Esethere 6:1-14

6  Mo bosigong joo kgosi ya felelwa ke boroko.+ Ka jalo ya laela gore go tlisiwe buka ya dipego+ tsa ditiragalo tsa metlha eo. Ka gone di ne tsa balwa fa pele ga kgosi.  La bofelo go ne ga fitlhelwa go kwadilwe se Moredekai a neng a se begile+ kaga Bigethane le Tereshe, badiredi ba ntlo ya kgosi ba babedi,+ balebedi ba dikgoro, ba ba neng ba batla go baya Kgosi Ahasueruse seatla.  Foo kgosi ya re: “Moredekai o diretswe tlotlo efe le selo sefe se segolo ka ntlha ya selo se?” Batlhokomedi ba kgosi, badiredi ba yone ba araba ba re: “Ga go na sepe se a se diretsweng.”+  Moragonyana kgosi ya re: “Ke mang yo o mo lolwapeng?” Jaanong Hamane ka boene o ne a tsene mo lolwapeng lo lo kafa ntle+ lwa ntlo ya kgosi a tlile go bolelela kgosi gore go kalediwe Moredekai mo koteng+ e a neng a e mmaakanyeditse.  Ka jalo batlhokomedi ba kgosi ba mo raya ba re: “Hamane+ ke yo o eme mo lolwapeng.” Mme kgosi ya re: “A a tsene.”  Fa Hamane a tsena, kgosi ya mo raya ya re: “Ke eng se se tshwanetseng go direlwa monna yo kgosi e itumelelang go mo tlotla?”+ Foo Hamane a bua mo pelong ya gagwe a re: “Kgosi e ka itumelela go ntshetsa mang tlotlo go feta nna?”+  Ka jalo Hamane a raya kgosi a re: “Fa e le monna yo kgosi e itumelelang go mo tlotla,  a ba tlise diaparo tsa segosi+ tse kgosi e di aparang le pitse e kgosi e e palamang+ e go beilweng serwalo sa tlhogo sa segosi mo tlhogong ya yone.  Mme a diaparo le pitse di bewe mo tlhokomelong ya mongwe wa dikgosana tsa kgosi tse di tlotlegang;+ mme ba apese monna yo kgosi e itumelelang go mo tlotla, mme ba dire gore a tsamaye a palame pitse mo patlelong+ ya motse,+ mme ba tlhaeletse fa pele ga gagwe ba re, ‘Go dirwa jaana ka monna yo kgosi ka boyone e itumelelang go mo tlotla.’”+ 10  Kgosi ya akofa ya raya Hamane ya re: “Ka bonako, tsaya diaparo le pitse, fela jaaka o buile, mme o dire jalo ka Moredekai wa Mojuda yo o ntseng mo kgorong ya kgosi. O se ka wa tlogela sepe sa tsotlhe tse o di buileng se sa diragadiwa.”+ 11  Mme Hamane a tsaya diaparo+ le pitse mme a apesa Moredekai+ a ba a dira gore a tsamaye a palame pitse mo patlelong+ ya motse a ba a tlhaeletsa jaana kwa pele ga gagwe: + “Go dirwa jaana ka monna yo kgosi ka boyone e itumelelang go mo tlotla.”+ 12  Morago ga moo Moredekai a boela kwa kgorong ya kgosi.+ Fa e le Hamane ene, a itlhaganelela kwa ntlong ya gagwe, a hutsafetse e bile a bipile tlhogo.+ 13  Mme Hamane a bolelela Sereshe+ mosadi wa gagwe le ditsala tsa gagwe tsotlhe sengwe le sengwe se se neng se mo diragaletse. Morago ga moo banna ba gagwe ba ba botlhale+ le Sereshe mosadi wa gagwe ba mo raya ba re: “Fa e le gore Moredekai yo o simolotseng go wa fa pele ga gagwe o tswa mo losikeng lwa Bajuda, ga o kitla o mo fenya, mme ruri o tla wa fa pele ga gagwe.”+ 14  Ya re ba sa ntse ba bua le ene badiredi ba ntlo ya kgosi ba goroga mme ba isa Hamane ka potlako+ kwa moketeng+ o Esethere a neng a o dirile.

Dintlha Tse di Kwa Tlase