteng tse di kwa godimo,+  mo dithabeng tse di mo nageng. Dikhumo tsa gago, matlotlo otlhe a gago, ke tla a naya batho gore ba a gape+—mafelo a gago a a kwa godimo ka ntlha ya go leofa go ralala dikarolo tsotlhe tsa gago tsa naga.+  Ka go rata ga gago, o ne wa tlogela sa gago se o neng o se ruile boswa se ke neng ke se go neile.+ Gape ke tla dira gore o direle baba ba gago mo lefatsheng le o sa le itseng;+ gonne lo tlhoseditswe jaaka molelo mo bogaleng jwa me.+ O tla nna o tuka ka bosakhutleng.”  Jehofa o buile jaana: “Go hutsegile monna yo o nonofileng yo o ikanyang motho wa mo lefatsheng+ mme a dira nama lebogo la gagwe,+ le yo pelo ya gagwe e fapogang mo go Jehofa.+  Mme eleruri o tla nna jaaka setlhare se se emeng se le nosi mo lebaleng le le sekaka mme ga a na go bona fa molemo o tla;+ o tla nna mo mafelong a a phaphaletseng mo nageng, mo lefatsheng la letswai le le sa nniweng.+  Go segofetse monna yo o nonofileng yo o ikanyang Jehofa, le yo Jehofa e leng tshepo ya gagwe.+  Ruri o tla nna jaaka setlhare se se jadilweng fa metsing, se se romelang medi ya sone mo moseleng wa metsi; mme ga a na go bona fa mogote o tla, dikala tsa gagwe tse di nang le makakaba di tla nna tse di golang thata.+ Mme mo ngwageng wa komelelo+ ga a na go tlhobaela, le fa e le go tlogela go ntsha maungo.  “Pelo e boferefere go gaisa sengwe le sengwe mme e gagamalela se e se batlang.+ Ke mang yo o ka e itseng? 10  Nna, Jehofa, ke hukutsa pelo,+ ke tlhatlhoba diphilo,+ le go naya mongwe le mongwe go ya ka ditsela tsa gagwe,+ go ya ka maungo a ditiro tsa gagwe.+ 11  Yo o dirang dikhumo, mme e se ka tshiamiso, o ntse jaaka lesogo le le phuthileng se le sa se bayang.+ O tla di tlogela mo sephatlong sa malatsi a gagwe,+ le mo bokhutlong jwa gagwe o tla itshupa a se na tlhaloganyo.”+ 12  Go tswa kwa tshimologong go na le setulo sa bogosi se se kwa godimo se se galalelang;+ ke lefelo la lefelo la rona le le boitshepo.+ 13  Wena Jehofa, e bong tsholofelo ya Iseraele,+ botlhe ba ba go tlogelang ba tla tlhabisiwa ditlhong.+ Ba ba ntlhanogelang+ ba tla kwalwa mo lefatsheng, gonne ba tlogetse motswedi wa metsi a a tshelang, e bong Jehofa.+ 14  Mphodise tlhe Jehofa, mme ke tla fola.+ Mpoloke, mme ke tla bolokega;+ gonne o pako ya me.+ 15  Bonang! Go na le ba ba nthayang ba re: “Lefoko la ga Jehofa le kae?+ Mma le tsene, tsweetswee.” 16  Mme fa e le nna, ga ke a potlakela go tlogela go nna modisa yo o go setseng morago, e bile ga ke a supa ke eletsa letsatsi la go itlhoboga. Wena o itsile mafoko a dipounama tsa me; a tlile fa pele ga sefatlhego sa gago. 17  O se ka wa nna selo se se tshosang mo go nna.+ O botshabelo jwa me mo motlheng wa masetlapelo.+ 18  A babogisi ba me ba tlhabisiwe ditlhong,+ mme nna ka namana ke se ka ka tlhabisiwa ditlhong ka gope.+ A e nne bone ba ba welwang ke poifo, mme nna ka namana ke se ka ka welwa ke poifo. Ba tlisetse letsatsi la masetlapelo,+ mme o ba robaganye ka go ba senya go menagane gabedi.+ 19  Jehofa o ntheile a re: “Tsamaya, mme o eme mo kgorong ya bomorwa batho e dikgosi tsa Juda di tsenang ka yone le e di tswang ka yone, le mo dikgorong tsotlhe tsa Jerusalema.+ 20  Mme o ba reye o re, ‘Utlwang lefoko la ga Jehofa, lona dikgosi tsa Juda le Juda yotlhe le lona lotlhe banni ba Jerusalema, ba lo tsenang ka dikgoro tseno.+ 21  Jehofa o buile jaana: “Disang meya ya lona,+ mme ka letsatsi la sabata lo se ka lwa sikara morwalo ope o lo tshwanetseng go tsena ka one mo dikgorong tsa Jerusalema.+ 22  Mme lo se ka lwa ntsha morwalo ope kwa magaeng a lona ka letsatsi la sabata; gape lo se ka lwa dira tiro epe gotlhelele.+ Mme lo itshepise letsatsi la sabata, fela jaaka ke ne ka laela borraalonamogologolwane;+ 23  mme ga ba ka ba reetsa kgotsa go sekega tsebe ya bone,+ ba ne ba thatafatsa thamo ya bone+ gore ba se ka ba utlwa le gore ba se ka ba amogela kotlhao epe.”’+ 24  “‘“Mme go tla diragala gore, fa lo nkutlwa tota,”+ go bua Jehofa, “gore lo se ka lwa tsena ka morwalo ope mo dikgorong tsa motse ono ka letsatsi la sabata+ le go itshepisa letsatsi la sabata ka go se dire tiro epe ka lone,+ 25  ruri go tla tsena dikgosi le dikgosana ka dikgoro tsa motse ono,+ di ntse mo setulong sa bogosi sa ga Dafide,+ di pagame kara le dipitse, tsone le dikgosana tsa tsone, banna ba Juda le banni ba Jerusalema; mme ruri motse ono o tla nniwa ka bosakhutleng. 26  Eleruri batho ba tla tla ba tswa kwa metseng ya Juda le go dikologa Jerusalema le go tswa kwa lefatsheng la Benjamine+ le kwa nageng yotlhe e e kwa tlase+ le kwa kgaolong e e dithaba+ le kwa Negebe,+ ba tlisa tshupelo e e fisiwang e feletse+ le setlhabelo+ le tshupelo ya dijo tsa ditlhaka+ le lebano+ ba tlisa gape le setlhabelo sa go ntshiwa ga ditebogo mo ntlong ya ga Jehofa.+ 27  “‘“Mme fa e le gore ga lo na go nkutlwa ka go itshepisa letsatsi la sabata le go sa rwale morwalo,+ mme go tsenwa ka one ka dikgoro tsa Jerusalema ka letsatsi la sabata, ke tla tshuba molelo mo dikgorong tsa gagwe,+ mme eleruri o tla laila ditora tsa Jerusalema+ tsa bonno mme ga o na go tima.”’”+

Dintlha Tse di Kwa Tlase