Genesise 15:1-21

15  Morago ga dilo tseno lefoko la ga Jehofa la tla kwa go Aberame mo ponatshegelong,+ le re: “O se ka wa boifa,+ Aberame. Ke nna thebe ya gago.+ Maduo a gago a tla nna magolo thata.”+  Foo Aberame a re: “Morena Molaodimogolo Jehofa, o tla nnaya eng, e re ka ke ntse fela ke se na ngwana e bile yo o tla ruang ntlo ya me e le motho wa Damaseko, e leng Eliesere?”+  Mme Aberame a oketsa a re: “Bona! Ga o a nnaya losika lope,+ mme, bona! morwa+ wa ba ntlo ya me o ntlhatlhama jaaka moruaboswa.”  Mme, bona! lefoko la ga Jehofa kwa go ene le ne le le ka mafoko ano: “Monna yono ga a kitla a go tlhatlhama go nna moruaboswa, mme yo o tla tswang mo teng ga gago o tla go tlhatlhama go nna moruaboswa.”+  Jaanong a mo ntshetsa kwa ntle mme a re: “Lelalela kwa magodimong tsweetswee mme o bale dinaledi, fa e le gore o ka kgona go di bala.”+ Mme a tswelela a mo raya a re: “Losika lwa gago lo tla nna jalo.”+  Mme a dumela mo go Jehofa;+ mme a go kaya e le tshiamo+ mo go ene.  Morago ga moo a oketsa a mo raya a re: “Ke nna Jehofa, yo ke go ntshitseng kwa Ure wa Bakaladia gore ke go neye lefatshe leno gore o le rue.”+  Foo a araba a re: “Morena Molaodimogolo Jehofa, ke tla itse ka eng gore ke tla le rua?”+  Mme ene a mo raya a re: “Ntseela kgomo ya moroba ya dingwaga di le tharo le podi e namagadi ya dingwaga di le tharo le phelefu ya dingwaga di le tharo le leeba le lephoi le lennye.”+ 10  Ka jalo a itseela tseno tsotlhe mme a di kgaoganya sebedi mme a baya mohama mongwe le mongwe wa tsone gore o tshwanelane le o mongwe, mme dinonyane tsone a se ka a di kgaola dikarolwana.+ 11  Mme dinonyane tse di jang nama tsa simolola go fologela mo ditotong tseno,+ mme Aberame a nna a di leleka. 12  Morago ga nakonyana letsatsi le ne le tloga le phirima, mme Aberame+ a welwa ke boroko jo bogolo, mme, bona! a bo a welwa ke lefifi le legolo le le tshosang. 13  Mme a raya Aberame a re: “Ruri o ka tswa o itse gore losika lwa gago lo tla nna moagi wa moeng mo lefatsheng le e seng la bone,+ mme ba tla tshwanelwa ke go ba direla, mme bano ruri ba tla ba bogisa dingwaga di le makgolo a manè.+ 14  Mme ke atlhola setšhaba se ba tla se direlang,+ morago ga moo ba tla tswa ka dithoto di le dintsi.+ 15  Fa e le wena, o tla ya kwa go borragomogologolwane ka kagiso; o tla fitlhwa o tsofetse thata.+ 16  Mme mo kokomaneng ya bonè ba tla boela fano,+ ka gonne tlolo ya Baamore ga e ise e wele.”+ 17  Jaanong letsatsi le ne le phirima mme ga tla lefifi le le kwenneng mme, bona! leubelo le le kuang mosi le serumola se se tukang se se neng se feta fa gare ga dikarolwana tseno.+ 18  Mo letsatsing leo Jehofa o ne a dira kgolagano+ le Aberame, a re: “Ke tla naya losika lwa gago lefatshe leno,+ go simolola kwa nokeng ya Egepeto go fitlha kwa nokeng e kgolo, noka ya Euferatese:+ 19  Bakene+ le Bakenise le Bakademone 20  le Bahite le Baperise+ le Barefaime 21  le Baamore le Bakanana le Bagiregashe le Bajebuse.”+

Dintlha Tse di Kwa Tlase