Ekesodo 36:1-38

36  “Mme Besalele o tshwanetse go dira, le Oholiabe+ le monna mongwe le mongwe yo o nang le pelo e e botlhale yo Jehofa a mo neileng botlhale+ le tlhaloganyo+ mo dilong tseno gore a tle a itse kafa a ka dirang tiro yotlhe ka gone ya tirelo e e boitshepo kafa go sotlhe se Jehofa a se laotseng.”+  Mme Moshe a bitsa Besalele le Oholiabe le monna mongwe le mongwe yo o nang le pelo e e botlhale yo Jehofa a neng a tsentse botlhale+ mo pelong ya gagwe, mongwe le mongwe yo pelo ya gagwe e neng e mo tlhotlheletsa go atamela tiro gore a e dire.+  Mme ba tsaya moneelo+ otlhe fa pele ga ga Moshe o bomorwa Iseraele ba neng ba o tliseditse tiro ya tirelo e e boitshepo gore ba e dire, mme fa e le bano ba morago, ba ne ba nna ba tlisa moneelo ka go rata kwa go ene moso le moso.  Mme botlhe ba ba botlhale ba ba neng ba dira tiro yotlhe e e boitshepo ba simolola go tla, banna ka go latelana ga bone, ba tswa kwa tirong ya bone e ba neng ba e dira,  mme ba raya Moshe ba re: “Batho ba tlisetsa tiro e Jehofa a laotseng gore e dirwe mo go ntsi go feta kafa tirelo e tlhokang ka gone.”  Ka jalo Moshe a laola gore ba fetise kitsiso go ralala bothibelelo, ba re: “Banna le basadi, lo se ka lwa ntshetsa moneelo o o boitshepo dilwana tse di oketsegileng.” Foo batho ba ne ba thibelwa gore ba se ka ba di tlisa.  Mme dilwana di ne tsa itshupa di lekane tiro yotlhe e e neng e tshwanetse go dirwa, e bile di feta tekanyo.  Mme botlhe ba ba nang le pelo e e botlhale+ mo go ba ba dirang tiro ba dira motlaagana,+ matsela a le lesome a mogope a leloba le le boleta le le otlhilweng le tlhale e e bobududu le boboa jo bo fetoletsweng mo mmaleng o o bobududu jo bo mokgona jo bohibitswana le letsela le le bohibidu jo bo letlhololo jwa khokhase; o ne a a dira ka ditšheruba, tiro ya mokgabisi.  Boleele jwa letsela lengwe le lengwe la mogope e ne e le dikubita di le masome a mabedi le borobabobedi, mme boatlhamo jwa letsela lengwe le lengwe la mogope dikubita di le nnè. Matsela otlhe a mogope a ne a na le selekanyo se le sengwe. 10  Foo a gokaganya matsela a le matlhano a mogope lengwe go le lengwe,+ le matsela a mangwe a le matlhano a mogope a a gokaganya lengwe go le lengwe. 11  Morago ga moo a dira digwe tsa tlhale e e bobududu mo ntlheng ya letsela le lengwe la mogope fa a kopanang gone. O ne a dira se se tshwanang kwa ntlheng ya letsela le le ka kwa ntle kwa gongwe gape kwa a kopanang+ gone. 12  O ne a dira digwe di le masome a matlhano mo letseleng le lengwe la mogope, a ba a dira digwe di le masome a matlhano kwa ntlheng ya letsela la mogope le le neng le le kwa gongwe gape kwa a kopanang gone, segwe sengwe le sengwe se lebagane le se sengwe.+ 13  Labofelo a dira dikgoge di le masome a matlhano tsa gouta mme a gokaganya matsela a mogope ka dikgoge, mo e leng gore e ne ya nna motlaagana+ o le mongwe fela. 14  Mme a tswelela go direla sebipo se se mo godimo ga motlaagana matsela a mogope a maodi a podi. O ne a dira+ matsela a mogope a le lesome le bongwe. 15  Boleele jwa letsela lengwe le lengwe la mogope e ne e le dikubita di le masome a mararo, mme boatlhamo jwa letsela lengwe le lengwe la mogope dikubita di le nnè. Matsela+ ano a le lesome le bongwe a mogope a ne a na le selekanyo se le sengwe. 16  Foo a gokaganya matsela a matlhano a mogope a le osi le matsela a mangwe a le marataro a mogope a le osi.+ 17  Morago ga moo a dira digwe di le masome a matlhano mo ntlheng ya letsela le le ka kwa ntle la mogope fa a kopanang gone, a ba a dira digwe di le masome a matlhano mo ntlheng ya letsela le lengwe la mogope le le neng le gokagana le lone.+ 18  Morago ga moo a dira dikgoge di le masome a matlhano tsa kgotlho gore a gokaganye mogope o nne selo+ se le sengwe fela. 19  Mme a direla mogope sebipo ka matlalo a diphelefu a a fetoletsweng mo mmaleng o mohibidu le sebipo ka matlalo a manyebi+ ka kwa godimo.+ 20  Go tswa foo a direla motlaagana dimati ka logong+ lwa mokala, di eme di tsepaletse. 21  Boleele jwa lomati e ne e le dikubita di le lesome, mme boatlhamo jwa lomati longwe le longwe e le kubita le sephatlo.+ 22  Lomati longwe le longwe lo ne lo na le malomelo a mabedi longwe le longwe lo gokagane le lo longwe. Eo ke tsela e a neng a dira ka yone mo dimating tsotlhe tsa motlaagana.+ 23  Ka jalo a direla motlaagana dimati, dimati di le masome a mabedi tsa letlhakore le le kafa Negebe, kafa borwa.+ 24  Mme a direla karolo e e kafa tlase ya dimati di le masome a mabedi metheo e e khuti e le masome a manè ya selefera, metheo e mebedi e e khuti kafa tlase ga lomati lo lo longwe lo na le malomelo a lone a mabedi le metheo e mebedi e e khuti kafa tlase ga lomati lo longwe lo na le malomelo+ a lone a mabedi. 25  Mme letlhakore le lengwe la motlaagana, letlhakore le le kafa bokone, a le direla dimati+ di le masome a mabedi 26  le metheo ya tsone e e khuti e le masome a manè ya selefera, metheo e mebedi e e khuti kafa tlase ga lomati lo le longwe le metheo e mebedi e e khuti kafa tlase ga lomati+ lo longwe. 27  Mme dikarolo tse di kafa morago tsa motlaagana tse di kafa bophirima a di direla dimati+ di le thataro. 28  Mme a dira dimati tse pedi jaaka dikota tsa sekhutlo tsa motlaagana kafa dikarolong+ tsa one tse pedi tse di kafa morago. 29  Mme di ne di patagane kwa tlase mme tsoopedi tsa tshwana go ya go fitlha kwa godimo ga nngwe le nngwe ya tsone kwa mohiring wa ntlha. Ke se a neng a se dira mo go tsone tsoopedi, mo dikoteng tse pedi tsa sekhutlo.+ 30  Ka jalo di ne tsa fitlha go dimati di robabobedi le metheo ya tsone e e khuti ya selefera ya fitlha go lesome le borataro, metheo e mebedi e e khuti fa thoko ga metheo e mebedi e e khuti kafa tlase ga lomati+ longwe le longwe. 31  Mme a tswelela a dira mephakalego ya logong lwa mokala, e le metlhano ya dimati tsa letlhakore le lengwe la motlaagana+ 32  le mephakalego e le metlhano ya dimati tsa letlhakore le lengwe la motlaagana le mephakalego e le metlhano ya dimati tsa motlaagana tsa dikarolo tse di kafa morago tse pedi go ela kwa bophirima.+ 33  Go tswa foo a dira gore mophakalego o o fa gare o fete fa gare ga dimati go tswa ntlheng e nngwe go ya go e nngwe.+ 34  Mme a manega dimati gouta, mme a dira mehiri ya tsone ya gouta go nna ditshegetso tsa mephakalego, mme a manega mephakalego gouta.+ 35  Mme a dira sesiro+ sa tlhale e e bobududu le boboa jo bo fetoletsweng mo mmaleng o o bobududu jo bo mokgona jo bohibitswana le letsela le le bohibidu jo bo letlhololo jwa khokhase le leloba le le boleta le le otlhilweng. A se dira ka ditšheruba+ tiro ya mokgabisi. 36  Go tswa foo a se direla dipilara di le nnè tsa mokala a bo a di manega gouta, dimapo tsa tsone e le tsa gouta, a bo a di thelela metheo e le menè e e khuti ya selefera.+ 37  Mme a direla kgoro ya mogope sesiro ka tlhale e e bobududu le boboa jo bo fetoletsweng mo mmaleng o o bobududu jo bo mokgona jo bohibitswana le letsela le le bohibidu jo bo letlhololo jwa khokhase le leloba le le boleta le le otlhilweng, tiro ya mologi,+ 38  le dipilara tsa sone tse tlhano le dimapo tsa sone. Mme a manega bogodimo jwa tsone le ditomagano tsa tsone gouta, mme metheo ya tsone e metlhano e e khuti e ne e le ya kgotlho.+

Dintlha Tse di Kwa Tlase