Jeremia 13:1-27

13  Jehofa o ntheile a re: “Tsamaya, o ipatlele moitlamo wa leloba o o beye mo dinōkeng tsa gago, mme o se ka wa o tsenya mo metsing ape.”  Ka jalo ka ipatlela moitlamo go ya ka lefoko la ga Jehofa mme ka o baya mo dinōkeng tsa me.  Mme lefoko la ga Jehofa la tla mo go nna lekgetlo la bobedi, le re:  “Tsaya moitlamo o o nang le one, o o mo dinōkeng tsa gago, mme o eme, o ye kwa Euferatese,+ mme o o fitlhe teng mo lopharong lwa lefika le legolo.”  Jalo ka tsamaya ka o fitlha fa Euferatese, fela jaaka Jehofa a ne a ntaetse.  Ga diragala ya re kwa bokhutlong jwa malatsi a mantsi Jehofa a nthaya a re: “Ema, ya kwa Euferatese mme koo o tseye moitlamo o ke go laetseng gore o o fitlhe teng.”  Ka jalo ka ya kwa Euferatese mme ka epa ka tsaya moitlamo mo lefelong le ke neng ke o fitlhile mo go lone, mme bonang! moitlamo o ne o senyegile; o ne o sa tshwanele sepe.  Go tswa foo lefoko la ga Jehofa la tla mo go nna, le re:  “Jehofa o buile jaana, ‘Ke tla senya boikgogomoso jwa Juda+ le boikgogomoso jo bogolo jwa Jerusalema ka tsela e e tshwanang. 10  Setšhaba seno sa batho ba ba bosula ba ba ganang go utlwa mafoko a me,+ ba ba tsamayang mo bologwading jwa pelo+ ya bone le ba ba nnang ba sala medimo e mengwe morago gore ba e direle le go e ikobela,+ le bone ba tla nna fela jaaka moitlamo ono o o sa tshwaneleng sepe.’ 11  ‘Gonne fela jaaka moitlamo o ngaparela dinōka tsa motho, ka tsela e e ntseng jalo ke dirile gore ntlo yotlhe ya Iseraele le ntlo yotlhe ya Juda di nngaparele,’+ go bua Jehofa, ‘gore ba tle ba nne mo go nna setšhaba+ le leina+ le pako le selo se sentle; mme ga ba a ka ba utlwa.’+ 12  “Mme o ba reye lefoko leno o re, ‘Jehofa Modimo wa Iseraele o buile jaana: “Nkgo nngwe le nngwe e kgolo ke sengwe se se tladiwang ka beine.”’+ Mme ruri ba tla go raya ba re, ‘A ruri ga re itse gore nkgo nngwe le nngwe e kgolo ke sengwe se se tladiwang ka beine?’ 13  Mme o ba reye o re, ‘Jehofa o buile jaana: “Bonang, ke tlatsa banni botlhe ba lefatshe leno le dikgosi tse di emetseng Dafide+ mo setulong sa gagwe sa bogosi le baperesiti le baporofeti le banni botlhe ba Jerusalema ka botagwa.+ 14  Mme ke tla ba itaaganya mongwe le yo mongwe, borre le barwa, ka nako e le nngwe fela,”+ go bua Jehofa. “Ga ke na go bontsha bopelotlhomogi, le fa e le go utlwa botlhoko, e bile ga ke na go nna le kutlwelobotlhoko e e tla nthibelang go ba senya.”’+ 15  “Utlwang, lona batho, mme lo sekege tsebe. Lo se ka lwa nna mabela,+ gonne Jehofa ka boene o buile.+ 16  Nayang Jehofa Modimo wa lona kgalalelo,+ pele ga a dira gore go nne lefifi+ le pele ga dinao tsa lona di itaana mo dithabeng ka letlatlana.+ Mme ruri lo tla solofela lesedi,+ mme o tla le dira moriti o montsho;+ o tla le fetola letobo le lentshontsho.+ 17  Mme fa lo ka se le utlwe,+ moya wa me o tla lela ka ntlha ya boikgogomoso mo mafelong a go itshuba mme ruri o tla tsholola dikeledi; leitlho la me le tla elela dikeledi,+ ka ntlha ya gore motlhape+ wa ga Jehofa o tla bo o isitswe botshwarwa. 18  “Raya kgosi le mohumagadi o re,+ ‘Nnang kwa lefelong le le kwa tlasenyana,+ gonne serwalo sa lona sa bontle ruri se tla tswa mo ditlhogong tsa lona.’+ 19  Metse ya borwa e tswetswe, gore ope a se ka a e bula. Juda yotlhe e isitswe botshwarwa. E isitswe botshwarwa ka mokgwa o o feletseng.+ 20  “Tsholetsa matlho, mme o bone ba ba tswang kwa bokone.+ Motlhape o mongwe o a o go neileng o kae, letsomane la gago le lentle?+ 21  O tla reng fa a lebisa tlhokomelo ya gagwe mo go wena,+ fa wena o ba rutile jaaka ditsala tse lo ntshanang seinong go bapa fela le wena kwa tshimologong?+ A ditlhabi tsa pelegi ka botsone ga di na go go tshwara, tse di tshwanang le tsa mosadi yo o belegang?+ 22  Le fa o tla bo o bua mo pelong o re,+ ‘Ke ka ntlha yang fa dilo tseno di ntiragaletse?’+ ka ntlha ya bontsi jwa tlolo ya gago dintlha tsa seaparo sa gago di tlositswe jaaka sebipo;+ direthe tsa gago di tshwerwe setlhogo. 23  “A Mokushe+ o ka fetola letlalo la gagwe? kgotsa lengau marontho+ a lone? Lona ba lo leng batho ba ba rutilweng go dira bosula, lo ne lo ka kgona go dira molemo.+ 24  Jalo ke tla ba gasamisa+ jaaka dirite tse di fetang le phefo di tswa kwa nageng.+ 25  Seno ke kabelo ya gago, karolo ya gago e e lekantsweng e e tswang mo go nna,”+ go bua Jehofa, “ka gonne o ntebetse+ mme o nna o ikanya maaka.+ 26  Mme le nna ke tla tsholeletsa dintlha tsa seaparo sa gago mo sefatlhegong sa gago, mme tlontlologo ya gago ruri e tla bonwa,+ 27  ditiro tsa gago tsa boaka+ le go kgwankgwanyega ga gago,+ boitshwaro jwa gago jo bo repileng jwa boaka. Mo dithoteng, mo nageng, ke bone dilo tsa gago tse di ferosang sebete.+ A bo go latlhega wena, Jerusalema! Ga o ka ke wa bo o le phepa+—morago ga lobaka lo lo kae?”+

Dintlha Tse di Kwa Tlase