Genesise 35:1-29

35  Morago ga moo Modimo a raya Jakobe a re: “Nanoga, ya kwa Bethele mme o nne gone,+ mme o direle Modimo wa boammaaruri sebeso gone, yo o neng a bonala kwa go wena fa o ne o tshaba morwarrago+ Esau.”  Foo Jakobe a raya ba ntlo ya gagwe le botlhe ba ba neng ba na le ene a re: “Tlosang medimo e sele e e mo gare ga lona+ lo intlafatse lo bo lo apare diaparo tse dingwe,+  mme a re nanogeng re yeng kwa Bethele. Mme ke tla direla Modimo wa boammaaruri sebeso gone, yo o neng a nkaraba mo motlheng wa matshwenyego+ a me ka gonne o ne a nna le nna mo tseleng e ke e tsamaileng.”+  Ka jalo ba naya Jakobe medimo yotlhe e sele e e neng e le mo diatleng tsa bone le manyena a a neng a le mo ditsebeng tsa bone, mme Jakobe a di fitlha+ kafa tlase ga setlhare se segolo se se neng se le gaufi le Shekema.  Morago ga moo ba bolola, mme go tshoga Modimo ga wela metse e e neng e ba dikologile,+ mo e leng gore ga ba a ka ba lelekisa bomorwa Jakobe.  Kgabagare Jakobe a tla mo Luse,+ o o mo lefatsheng la Kanana, ke go re, Bethele, ene le batho botlhe ba ba neng ba na le ene.  Mme a aga sebeso gone mme a simolola go bitsa lefelo leo a re Ele-bethele, ka gonne Modimo wa boammaaruri o ne a mo itshenoletse teng ka nako ya fa a ne a tshaba morwarraagwe.+  Moragonyana Debora+ mosadi yo o tlhokomelang Rebeka a swa mme a fitlhwa fa mohapheng wa Bethele ka fa tlase ga setlhare se segolo thata. Ka gone a bitsa leina la sone Alone-bakuthe.  Jaanong Modimo a boa gape a bonala kwa go Jakobe fa a ne a tswa kwa Padana-arama+ mme a mo segofatsa.+ 10  Mme Modimo a mo raya a re: “Leina la gago ke Jakobe.+ Leina la gago ga le tlhole le tla bidiwa Jakobe, mme leina la gago e tla nna Iseraele.” Mme a simolola go bitsa leina la gagwe Iseraele.+ 11  Mme Modimo a mo raya gape a re: “Ke nna Modimo Mothatayotlhe.+ Ata mme o ntsifale. Mo go wena go tla tswa ditšhaba le phuthego ya ditšhaba, le dikgosi di tla tswa mo lothekeng lwa gago.+ 12  Fa e le lefatshe le ke le neileng Aborahame le Isake, ke tla le go naya, mme ke tla naya losika lwa gago+ morago ga gago lefatshe leno.”+ 13  Morago ga moo Modimo a tlhatloga a tswa mo godimo ga gagwe kwa lefelong le a neng a buile le ene kwa go lone.+ 14  Ka gone Jakobe a tlhoma pilara mo lefelong le a neng a buile le ene mo go lone,+ pilara ya leje, mme a tshela tshupelo ya senō mo godimo ga yone a ba a tshela leokwane mo godimo ga yone.+ 15  Mme Jakobe a bitsa leina la lefelo le Modimo a neng a buile le ene mo go lone a re Bethele.+ 16  Morago ga moo ba bolola ba tswa mo Bethele. Mme e rile go sa ntse go na le sekgala se seleele thata pele ba tla mo Eferatha,+ Ragele a belega, mme o ne a belega ka bothata.+ 17  Go ne ga diragala gore fa a belega ka bothata mmelegisi a mo raya a re: “O se ka wa boifa, gonne le ngwana yono wa mosimane o tla mo tshola.”+ 18  Mme phelelo ya nna gore fa moya+ wa gagwe o ne o tswa (ka gonne o ne a swa)+ a mo raya leina a re Bene-oni; mme rraagwe a mmitsa Benjamine.+ 19  Ragele a swa jalo mme a fitlhwa mo tseleng e e yang Eferatha, ke go re, Bethelehema.+ 20  Ka gone Jakobe a emisa pilara mo godimo ga phupu ya gagwe. Eno ke pilara ya phupu ya ga Ragele go fitlha mo letsatsing leno.+ 21  Morago ga moo Iseraele a bolola mme a tlhoma mogope wa gagwe sekgalanyana ka kwa ga tora ya Edere.+ 22  Mme go ne ga diragala gore fa Iseraele a ne a nna+ mo lefatsheng leo nako nngwe Rubene a ya go lala le Bileha mogadingwana wa ga rraagwe, mme Iseraele a utlwa ka gone.+ Ka jalo ga nna le bomorwa Jakobe ba le lesome le bobedi. 23  Bana ba basimane ba ba tshotsweng ke Lea e ne e le leitibolo la ga Jakobe e leng Rubene+ le Simeone le Lefi le Juda le Isakare le Sebulone. 24  Bana ba basimane ba ba tshotsweng ke Ragele e ne e le Josefa le Benjamine. 25  Mme bana ba basimane ba ba tshotsweng ke Bileha, lelata la ga Ragele, e ne e le Dana le Nafetali. 26  Mme bana ba basimane ba ba tshotsweng ke Silepa, lelata la ga Lea, e ne e le Gada le Ashere. Bano ke bomorwa Jakobe ba a neng a ba tsholelwa kwa Padana-arama. 27  Labofelo Jakobe a goroga kwa go Isake rraagwe kwa Mamere,+ kwa Kiriathe-areba,+ ke go re, Heberone, kwa Aborahame le Isake ba neng ba agile gone e le baeng.+ 28  Mme malatsi a ga Isake a nna dingwaga di le lekgolo le masome a le robedi.+ 29  Morago ga moo Isake a fela mme a swa mme a phuthelwa kwa bathong ba gagabo, a tsofetse e bile a kgotsofetse ka malatsi,+ mme Esau le Jakobe bomorwawe ba mo fitlha.+

Dintlha Tse di Kwa Tlase