Isaia 16:1-14

16  Romelang phelefu kwa mmusing wa lefatshe,+ go tswa kwa Sela go ya ntlheng ya naga, go ya kwa thabeng ya ga morwadia Siona.+  Mme go tla diragala gore bomorwadia Moabe kwa matsibogong a Arenone+ ba nne jaaka sebopiwa se se diphuka se se tshabang, se se lelekiwang mo sentlhageng+ sa sone.  “Tlisang kgakololo, diragatsang tshwetso.+ “Dirang gore moriti wa lona o nne fela jaaka bosigo mo motshegareng o mogolo.+ Subang ba ba phatlaletseng;+ lo se ka lwa oka ope yo o tshabang.+  E kete batho ba me ba ba phatlaletseng ba ka aga e le baeng mo go wena, Moabe.+ Nna lefelo la go itshuba mo go bone ka ntlha ya mothopi.+ Gonne mogateledi o fitlhile kwa bokhutlong jwa gagwe; go thopa go khutlile; ba ba gatakang ba bangwe ba feditswe mo lefatsheng.+  “Mme setulo sa bogosi se tla tlhomamisiwa ka thata ka bopelonomi jwa lorato;+ mme motho o tla nna mo go sone ka boammaaruri mo mogopeng wa ga Dafide,+ a atlhola e bile a senka tshiamiso mme a potlaka mo tshiamong.”+  Re utlwile ka boikgogomoso jwa ga Moabe, gore o ikgogomosa thata;+ mabela a gagwe le go ikgogomosa ga gagwe le tšhakgalo ya gagwe+—puo ya gagwe e e se nang mosola ga e kitla e nna jalo.+  Ka jalo Moabe o tla bokolelela Moabe; otlhe fela o tla bokolela.+ Ba ba hutsafetseng eleruri ba tla lelela dikuku tsa morara o o swabisitsweng tsa Kire-haresethe+ ka selelo sa khutsafalo,  ka gonne matlhagare a Heshebone a swabile. Mofine wa Sibema+—beng ba ditšhaba ba robakile dikala tsa one tse di bohibidu jo bo galotseng. Di ne di fitlhile kwa Jasere;+ di ne di ile tsa kgarakgatshega mo nageng. Matlhogela a one a ne a tlogetswe gore a ikgolele thata; a ne a ya go fitlha le kwa lewatleng.  Ke gone ka moo ke tla lelang selelo sa ga Jasere ke lelela mofine wa Sibema.+ Ke tla go kolobetsa ka dikeledi tsa me, wena Heshebone+ le Eleale,+ ka gonne selemo sa gago le thobo ya gago di wetswe ke go goa.+ 10  Mme go itumela le boipelo di tlositswe mo tshingwaneng ya maungo; mme mo masimong a mofine ga go na go goa ka boipelo, ga go na go goa gope mo go dirwang.+ Yo o gatang ga a tlhagise beine epe mo segatisetsong.+ Ke khutlisitse go goa.+ 11  Ke gone ka moo mala a me a tsositseng modumo jaaka harepa ka ntlha ya Moabe,+ le mateng a me ka ntlha ya Kire-haresethe.+ 12  Mme go ne ga diragala gore go bonwe gore Moabe o ne a lapisitswe kwa lefelong le le kwa godimo;+ mme a tla mo lefelong la gagwe le le boitshepo a tla go rapela,+ mme o ne a sa kgone go fitlhelela sepe.+ 13  Leno ke lefoko le Jehofa a le buileng malebana le Moabe mo nakong e e fetileng. 14  Mme jaanong Jehofa o buile, a re: “Mo dingwageng di le tharo, go ya ka dingwaga tsa modiri yo o thapilweng,+ kgalalelo+ ya Moabe e tla tlhabisiwa ditlhong ka khuduego e kgolo ya mofuta mongwe le mongwe, mme ba ba setseng e tla bo e le ba se kae ba e seng ba sepe, ba sa nonofa.”+

Dintlha Tse di Kwa Tlase